El Apocalipsis 2 - El Nuevo Testamento

Kitlajkuiluiyaj on tiopan de on ueyikalpan Éfeso

¹ ’Xtlajkuilui ipastor on tiopan de Éfeso niman ijkin xkijli: “In yejua itlajtol on yejuan kipiya on chikome sitlalimej ipan iyekma, niman yejuan nemi intlajkotian on chikome candeleros tlachijchijtin ikan oro.

² Nejua nikmati nochi tlen tikchiua. Nikmati ika sanoyej* chikauak titekiti nopampa, niman no nikixmati moijyouilis. Nikmatstikaj ika xueli tikinxikoua on xkuajkualtin tlakamej. Nejua nikmatstikaj ika yotikintlatlatak on yejuan noteneuaj apóstoles*, pero xnejli apóstoles*. Niman yotikitak ika san tlakajkayauaj.

³ Nopampa tikxikoua on tlajyouilistli, niman no sanoyej titekiti nopampa. Maski ijkon sanoyej titekiti, xkaman tikajkaua.

⁴ Pero maski ijkon tikchiua, nikpiya tlinon ika nimitschikajkanotsas. Xok tinechtlajsojtla* ken achtoj otinechtlajsojtlak.

⁵ Yejua ika, xkelnamiki kech tetlajsojtlalistli* otinechpiyalij achtoj. Aman tej, xmoyolpatla niman xnechtlajsojtla ken achtoj otikchiu. Tla xtimoyolpatlas, nias niman nimitskixtilis on mocandelero.

⁶ Pero no tikpiya on tlinon ika nimitsueyiteneuas. Mitskualania on tlen kichiuaj on xkuajkualtin tlakamej yejuan kitlakamatij itemachtil Nicolás. Nejua no nechkualania itemachtil.

⁷ Xpiyakan cuidado on tlen on Espíritu Santo kinmijlia on tlaneltokakej. On yejuan tetlantiskej nikinkauilis ma kikuakan itlakijlo on kojtlakijlotl yejuan onkaj iluikak kampa nemi Dios. On tlakijlotl kitemaka nemilistli para nochipa.”

Kitlajkuiluiyaj on tiopan de on ueyikalpan itoka Esmirna

⁸ ’Xtlajkuilui ipastor on tiopan ne Esmirna niman ijkin xkijli: “In yejua itlajtol on yejuan omik niman oksejpa oyoliu*, yejuan achtoj niman sa ika nochi de nochi on tlajtlamach*.

⁹ Yejua ijkin mitsijlia: Nejua nikixmati ken titlajyouiya niman ika xitlaj* tikpiya, maski ika tlen melauak tejua tirico ixpan Dios. No nikmatstikaj ika on yejuan noteneuaj hebreos* mitsijtouiliaj on tlen xkuajli. Pero yejuamej xmelauak nopouaj ken hebreos*, yej nochiuaj isinagoga* Satanás.

¹⁰ Maka xmakajsi on tlen saniman tikijyouis. Nenkeskimej on diablo* mechtsakuas ipan cárcel para mechtlatlatas, niman nentlajyouiskej majtlaktli tonajli. Pero tejua xkejeua motlaneltok maski tla timikis ika on tlaueltotokalistli niman castigo, niman nejua nimitsmakas ken motlayokolil on yejkuik nemilistli yejuan tikpiyas para nochipa.

¹¹ Xpiyakan cuidado tlen on Espíritu Santo kinmijlia on tlaneltokakej. On yejuan tetlaniskej, xkaman okpa mikiskej, niman xyaskej ne miktlan kampa tetlajyouiltiloyan.”

Kitlajkuiluiyaj on tiopan de on ueyikalpan itoka Pérgamo

¹² ’Xtlajkuilui ipastor on tiopan ne Pérgamo, niman ijkin xkijli: “In yejua itlajtol on yejuan kipiya on espada In yejuan kipiya okan iten sanoyej tlateki.

¹³ Nejua nikmatstikaj nochi tlen tikchiua niman no nikmatstikaj kanon tichanti. Tichanti kampa on Satanás kipiya itrono. Pero maski nepa tichanti, notech tikuajpixtiu motlaneltok. Maski okimiktijkej Antipas, on yejuan melauak notenojnotsakau, ompa kampa chanti Satanás, tejua xotinechkau.

