El Apocalipsis 3 - El Nuevo Testamento

Kitlajkuiluiyaj on tiopan de on ueyikalpan itoka Sardis

¹ ’Xtlajkuilui ipastor on tiopan ne Sardis niman ijkin xkijli: “In yejua itlajtol on yejuan kipiya on chikome iEspíritus Dios niman on chikome sitlalimej. Yejua ijkin mitsijlia: Nejua nikmatstikaj nochi tlen tikchiua. Nikmatstikaj ika timiktok maski tejua timoteneua tikpiya nemilistli ne ixpan Dios.

² Xmotlachalti, niman xyolchikaua on tlen sanken* tikpiya yejuan ye nisiu para mikis. Nikita ika on tlen tikchiua xnochi kuajli otikchiu ixpan Dios.

³ Yejua ika, xkelnamiki on tlen omitsmachtijkej niman on tlen otikak. Xtlakamati, niman xmoyolpatla. Tla xtimotlachaltis, nias motech ken yakaj tlachteketl, niman xtikmatis tlen hora nimitsontas.

⁴ Pero ompa ne Sardis tikimpiya keskimej tlakamej yejuan xnijtlakouaj. Yejuamej nouan kistinemiskej ikan intlaken istak pampa ijki kitocaroua.

⁵ Yejuan tetlaniskej, tlakemejkej yeskej ikan istak tlakentli*. Xnikintokayopopolos ipan on amamoxtli yejuan kijtoua akinomej kipiyaj on yenkuik nemilistli para nochipa, yej nikintokayoteneuas ne ixpan noTajtsin niman imixpan on ángeles.

⁶ Xpiyakan cuidado on tlen on Espíritu Santo kinmijlia on tlaneltokakej.”

Kitlajkuiluiyaj on tiopan de on ueyikalpan itoka Filadelfia

⁷ ’Xtlajkuilui ipastor on tiopan de Filadelfia niman ijkin xkijli: “In yejua itlajtol on yejuan melauak niman yolchipauak, niman yejuan kipiya illave David. On tlen yejua kitlapoua, xakaj ueli kitsakua; niman on tlen yejua kitsakua, xakaj ueli kitlapoua.

⁸ Yejua ijkin mitsijlia: Nejua nikmatstikaj nochi tlen tikchiua. Aman xkaki, nejua yonimitstlapouilij sen tsakuijlotl* yejuan xakaj uelis kitsakuas. Maski tejua xmás tikojtik, tiktlakamati notemachtil, niman xtinechneneki*.

⁹ Xkinta tej, on xkuajkualtin tlakamej yejuan nemij ipan isinagoga* Satanás. Yejuamej noteneuaj hebreos*, pero xnejli hebreos*. Yejuamej tlakajkayajkej. Nikchiuas para mokxitlan ma notlakuantelketsakan, para ijkon kimatiskej ika nimitstlajsojtla*.

¹⁰ Pampa yotiktlakamat notlanauatil para tikxikoua tlajyouilistli, nejua no nimitsmanauis ipan on hora ijkuak yejkos on tlajyouilistli yejuan nochi tlajtlakolej ipan uajlas. Yejua on tlajyouilistli onyas, para nochi tlaltikpaktlakatl notlatlatas.

¹¹ Nejua tej, saniman niuajlas. On tlen tikpiya xkejeua, para maka yakaj mitskuilis motetlayokolil yejuan Dios kineki mitsmakas.

¹² Yejuan tetlaniskej, nikintlalis para uejueyixtiaskej ken pilares ipan itiopan noDios. Yejuamej tej, xkaman nejkuaniskej ompa. Niman impan nikijkuilos itoka noDios niman itoka on ueyikalpan yejuan iyaxka* noDios. On ueyikalpan sano yejua on yenkuik Jerusalén yejuan ualejtikaj iluikak itech Dios. Niman no impan nikijkuilos noyenkuik tokatsin.

¹³ Xpiyakan cuidado on tlen on Espíritu Santo kinmijlia on tlaneltokakej.”

Kitlajkuiluiyaj on tiopan de on ueyikalpan itoka Laodicea

¹⁴ ’Xtlajkuilui ipastor on tiopan ne Laodicea niman ijkin xkijli: “In yejua itlajkuilol on yejuan itoka Amén*. In yejua itestigo Dios yejuan kuajli kipanextia on tlen melauak itechkopa Dios. Itechkopa yejua, Dios okichijchiu nochi tlen onkaj.

¹⁵ Nejua nikmatstikaj nochi tlen tikchiua. Nikmatstikaj ika xmelauak tinechtlajsojtla* ikan nochi moyojlo, nion xmelauak tinechtlauelita. Ninekisia melauak tinechtlajsojtlaskia ikan nochi moyojlo, noso melauak tinechtlauelitaskia.

¹⁶ Ijkon tej, pampa xmelauak kuajli tinechtlajsojtla nion xmelauak tinechtlauelita, nejua xok nikneki nikmatis itlaj de tejua.

¹⁷ Tejua tej, timoricojteneua, niman tikijtoua ika xitlaj* mitspoloua, pero ixpan Dios tejua hasta ixko tlajli tixpolijtikaj, xkaman tipaktikaj, timayankachichi, tixpajpayatik niman titetsotsoltik.

¹⁸ Yejua ika tej, nimitschikajkanotsa para notech xkoua on chipauak oro yejuan yokichipajkej ika tlitl para ijkon melauak tirico yes. Niman no ijki notech xkoua on istak tlakentli* para ika timotlakentis, niman ijkon on mopinajkatlalnakayo xok yakaj kitas. Niman para uelis titlachas, no notech xkoua on pajtli para tikintlalilis mixtololojuan.

¹⁹ On yejuan nikintlajsojtla*, nikinchikajkanotsa, niman nikincastigaroua ijkuak kichiuaj tlen xkuajli. Yejua ika, xnechtlakamati ikan nochi moyojlo niman xmoyolpatla.

²⁰ Xmatstia ika nejua nijkatikaj tekiauatempan, niman nikteteloua on tsakuijlotl*. Tla yakaj kakis ika nikonotstikaj niman kitlapos itsakuijlou, nikalakis, niman iuan nitlakuas, niman yejua nouan tlakuas.

²¹ On yejuan tetlaniskej, nikinkauilis nouan ma notlalikan kampa nitlamandaroua, ijkon ken nejua yonitetlan niman iuan noTajtsin yoninotlalij kampa yejua tlamandaroua.

²² Xpiyakan cuidado on tlen on Espíritu Santo kinmijlia on tlaneltokakej.”