El Apocalipsis 12 - El Nuevo Testamento

Juan okitak on siuatl niman on ueyi yolki itoka dragón

¹ Kemaj sen ueyi tlamauisojli ones ipan iluikak. Niman ijkin katka on tlamauisojli: sen siuatl uajpetlantikatka ken petlani on tonaltsintli, niman on metstli ikxitlan onkatka, niman kimantikatka sen corona yejuan kipiyaya majtlaktli uan ome sitlalin.

² In siuatl kipiyaya ikonetsin, niman tsajtsiya ika nokokouaya pampa ye kitlakatilis ikonetsin.

³ Kemaj okse tlamauisojli ones ompa iluikak: ones sen sanoyej* ueyi niman temojtij yolki itoka dragón. In yolki tlajtlachaya chichiltik, niman kipiyaya chikome itsontekon, majtlaktli ikuakuauuan, niman cada itsontekon kipiyaya sen corona.

⁴ On yolki ikan ikuitlapil, de nochi on yexkantipan kech onkatkaj sitlalimej ipan cielo, se parte okinuajxinij ipan tlaltikpaktli. On siuatl ye nisiu katka para kinemitis ikonetsin. Niman on dragón oyaj ixpan on siuatl para ijkuak uajnemiskia ikonetsin, yejua nimantsin kikualiskia on konetsintli.

⁵ Niman on siuatl okitlakatilij sen tlakakonetl yejuan tlamandaros ikan nochi poder ipan nochi tlakatl kech chanti ipan nochiuiyan países. Pero on ikoneu okanilijtikiskej niman okuikakej itech Dios, niman ixpan on iueyixtikaj trono.

⁶ Niman on siuatl oyejteu. Niman oyaj neka xalpatlajkan kampa Dios yokitlalijka kampa kicuidaroskej se mil 260 tonaltin.

⁷ Más sakin*, ne iluikak onochiu sen nouijsokilistli. On ángel tlayekanki itoka Miguel iuan iángeles onouijsokkej iuan on dragón iuan iángeles.

⁸ Pero on dragón niman iángeles xouelkej otetlankej. Yejua ika tej, xok ouel onenkej ne iluikak.

⁹ Ijkon tej, on ueyi dragón okuajkixtijkej ne iluikak. On dragón, sano yejua on kouatl yejuan desde yeuejkaui nemi, itoka diablo* noso Satanás. Yejua okajkayau nochi tlakatl chanej* ipan in tlaltikpaktli. Yejua tej, niman iángeles okinuajxinijkej ipan in tlaltikpaktli.

¹⁰ Kemaj ne iluikak onikak sen chikauak tlajtojli yejuan okijtoj: Yoyejkok itemakixtilis niman ipoder toDios. Yejua yopeu tlamandaroua, niman Cristo no yokiselij tekiuajyotl. Nochi in tikmatij ika melauak, pampa aman on yejuan nochipa ikan tonajli niman ikan yeuajli impan tlatototsaya* on tokniuan ixpan toDios, yokuajtlajkalkej de ne iluikak.

¹¹ Niman on tokniuan otetlankej itechkopa iyesyo on Borreguito niman ika on temachtijli itech Cristo yejuan okitemachtijkej. Yejuamej tej, xonomojtijkej kipoloskej innemilis, yej onoyolchikajkej hasta mikiskej.

¹² Xpakikan ne iluikak. Nemejuamej yejuan ompa nenchantij, xpakikan. Pero ¡lástima para nemejuamej yejuan nenchantij ipan in tlaltikpaktli niman ipan mar! pampa on diablo* nemotech yoyaj. Yejua yotemok ikan temojtij tlauejli, pampa kimatstikaj ika xok uejkajtika kiselis icastigo.

¹³ Niman ijkuak on dragón okitak ika yokuajtlajkalkej ipan in tlaltikpaktli, opeu kajsisneki on siuatl yejuan okitlakatilij ikonetsin.

¹⁴ Pero on siuatl okimakakej ome inmastlakapaluan de se ueyi kuaktli para ouel oyejteu ixpan on kouatl kampa xok uelis kipajsolos. Niman yejua oyaj uejka ipan on xalpatlajkan kampa kitekipanoskej yeyi xipan uan tlajko.

¹⁵ Kemaj on kouatl okuajkixtij ikamak sanoyej miyek atl ken sen ueyi río* para katoktiskia on siuatl.

¹⁶ Pero on tlajli okipaleuij on siuatl. On tlajli otlapou niman okonik on río yejuan on dragón ikamak okixtij.

¹⁷ Kemaj on dragón sanoyej okualan itechkopa on siuatl, niman okinuisokito yejuan iuejkakoneuan on siuatl. In yejuamej on yejuan kitlakamatij itlanauatil Dios, niman ikan yolchikaualistli kijtouaj ika kineltokaj JesuCristo.

¹⁸ Niman on dragón onoteltito itempan on mar.