El Apocalipsis 21 - El Nuevo Testamento

On cielo niman on tlaltikpaktli yenkuiyaskej

¹ Kemaj, onikitak sen yenkuik cielo* niman se yenkuik tlaltikpaktli pampa on achtoj cielo niman on achtoj tlaltikpaktli xok onkatkaj niman no xok onkatka mar.

² Nejua, Juan, onikitak on yenkuik yektitikaj ueyikalpan Jerusalén, uajtemotiaya de ne iluikak kampa Dios nemi. On ueyikalpan nochi sanoyej* kualtsin nesiya, ken sen novia ijkuak nonamiktia, kualtsin notlakentia para kipaktia inovio.

³ Niman sen chikauak tlajtojli yejuan ualeuaya iluikak, okijtoj: “Xkita, aman Dios chanti intsajlan on tlakamej. Yejua inuan chantis, niman yejuamej nochiuaskej ikoneuan. Sano yejua Dios inuan chantis niman yejua nochiuas iminDios.

⁴ Dios kimpopouilis nochi iminixayo, niman xok onyas mikilistli, nion chokistli, nion ajmantli, nion kokolistli*, pampa nochi tlen achtoj onkatka yopanok.”

⁵ Kemaj on yejuan yeuatikatka ipan on ueyixtikaj trono* okijtoj: “Xkita, nejua nikyenkuilia nochi on tlajtlamach*.” No ijki okijtoj: “Xkijkuilo in tlajtoltin pampa in tlen nimitsijlijtikaj yejua tlen melauak niman kuajli para nochimej kineltokaskej.”

⁶ Kemaj onechijlij: “Ijki yonochiu. Nejua niachtoj niman nisa ika nochi de nochi on tlajtlamach*, no ijki ken on abecedario* peua ikan letra A niman ontlami ikan letra Z. Yejuan amikis, niktlayokolis atl de ameyajli yejuan kitemaka nemilistli para nochipa.

⁷ Yejuan tetlanis ipan nochi on tlen xkuajli kiselis sen herencia de nochi on tlen kuajli. Nejua niiDios yes, niman yejua nokoneu yes.

⁸ Pero para on yejuan nochi kimakajsij, on yejuan xtlaneltokaj, on yejuan kichiuaj tlen tetlajyeloj ixpan Dios, on yejuan temiktianimej, on yejuan auilnemij, on yejuan tenaualuiyaj, on yejuan kinmauistiliaj ídolos niman on yejuan tlakajkayauaj, yejuamej yaskej tliko kampa on tlitl niman azufre tetlatiaj. In tej, yejua ika okpa mikilistli.”

Juan okitak on yenkuik Jerusalén

⁹ Kemaj semej on chikomemej ángeles yejuan kipiyayaj on chikome copas tetentokej ikan on chikome sa ika nochi plagas notech ouajlaj, niman onechijlij: “Xuajla, niman nimitsititis on novia yejuan isiuau on Borreguito.”

¹⁰ Kemaj, nimantsin on Espíritu Santo okiyekan notlamachilis, niman on ángel onechuikak ipan sen sanoyej ueyi tepetl. Ompa yejua onechititij on ueyi niman yektitikaj ueyikalpan Jerusalén, uajtemotiaya de ne iluikak kampa Dios nemi.

¹¹ On ueyikalpan petlaniya ikan iueyilis Dios. On ipetlanalis ijkon katka ken ipetlanalis on yejuan más kualtsin tetl itoka jaspe, niman tlanespan katka ken teskatl.

¹² On ueyikalpan kiyeualojtoya sen ueyi niman tlakpak tepanchinantli. Kipiyaya majtlaktli uan ome tsakuijlomej* niman nemiya sen ángel ipan cada tsakuijlotl. Niman ipan cada tsakuijlotl tlajkuilolnestikatka itoka sen tribu* de on majtlaktli uan ome tribus de on israelitas.

