El Apocalipsis 15 - El Nuevo Testamento

On chikomemej ángeles ikan chikome copas yejuan kipiyaj on sa ika nochi plagas

¹ Kemaj, ne ipan cielo* onikitak okse ueyi niman tetlatlachaltij tlamauisojli. Onikintak chikomemej ángeles yejuan okipixkej on chikome sa ika nochi plagas. On yejua sa ika nochi plagas pampa ijkuak tlamis on plagas, no tlamis itlauel Dios.

² No onikitak on ken itlaj mar tlachijchijtli ikan teskatl nenelijtikatka ikan tlitl. Ompa majmaniyaj on yejuan okitlankej on xkuajli yolki, niman on iixkopinajlo on achtoj xkuajli yolki yejuan okichijchijkej, niman no iuan on número de itoka. Yejuamej ompa kimpiyayaj on arpas yejuan Dios okinmakak,

³ niman nokuikatiayaj on kuikatl de Moisés yejuan itekichiuilijkau Dios, niman no nokuikatiayaj on kuikatl de on Borreguito. On kuikatl ijkin kijtouaya: Ueyi niman tetlatlachaltij nochi on tlen yotikchiu toTEKO Dios yejuan nochi tiueli tikchiua. Timouika ken kitocaroua, niman melajki, tejua yejuan tiRey para nochi países.

⁴ ¿Akinon tej, xmitstlakaitas? ¿Akinon xmitsueyilis toTEKO? Tej, san tejua tiyektli. Niman nochi tlakatl de nochiuiyan países uajlaskej mixpan niman mitsmauistiliskej, pampa yones ika motekiu otikchiu ken kitocaroua.

⁵ Ijkuak ijkin yonikitak, kemaj kej onikitak ipan on ueyitiopan yejuan onkaj ne iluikak, otlapou kampa más tlayekkan kampa yejyejtokej on tepatlachtin yejuan ipan tlajkuilolnestikaj on itlanauatil Dios.

⁶ Ipan on ueyitiopan ouajkiskej on chikomemej ángeles yejuan kipiyayaj on chikome plagas. Yejuamej tlakemejkej katkaj ika on tlakentli* itoka lino yejuan chipauak niman petlanki. No ijki malintikatka inyelpan sen ilpikatl tlachijchijtli ikan oro.

⁷ Kemaj semej on nauimej yejuan ken yolkej tlajtlachayaj okinmamakatiaj sesentemej sen copa tlachijchijtli ikan oro. Cada copa tentiaya ika itlauel Dios yejuan nochipa nemi.

⁸ Niman on ueyitiopan tentikatka ikan poktli ipampa iueyilis niman ipoder Dios. Niman xakaj ueliya kalakiya ne ipan on ueyitiopan san chika on chikomemej ángeles xe tlamiyaj kixiniayaj on chikome plagas.