El Apocalipsis 17 - El Nuevo Testamento

On tlakapapatlaketl kiselia itlauel Dios

¹ Kemaj ouajlaj se de on chikome ángel yejuan kipiyayaj on chikome copas, niman onechijlij: “Xuajla, niman nimitsititis ken Dios kitlajtlakolmakas niman kicastigaros on ueyi tlakapapatlaketl yejuan yeuatikaj ipan nochi on mares yejuan onojkej.

² On reyes yejuan nemij ipan in tlaltikpaktli yonotekakej iuan yejua. Niman on chanejkej ipan on tlaltikpaktli otlauankej ikan ivino. Ivino kijtosneki on tlakapapatlalistli yejuan okichiu.”

³ Kemaj, on Espíritu Santo okiyekan notlamachilis niman on ángel onechuikak neka xalpatlajkan. Ompa tej, onikitak sen siuatl yetikatka ipan sen xkuajli yolki. On xkuajli yolki tlajtlachaya chichiltik niman nochi itlakayo tentikatka ikan tokayomej yejuan kuijuikaltiayaj Dios. On xkuajli yolki chikome itsontekon kipiyaya niman majtlaktli ikuakuauuan.

⁴ On siuatl tlakemej katka ikan sen tlakentli* yejuan kipiyaya on tlapajli morado niman chichiltik. On itlaken tlajmachyoj* katka ikan oro, ikan kualtetsitsimej temej, niman ikan perlas*. Yejua kimapixtikatka sen copa yejuan tlachijchijtli ikan oro. On copa tentikatka ikan on tlen sanoyej* molonki ijtlakauki, niman ika on tlen sanoyej tetlajyeloj* xchipauak yejuan onosentlalij ika itlakapapatlalis.

⁵ Niman ixkuatipan on siuatl tlajkuilolnestiaya sen tokayotl yejuan xakaj kajsikamatiya tlinon kijtosneki. On tokayotl ijkin kijtouaya: “On ueyixtikaj Babilonia yejua iminnanaj nochimej on tlakapapatlakej, niman nochi on tlen sanoyej molonki ijtlakauki ipan on tlaltikpaktli.”

⁶ Kemaj onikitak tlakaj on siuatl tlauanki katka ika inyesyo on yolchipajkej itech Dios yejuan okitoyajkej ijkuak omikkej pampa otenojnotskej ipampa Jesús. Ijkuak ijkon onikitak, sanoyej onimojkatlachix.

⁷ Kemaj on ángel onechijlij: “¿Tline* yotimojkatlachix? Nejua nimitsmachistis iichtakayo on siuatl, niman on xkuajli yolki yejuan ipan yetinemi yejuan kipiya chikome itsontekon niman majtlaktli ikuakuau.

⁸ On xkuajli yolki yejuan otikitak, sano yejua on yejuan achtoj yoltikatka, pero aman xok yoltikaj. Niman maski xok yoltikaj yejua kuajkisas ijtik on pozo yejuan xnesi kech ika uejkatlan, niman kemaj kixoxotoniskej. Desde ipeuyan in tlaltikpaktli, ye onkatka sen tlajkuilolamatl kampa nestikatka intoka on tlakamej yejuan kipiyaskej nemilistli para nochipa*. On tlakamej yejuan xtlajkuilolnestikaj intoka ipan on tlajkuilolamatl, mojkatlachaskej ijkuak kitaskej on xkuajli yolki, pampa on xkuajli yolki yoltikatka, niman aman xok yoltikaj. Pero oksejpa uajlas.

⁹ “Ipan in noneki yakaj yejuan kipiya tlamatkilistli* niman kajsikamatilistli. On chikomemej tsontekomamej kijtosneki, chikomemej tepemej yejuan on siuatl impan yeuatikaj.

¹⁰ Niman on tsontekomamej no kijtosneki chikomemej reyes. Makuiltimej yejuamej yomikkej. Niman se de yejuamej tlamandarojtikaj, niman okse hasta aman xye uajlau. Pero ijkuak uajlas on yejuan sa ika nochi rey, yejua xok uejkauis tlamandaros.

¹¹ On xkuajli yolki yejuan yoltikatka niman aman xok yoltikaj, sano yejua on ika chikueyi rey. Yejua no teuan nopoua intech on chikomemej reyes, niman ijkuak ika okpa yotlamandaroj, yas para kimiktiskej.

¹² “On majtlaktli kuakuautli yejuan otikitak kijtosneki on majtlaktlimej reyes yejuan hasta aman xe peuaj tlamandarouaj. Pero san ipan se achijtsin tiempo, san sekan iuan on xkuajli yolki kiseliskej on tekiuajyotl para tlamandaroskej ken reyes.

¹³ On majtlaktlimej reyes san se tekitl kipiyaskej niman impoder iuan intekiuajyo kimakaskej on xkuajli yolki.

¹⁴ On xkuajli yolki niman on reyes kuijsokiskej on Borreguito. Pero on Borreguito kintlanis pampa yejua inTEKO nochimej on tetekouan niman inRey nochimej on reyes. Niman on yejuan nemij iuan on Borreguito, Dios okinnots niman okintlapejpenij, niman kuajli onouikakej iuan on Borreguito.”

¹⁵ On ángel no ijkin onechijlij: “On mares yejuan otikitak impan yeuatikaj on tlakapapatlaketl kijtosneki: naciones, tojlamej, razas, niman on seseknekamej tlajtoltin*.

¹⁶ On majtlaktli kuakuautli yejuan otikitak niman on xkuajli yolki kitlauelitaskej on tlakapapatlaketl. Yejuamej kitlakijkixtiliskej, kitetsotsoloskej, kikuaskej inakayo, niman kitlatiskej.

¹⁷ Ijkon nochiuas pampa Dios sano yejua kintlalilis ipan inyojlo para kichiuaskej on tlen yejua kineki. Yejuamej tej, san sekan notlajtolmakaskej niman kimakaskej itekiuajyo on xkuajli yolki para yejua uelis tlamandaros hasta kaman nochiuas nochi tlen Dios yokijtoj.

¹⁸ On siuatl yejuan otikitak kijtosneki on ueyixtikaj ueyikalpan yejuan kimandaroua nochi kech rey nemi ipan in tlaltikpaktli.”