El Apocalipsis 18 - El Nuevo Testamento

Youets on ueyikalpan Babilonia

¹ Kemaj ijkuak ijkon yonikitak, onikitak sen ángel uajtemouaya de ne iluikak. Yejua okipix ueyi tekiuajyotl niman ikan ipetlanalis otlastayak ipan in tlaltikpaktli.

² Niman ikan chikauak tlajtojli ijkin tsajtsiya: Aman kemaj, youets on ueyixtikaj ueyikalpan itoka Babilonia. Yejua yonochiu chanyotl* para on xkuajkualtin espíritus, chanyotl para nochi tlajtlamach* xkuajkualtin ajakamej, niman yonochiu tepajsojli para on xchipajkej niman tlauelejkej totomej.

³ On tlakamej ipan nochi países yotlajtlakojkej yejua ipampa. Niman nochimej reyes ipan in tlaltikpaktli iuan yotlajtlakojkej ika on tlen xkuajli. Niman no on tlasemankej yoricojtiakej ika on tlajtlamach* tlen patioj.

⁴ Kemaj ne iluikak onikonkak okse tlajtojli yejuan ijkin kijtouaya: “Nemejuamej yejuan nennoyaxkauan*, xkisakan ipan on ueyikalpan, para xinuan nenkichiuaskej on intlajtlakol, niman ijkon xinuan nenkiseliskej on iplagas.

⁵ Kiseliskej itlauel Dios pampa tlajtlakouaj hasta kampa xok ueli, niman Dios yokelnamik on tlen xkuajli okichijkej.

⁶ On tlen yejua okinmakak oksekimej, no yejua xmakakan. Niman on tlen yejua okichiu, okpatipan sano ijki xmakakan. Ijkon ken chichik okineloj sen tlaonijli para oksekimej, nemejuamej okpa más chichik xnelokan para yejua.

⁷ Xmakakan tlajyouilistli niman ajmantli no ijki ken onoueyilij niman onopaktij ikan iriquezas. Ijkon xmakakan pampa ipan iyojlo kijtoua: ‘Nikan neuatikaj ken yakaj reina. Nejua xnikauajli, niman xkaman nichokas.’

⁸ Yejua ika, san ipan se tonajli kipiyas in plagas. Kipiyas mikilistli, ajmantli, apistli, niman tlatlas. Ijkon nochiuas pampa toTEKO Dios yejuan yokitlajtlakolmakak sanoyej* kipiya poder.”

⁹ On reyes de in tlaltikpaktli yejuan inuan onotekakej niman iuan okipaktijkej innemilis ika on tlen okinajauiltijkej, chokaskej, niman najmanaskej ijkuak kitaskej ipokyo on tlitl yejuan ika tlatlas.

¹⁰ Yejuamej san uejka ontlachixtiaskej pampa kimakajsiskej on itlajyouilis, niman kijtoskej: ¡Ay, lástima de tejua tiueyixtikaj ueyikalpan Babilonia! ¡Sanoyej tikojtitikatka ueyikalpan! Niman aman san ipan se hora otikselij mocastigo.

¹¹ On tlasemankej yejuan nemij ipan in tlaltikpaktli no chokaskej niman najmanaskej ipampa on ueyikalpan, pampa xok nemiskej yejuan kinkouiliskej on tlen kinamakaj.

¹² Xok kouaskej on oro, plata, on kualtsitsimej temej, on perlas*, on tela más kualtsin itoka lino, niman on tela yejuan itoka seda, niman on tela morada niman on tela chichiltik. No ijki xok kouaskej nochi tlajtlamach* kojtli* ajuiyak, nochi tlajtlamach* yejuan tlachijchijtli ikan marfil, kojtin* kualtetsitsimej, noso on tepostli itoka bronce, noso hierro, noso on tlajtlamach* yejuan tlachijchijtli ika on kualtejtsin tetl itoka mármol.