¹⁴ Pero maski ijkon tikchiua no nikpiya keski tlinon ika nimitschikajkanotsas. Ompa mouan nemij sekimej yejuan ipan nouikaj itemachtil Balaam yejuan ye uejkaui otemachtijka. Yejua okimachtij Balac kenijki kichiuas para on hebreos* ma tlajtlakokan. Okimijlij ma kikuakan on tlajtlamach* yejuan nouentlalia intech on ídolos niman ma auilnemikan.

¹⁵ Niman no mouan nemij sekimej yejuan ipan nouikaj on temachtijli yejuan Nicolás otemachtij niman intemachtil nechkualania.

¹⁶ Yejua ika tej, xmoyolpatla pampa tla xtimoyolpatlas, saniman nias motech, niman nikinuijsokis ika on espada yejuan nokamak kisa.

¹⁷ Xpiyakan cuidado on tlen on Espíritu Santo kinmijlia on tlaneltokakej. On yejuan tetlaniskej nikinmakas ma kuakan on maná yejuan iyantikaj. Niman no nikinmakas sen tetsintli istak kampa tlajkuilolnestias sen yenkuik tokayotl yejuan xakaj kixmatis, yej san on yejuan kiselia kixmatis.”

Kitlajkuiluiyaj on tiopan de on ueyikalpan itoka Tiatira

¹⁸ ’Xtlajkuilui ipastor on tiopan ne Tiatira niman ijkin xkijli: “In yejua itlajtol on yejuan iKoneu Dios, yejuan kipiya ixtololojuan ken itlaj tlimilinajli niman ikxiuan petlantokej ken on tepostli itoka bronce.

¹⁹ Yejua ijkin mitsijlia: Nejua nikixmati motekiu, motetlajsojtlalis*, motlaneltok, niman moijyouilis. Niman nikmatstikaj ika aman más titekiti xken achtopa.

²⁰ Pero maski ijkon tikchiua, no nikpiya tlinon ika nimitschikajkanotsas. On siuatl Jezabel yejuan noteneua tiotlajtojketl, tikauilia kinmachtia on notekitkauan. Niman yejua kinmachtia para ma auilnemikan niman para ma kikuakan on tlajtlamach* yejuan nouentlalia intech on ídolos.

²¹ On siuatl onikmakak tiempo para ma noyolpatla, pero xkineki kajkauas on ika auilnemi.

²² Xkaki, on siuatl niktlajkalis ipan tlapechtli para sanoyej kualos, niman no on yejuan iuan auilnemij, nikinxinis ipan on sanoyej temojtij tlajyouilistli tla xnoyolpatlaj niman xkajkauaj on ika iuan notekatinemij.

²³ Niman ikoneuan on siuatl nikinmiktis. Ijkuak ijkon nikchiuas, on tlaneltokakej kimatiskej ika nejua nochi kuajli nikmati tlinon onkaj ipan itlamachilis niman ipan iyojlo cada se, niman cada se niktlaxtlauilis on tlen kichiua ken noneki.

²⁴ Pero nemejuamej yejuan no nennemij ompa ne Tiatira, yejuan xnenkitlakamatij on kenon temachtijli niman xnenkixmatij on tlen yejuamej kiteneuaj uejueyi iichtakayo Satanás, nemechijlia ika xitlaj* ika nemechtlajtlakoltis.

²⁵ Pero on tlen nenkineltokaj xkejeuakan hasta ijkuak nejua oksejpa niuajlas.

²⁶ On yejuan tetlaniskej niman nochi innemilis nechtlakamatiskej, nikinmakas tekiuajyotl para kinmandaroskej nochi países,

²⁷ ijkon ken noTajtsin onechmakak on tekiuajyotl. Yejuamej tej, kinmandaroskej on países ika on chikauak tekiuajyotl yejuan sanoyej uelis kinxixinis on países ken sen tlakatl ueli kuejkuechtilia sen kontli.

²⁸ Niman no nikinmakas iueyi kualtsinyo on kualkan sitlalin.

²⁹ Xpiyakan cuidado on tlen on Espíritu Santo kinmijlia on tlaneltokakej.”