El Apocalipsis 14 - El Nuevo Testamento

On 144 mil hebreos* nokuikatiaj

¹ Kemaj onikitak on Borreguito ijkatikatka ipan on tepetl itoka Sión. Iuan yejua nemiyaj 144 mil tlakamej yejuan ipan iminixkuatipan tlajkuilolnestikatka itoka on Borreguito niman itoka on iTajtsin.

² Kemaj onikak sen tlajtojli yejuan ne iluikak kakistiya ken kakisti on ueyi atl ijkuak uejkatlan ontoyajtikaj, niman ken ijkuak chikauak tlakomoni. Niman no onikak kakistiya ken kakistij on arpas ijkuak kintsotsonaj.

³ Niman yejuamej nokuikatiayaj sen yenkuik kuikatl ixpan on ueyixtikaj trono, niman imixpan on yejuan ken yolkej tlajtlachaj, niman no imixpan on ueuetkej tlayekankej. On kuikatl xakaj ueliya kinokuikatiaya. Yej san ueliyaj nokuikatiaj on 144 mil yejuan omakiskej ipan on tlaltikpaktli intsajlan on tlajtlakolejkej.

⁴ In tlakamej xonijtlakojkej inuan siuamej. Yejuamej xkaman teuan onotekakej. Niman san kanon yau on Borreguito, yejuamej ompa iuan yauij. Yejuamej okinkojkej intsajlan on tlaltikpaktlakamej. Niman yejuamej nochiuaj achtoj ofrenda para Dios niman para on Borreguito.

⁵ Xkaman okijtojkej on tlen xmelauak. Yejuamej tej, xkipiyaj tlajtlakojli ixpan Dios.

Yeyimej ángeles kiteijliaj on intemachtil

⁶ Kemaj onikitak okse ángel patlantinemiya ixko on cielo*. Yejua kitkiya on kuajli tlajtojli yejuan para nochipa onkaj. Yejua kitkiya para kimijlis on yejuan chanejkej ipan in tlaltikpaktli de nochi tribus, de nochi raza, de nochi kech sesekneka tlajtoltin, niman nochi países.

⁷ Niman ikan chikauak tlajtojli ijkin okijtoj: “Xtlakaitakan Dios, niman xkueyilikan, pampa aman yoyejkok on hora para cada se kiyolkuitis niman kitlaxtlauilis ken kitocaroua on tlen okichiu. Xmauistilikan on yejuan okitlalij on cielo, on tlaltikpaktli, on mar niman on ameyaltin.”

⁸ Kemaj okuajtokak on ika ome ángel yejuan okijtoj: “¡Youets! ¡Youets on ueyikalpan Babilonia yejuan kichiualtiaya nochi tlakatl ipan nochi países ma kintlakamatikan oksekimej dioses!”

⁹ Kemaj, on ika yeyi ángel okinuajtokak on achtoj omemej ángeles, niman ikan chikauak tlajtojli ijkin okijtoj: “Tla yakaj kimauistilia iixkopinalo on xkuajli yolki yejuan okichijchijkej, niman kinokauilia ma kitlalilikan on neskayotl ipan ixkuatipan noso ipan ima,

¹⁰ ika onkaj yejua kiselis on temojtij tlajyouilistli yejuan Dios kimakas ikan nochi itlauel. Niman kitlajyouiltis imixpan on yolchipajkej ángeles, niman ixpan on Borreguito ikan tlitl niman azufre.

¹¹ Niman ipokyo on tlitl yejuan tetlajyouiltia, para nochipa kistias. Nochipa ikan tonajli niman ikan yeuajli xkipiyaj neseuijli on yejuan kimauistiliaj on xkuajli yolki niman on iixkopinajlo yejuan okichijchijkej, niman on yejuan kiseliaj on neskayotl de itoka.”

¹² Yejua ika, noneki ma kixikokan on tlen nochiuas, ikan yolseuilistli on yolchipajkej itech Dios, yejuan kitlakamatij itlanauatiluan niman kimelajkapiyaj intlaneltok itech Jesús.

¹³ Kemaj, sen tlajtojli yejuan oualeu iluikak onikak nechijlia: —Xkijkuilo yejua in: “Sanoyej tlatiochijtin yeskej on yejuan mikiskej desde aman para tlayakapan on yejuan kineltokaj toTEKO.” On Espíritu Santo kijtoua: “¡Kemaj, sanoyej tlatiochijtin yeskej yejuamej! Yejuamej noseuiskej de intekiu, niman Dios kintlaxtlauilis on tlen okichijkej.”

Ipan in tlaltikpaktli kisentlaliaj on tlakijlotl

¹⁴ Kemaj, onikitak sen istak moxtli. Niman ipan on moxtli yeuatikatka ken sen tlakatl. Ipan itsontekon kipiyaya sen corona tlachijchijtli ikan oro, niman kimapixtikatka sen tepostli tlateki itoka hoz yejuan kitekitiltiaj ijkuak pixkalo.

¹⁵ Niman kemaj okse ángel ouajkis ne ipan on tiopan, niman okinots ikan chikauak tlajtojli on yejuan yeuatikatka ipan on moxtli, niman ijkin okijlij: “Xtekitilti mohoz ipan on tlaltikpaktli, niman xsentlali on tlakijlotl pampa yoyejkok hora niman on tlakijlotl yochikau.”

¹⁶ Kemaj on yejuan yeuatikatka ipan on moxtli okipanoltij ihoz ipan on tlaltikpaktli, niman okisentlalij itlakijlo on tlaltikpaktli.

¹⁷ Kemaj okse ángel ouajkis ipan on tiopan yejuan onkaj iluikak, niman yejua no kipiyaya sen hoz tlateki.

¹⁸ Niman ne tlaixpan* ouajkis okse ángel yejuan kipiya itekiu para cuidarouaya on tlitl. Niman yejua ikan chikauak tlajtojli okinots on yejuan kipiyaya ihoz tlateki, niman okijlij: “Xtekitilti mohoz tlateki, niman xsentlali itlakijlo on uvas yejuan onkaj ipan on tlaltikpaktli pampa yochikau.”

¹⁹ Niman on ángel okipanoltij ihoz ipan on uvas yejuan onkaj ipan on tlaltikpaktli. Kemaj okonxinij ne kampa kipatskaskej. In kijtosneki on itlauel Dios yejuan ye uajlau.

²⁰ Yejua on uvas xipan on ueyikalpan okipatskakej, yej neka kaltenko. Ne kampa okipatskakej on uvas okis yestli. On yestli sanoyej miyek katka niman otlejkok hasta kanaj se metro uan tlako ika tlakpak, niman kanaj 300 kilómetros ika uejka onotlaloj.