¹³ Niman xok kouaskej canela, tlajtlamach* tlen ajuiyak, xochikopajli, on ajuiyalistin itoka mirra niman olíbano, vino, aceite, harina yejuan más kuajli niman trigo, yolkej yejuan tlamamaj, niman no, borregos, caballos, carretas yejuan kitilanaj caballos, esclavos niman hasta innemilis on tlakamej.

¹⁴ On tlasemankej no kijliskej on ueyikalpan: ¡On sanoyej uelik tlakijlotl yejuan tikuelitaya, xok tikpiya! Niman aman para nochipa yotikpoloj on riquezas niman on tlen patioj yejuan tikpiyaya.

¹⁵ On tlasemankej yejuan yotlanamakakej ika on ken on tlajtlamach* niman oricojtiakej itechkopa on ueyikalpan, san uejka ontlachixtiaskej pampa kimakajsiskej on itlajyouilis. Yejuamej chokaskej niman najmanaskej,

¹⁶ niman kijtoskej: ¡Ay, lástima para on ueyixtikaj ueyikalpan! Yejua ken sen siuatl yejuan notlakentiaya ikan siuatlakentli* de lino fino, niman ikan tlakentli* morado niman chichiltik, niman tlajmachyoj* ikan oro, ikan kualtetsitsimej temej niman ikan perlas.

¹⁷ ¡Niman san ipan se hora otlan nochi on miyek riqueza! Nochimej on yejuan tlamandarouaj ipan on barcos, on yejuan paxalouaj ipan on barcos, on marineros, niman nochimej on yejuan tekitij ipan on mar uejka uajnotelketsaskej.

¹⁸ Niman ijkuak kitaskej ipokyo on tlitl yejuan ika tlatlas on ueyikalpan, kijtoskej: “¡Xonkatka okse ueyikalpan sanoyej ueyixtikaj ken yejua in ueyikalpan!”

¹⁹ Yejuamej nokuatlaltemiskej para kiteititiskej ika najmanaj. Chokaskej niman najmanaskej, niman kijtoskej: ¡Ay, lástima para on ueyixtikaj ueyikalpan! Ikan iriquezas orikojtiakej nochimej on yejuan kipiyayaj inbarco. ¡Pero san ipan sen hora nochi otlan!

²⁰ Xpakikan nemejuamej yejuan nenchantij iluikak pampa on ueyikalpan yoxoxoton. Nemejuamej apóstoles*, niman nemejuamej tiotlajtojkej, niman nemejuamej yejuan iyaxkauan* Dios, no xpakikan. Xpakikan pampa Dios yocastigaroj on ueyikalpan yejuan omechtlajyouiltij.

²¹ Kemaj sen ángel kojtik oketsteu sen tetl. On tetl sanoyej ueyi katka, ken imetl sen ueyi molino. Kemaj okontlajkal on tetl ipan mar, niman okijtoj: “Babilonia, on ueyixtikaj ueyikalpan no ijkon kontlajkaliskej ne tlatsintlan, niman xok kaman oksejpa nenkitaskej.

²² Xok kaman ompa kinkakiskej on yejuan tlatsotsonaj. Xok kaman kakistis kitsotsonaj arpas, nion kimpitsaj flautas, niman on trompetas ipan on ueyikalpan. Niman nion se tlakatl xok tekitis ipan tlajtlamach* tekitl, niman no xok kakistiskej on molinos ipan on ueyikalpan.

²³ Nion se tlauijli xok tlauilos ipan on ueyikalpan. Niman no xok nonamiktiuas. In nochiuas pampa motlasemankauan más sanoyej uejueyixtikatkaj nochiuiyan ipan on tlaltikpaktli, niman ikan monauajlo otikinkajkayau nochimej países.”

²⁴ Ipan on ueyikalpan okinextijkej inyesyo on tiotlajtojkej, niman on yejuan yolchipajkej itech Dios niman nochimej on yejuan no okinmiktijkej nochiuiyan ipan in tlaltikpaktli.