El Apocalipsis 16 - El Nuevo Testamento

On chikomemej ángeles kixiniaj on plagas ika incopas

¹ Kemaj onikak sen chikauak tlajtojli yejuan okakistik ne ijtik on ueyitiopan. On tlajtojli ijkin okinmijlij on chikomemej ángeles: “Xuiyan, niman on tlauejli yejuan itech Dios ualeua xkontoyauakan ika on chikome copas ipan on tlaltikpaktli.”

² On achtoj ángel oyaj niman okitsonokij icopa de on tlen kipiyaya, ipan on tlaltikpaktli. Kemaj nochi tlakatl yejuan kipiyaya ineskayo on xkuajli yolki niman kimauistiliaya on iixkopinajlo on yolki okiskej tsotsomej impan yejuan sanoyej* xkuajli niman sanoyej tekokojkej.

³ On ika ome ángel okitsonokij icopa ipan mar de on tlen kipiyaya, niman on mar onokuep yestli ken iyesyo sen mikatsintli. Niman nochi tlen yoltikatka ipan on mar omik.

⁴ On ika yeyi ángel okitsonokij icopa de on tlen kipiyaya ipan on ríos niman on ameyaltin, niman nochi on atl onokuep yestli.

⁵ Kemaj on ángel yejuan cuidarouaya on atl onikak okijtoj: Tejua toTEKO Dios yolchipauak yejuan aman nemi niman nochipa nemiya, otitetlaxtlauilij ken kitocaroua.

⁶ On tlakamej okinmiktijkej on yejuan yolchipajkej motech niman on motiotlajtokauan. Niman pampa ijkon okichijkej sanoyej xkuajli, aman yotikinmonitij on yestli. Aman kiseliaj on tlen kintocaroua.

⁷ No onikak akinonon ijkin kijtouaya ne tlaixpan*: “Kemaj, toTEKO Dios yejuan nochi tiueli tikchiua, ika tlen melauak yotitetlaxtlauilij niman otikchiu ken kitocaroua.”

⁸ On ika naui ángel okitsonokij icopa de on tlen kipiyaya ipan on tonaltsintli, niman on tonaltsintli okiselij poder para kintonaltlatis on tlakamej.

⁹ Niman on tlakamej sanoyej temojtij otonaltlatlakej, pero xokipatlakej inyojlo nion xokueyilijkej Dios yejuan kichiua para ma onya on plagas, yej okuijuikaltijkej Dios.

¹⁰ On ika makuijli ángel okitsonokij icopa de on tlen kipiyaya ipan itrono on xkuajli yolki, niman nochiuiyan kampa tlamandarouaya onokau ipan tlayouajlotl. On tlakamej sanoyej onokokojkej hasta nonenepilkuayaj.

¹¹ Niman yejuamej okuijuikaltijkej on Dios iluikak chanej* ipampa on ika nokokouayaj niman on tsotsomej yejuan okipixkej. Pero maski ijkon impan onochiu, xokajkajkej on tlen xkuajli.

¹² On ika chikuasen ángel okitsonokij icopa de on tlen kipiyaya ipan on ueyi río itoka Éufrates, niman on atl ouak. Ijkon otlapou sen ojtli para opanokej on reyes yejuan uajlayaj ne ika ikisayan tonaltsintli.

¹³ Kemaj, onikintak yeyimej xkuajkualtin espíritus yejuan tlajtlachayaj ken atemomej. Yejuamej kisayaj ikamak on yolki itoka dragón, niman ikamak on achtoj xkuajli yolki, niman no ikamak on yejuan xmelauak tiotlajtojketl.

¹⁴ In xkuajkualtin espíritus ueliyaj kinchiuaj milagros. Niman yejuamej kisayaj komintlamachilismakayaj* nochimej on reyes ipan on tlaltikpaktli para kinsentlaliskej. Ijkin kichiuaskej para nouijsokiskej iuan Dios yejuan nochi ueli kichiua ipan on iueyitonajli ijkuak kiyolkuitis nochi tlakatl niman kintlajtlakolmakas ken kitocaroua.

¹⁵ Kemaj Cristo okijtoj: “Xkakikan, xakaj kimati kamanon niuajlas pampa niuajlas ken yakaj tlachtekketl. Yejua ika, sanoyej tlatiochijtli yes on tlakatl yejuan tlachixtias niman kuajli tlakemej yes, para ijkuak niuajlas xpinauas ken yakaj yejuan tetsotsoltik.”

¹⁶ Niman on yeyimej xkuajkualtin espíritus okinsentlalijkej on reyes ne kampa ikan tlajtojli hebreo* itoka Armagedón.

¹⁷ On ika chikome ángel okitsonokij icopa de on tlen kipiyaya ipan ajakatl. Kemaj ne iluikak ipan on ueyitiopan okis sen chikauak tlajtojli yejuan ualejtikatka ipan on ueyixtikaj trono. On tlajtojli ijkin kijtouaya: “Nochi yonochiu.”

¹⁸ Kemaj sanoyej otlapetlan, otlakakistik chikauak, otlakokomokak, niman in tlaltikpaktli ouiuixkak ikan sen tlalolinalistli sanoyej temojtij. On tlalolinalistli yejuan okuiuixoj in tlajli, xkaman ijki onochijka chikauak ken aman, desde ijkuak opeu nemij on tlakamej.

¹⁹ On ueyixtikaj ueyikalpan Babilonia yexkan otlajkokis, niman on uejueyi kalpanmej ipan nochi países oxoxotonkej. Niman Dios xokelkau itlajtlakoluan on ueyixtikaj ueyikalpan, yej okichiualtij ma koni ken itlaj vino on itlauel yejuan okimakak pampa sanoyej okualanij.

²⁰ Nochimej tlaluaktsitsimej yejuan onkatkaj atlajkotian niman on tepemej opolijkej.

²¹ No ijki uejueyi tesiutli oualeu ipan cielo, niman ouajxin impan on tlaltikpaktlakamej. Cada tesiutli kanaj cuarenta kilos ika yetik katka. Niman on tlakamej okuijuikaltijkej Dios ipampa on tesiutli yejuan sanoyej temojtij katka.