¹³ Yeyi tsakuijlotl onkatka kampaka ikisayan tonaltsintli, okse yeyi onkatka kampaka norte, okse yeyi onkatka kampaka sur, niman okse yeyi onkatka kampaka ikalakiyan tonaltsintli.

¹⁴ Kampa peua icimiento itepanchinan on ueyikalpan, onkatkaj majtlaktli uan ome temej. Niman ipan cada tetl tlajkuilolnestikatka sen itoka de on majtlaktli uan ome iapóstoles* on Borreguito.

¹⁵ On ángel yejuan nouan tlajtouaya kipiyaya sen tlatemachiuajli tlachijchijtli ikan oro para kitejtemachiuas on ueyikalpan, itsakuijlouan, niman itepanchinan.

¹⁶ On ueyikalpan cuadrado katka. Ijkon kech ika ueyak, no ijki ika patlauak katka. On ángel okitemachiu on ueyikalpan ika on tlatemachiuajli, niman onikitak kipiyaya 2 mil doscientos kilómetros ika ueyak, niman ika tlakpak niman patlauak sano ijki kipiyaya.

¹⁷ Kemaj on ángel okitemachiu itepanchinan on ueyikalpan ika on tlatemachiuajli yejuan ika tlatemachiuaj on tlaltikpaktlakamej. Ijkuak otlan kitemachiua, onikitak ika kipiyaya 65 metros.

¹⁸ On tepanchinantli tlachijchijtli katka ikan tetl yejuan itoka jaspe. On ueyikalpan tlachijchijtli katka ikan oro yejuan xkipiya nion achijtsin itlaj xchipauak, niman yejuan petlani ken on teskatl yejuan sanoyej chipauak.

¹⁹ Icimiento* on tepanchinantli tlajmachyoj* katka ikan nochi seseknekamej kualtetsitsinmej temej. On achtoj icimiento* tlajmachyoj* katka ikan jaspe, on ika ome ikan zafiro, on ika yeyi ikan ágata, on ika naui ikan esmeralda,

²⁰ on ika makuijli ikan ónike, on ika chikuasen ikan cornalina, on ika chikome ikan crisólito, on ika chikueyi ikan berilo, on ika chiknaui ikan topacio, on ika majtlaktli ikan crisoprasa, on ika majtlaktli uan sen ika jacinto, niman on ika majtlaktli uan ome ikan amatista.

²¹ Onkatka majtlaktli uan ome tsakuijlomej, niman cada tsakuijlotl okichijchijkej ikan sen perla*. Icalle on ueyikalpan yejuan patlauak, tlachijchijtli katka ikan oro yejuan xkipiya nion achijtsin itlaj xchipauak, niman yejuan petlani ken on teskatl yejuan kualtsin tlanespan.

²² Ompa tej, nion sen tiopan xonikitak ipan on ueyikalpan, pampa toTEKO Dios yejuan nochi ueli kichiua niman on Borreguito, sano yejuamej tiopan.

²³ On ueyikalpan xkipoloua tonaltsintli nion metstli para kitlauiluiyaj, pampa iueyilis Dios kitlauiluiya, niman on Borreguito yejua itlauil on ueyikalpan.

²⁴ Nochi tlakatl de nochi naciones kistinemiskej tlauilpan ikan itlauil on ueyikalpan. Niman on tlaltikpak reyes yaskej itech kitkiskej inueyilis niman intetlakaitalis.

²⁵ Xkaman nion se tonajli, kitsakuaskej itsakuijlouan on ueyikalpan, pampa ompa xkaman tlayouas.

²⁶ On países ompa kiktiskej ueyilistli niman tetlakaitalistli.

²⁷ Pero ompa xkaman kalakis on tlen xchipauak, nion akin yejuan kichiua on tlen tetlajyeloj ixpan Dios, noso on yejuan tlakajkayaua. Ompa tej, san kalakiskej yejuan tlajkuilolnestikaj intoka ipan on amamoxtli* de on Borreguito yejuan kijtoua akinomej kipiyaj nemilistli para nochipa.