El Apocalipsis 13 - El Nuevo Testamento

Juan okintak omemej xkuajkualtin yolkej

¹ Niman ne ipan on mar onikitak ouajkis sen xkuajli yolki yejuan kipiyaya chikome itsontekon niman majtlaktli ikuakuauuan. On yolki ipan cada ikuakuau kipiyaya sen corona, niman cada itsontekon kipiyaya sen tlajtojli yejuan kuijuikaltiaya Dios.

² On xkuajli yolki yejuan onikitak tlajtlachaya ken itlaj tigre, pero ikxiuan kipiyaya ken ikxiuan sen oso niman ikamak kipiyaya ken ikamak sen león. Niman on dragón okimakak ipoder, niman itrono niman ueyi tlanauatijli, on xkuajli yolki yejuan ouajkis ijtik on mar.

³ Ipan se itsontekon on xkuajli yolki nesiya ken tlakokojli* yejuan ika ueliskia mikiskia. Pero on itlakokol yejuan nesiya ika mikis, opajtik. Ijkuak nochi tlakatl chanej ipan in tlaltikpaktli ijkon okitak, otlamojkaitakej, niman opeu kitlakamatij on xkuajli yolki.

⁴ Yejuamej okimauistilijkej on dragón pampa yejua okimakak itekiuajyo on xkuajli yolki. Niman on xkuajli yolki no okimauistilijkej niman ijkin kijtouayaj: “¿Akinon nemi yejuan no ijki ken in yolki? Niman, ¿akinon uelis iuan notlanis?”

⁵ No okauilijkej on xkuajli yolki noueyiteneuas niman kuijuikaltis Dios. Niman no okauilijkej tlamandaros 42 meses.

⁶ Ijkon tej, on xkuajli yolki kuijuikaltiaya Dios, niman itokatsin Dios, niman on iyektiopan Dios, niman no on yejuan nemij ne iluikak.

⁷ No okauilijkej ma kinuijsoki niman ma kintlani on yejuan yolchipajkej itech Dios. No ijki okimakakej tekiuajyotl para kimandaros nochi tribus, nochi razas, nochi kech sesekneka tlajtoltin, niman nochimej países.

⁸ Nochimej yejuan chantij ipan in tlaltikpaktli, kimauistiliskej on xkuajli yolki, on yejuan xtlajkuilolnestokej intoka ipan on amamoxtli*, yejuan kijtoua akinomej kipiyaj nemilistli para nochipa. In amamoxtli* iyaxka* on Borreguito yejuan okimiktijkej. Niman ijkuak okimiktijkej okitemakak temakixtilistli desde ijkuak opeu in tlaltikpaktli.

⁹ Xpiyakan cuidado on tlen aman nemechijlis:

¹⁰ “Tla ijki onkaj para yakaj kitsajtsakuaskej, kitsakuaskej. Niman tla ijki onkaj para yakaj kimiktiskej ikan espada, kimiktiskej.” Yejua ika tej, on yejuan yolchipajkej itech Dios, noneki ma kixikokan on tlen nochiuas ikan yolseuilistli niman tlaneltokalistli.”

¹¹ Kemaj, onikitak okse xkuajli yolki uajkistiu ijtik on tlaltikpaktli. In xkuajli yolki kipiyaya ome ikuakuauuan ken ikuakuau sen borreguito, pero itlajtol kakistiya ken itlajtol sen dragón.

¹² In xkuajli yolki kipiyaya nochi on ueyi tekiuajyotl yejuan iyaxka* on achtoj xkuajli yolki, niman okitekitiltij ixpan on achtoj xkuajli yolki. Yejua kichiuaya para nochimej on tlakamej chanejkej ipan in tlaltikpaktli ma kimauistilikan on achtoj xkuajli yolki, yejuan opajtik ipan on itlakokol yejuan nesiya ika mikis.

¹³ Yejua no kinchiuaya uejueyi milagros* ipan cielo hasta kichiuaya ma uetsi tlitl ipan tlajli imixpan on tlakamej kampa ueli kitaj.

¹⁴ Yejua okinkajkayau on tlaltikpakchanejkej ikan on milagros* yejuan okauilijkej kichiuas ixpan on achtoj xkuajli yolki. Niman otlanauatij ma kichijchiuakan sen iixkopinajlo de on achtoj xkuajli yolki yejuan nemiya maski tlakokojli* katka ikan espada.

¹⁵ Niman on ika ome xkuajli yolki okauilijkej kijyomakas on ixkopinajli tlamachijchijtli de on achtoj xkuajli yolki para okiyolitij. Yejua ika ueliya tlajtlajtouaya niman tlanauatiaya para kinmiktiayaj on yejuan xkimauistiliayaj on tlamachijchijtli de on achtoj yolki.

¹⁶ No ijki on ika ome xkuajli yolki okinchiualtij nochimej, maski uejueyixtokej noso xuejueyixtokej, maski ricos noso mayankej, maski esclavos noso xesclavos, para ma kintlalilikan sen neskayotl ipan inyekma noso ipan imixkuatipan.

¹⁷ Niman xakaj ueliya tlakouaya nion tlanamakaya tla xkipiyaya on neskayotl. On neskayotl kijtosneki itoka on xkuajli yolki noso on inúmero de itoka.

¹⁸ Yejua ika in, noneki tlamatkilistli*. Tla yakaj ueli kajsikamati, ma kixtlalo inúmero on xkuajli yolki pampa on número, inúmero yes nochi tlakatl. Niman on número yejua in: 666.