El Apocalipsis 1 - El Nuevo Testamento

JesuCristo okimachistij Juan in tlajtlamach*

¹ Ipan in tlajkuilolamatl nikijkuiloua on tlajtlamach* yejuan Dios okinek para JesuCristo ma kinmachisti on itekitkauan on tlen saniman nochiuas. Cristo okimachistij Juan in tlajtlamach* itechkopa sen ángel.

² Niman Juan okitepannextilij nochi tlen okak ikan itlajtol Dios niman on tlen melauak yejuan okititij JesuCristo.

³ Dios sanoyej* kitiochiua on yejuan kitekakistilia in tiotlajtojli. Niman no sanoyej kintiochiua on yejuan kakij in tiotlajtojli niman kitlakamatij pampa ye nisiu on tonaltin ijkuak nochi in tlen nikan tlajkuilolnestikaj nochiuas.

Juan okintlajkuiluij on tlaneltokakej ipan on chikome tiopanmej

⁴ Nejua, Juan, nemechtlajkuiluiya nemejuamej tlaneltokakej ipan on chikomej tiopanmej yejuan onkaj ipan on ueyitlalpan Asia. Ma Dios mechtiochiua ikan iueyitetlajsojtlalis niman ma mechmaka yolseuilistli. Yejua nemi, nemiya, niman nochipa nemis. Niman on chikomemej espíritus no ijki ma mechtiochiuakan. Yejuamej nemij ixpan Dios ne kampa tlamandaroua.

⁵ No ijki, ma mechtiochiua JesuCristo yejuan nochipa kuajli tlajtoua ken testigo. Yejua achtoj oyoliu* niman onokuiteu ipan itlalkon para xok kaman mikis, niman kinmandaroua on reyes. Yejua techtlajsojtla* niman otechchipauilij toalma ikan iyesyo.

⁶ Yejua otechtlalij ken reyes niman tiopixkej para tiktekichiuiliskej on Dios iTajtsin. ¡Ma kiseli Cristo ueyilistli niman poder para nochipa! Ma ijki nochiua.

⁷ Xkitakan, Cristo uajlas ipan moxtli. Niman nochi tlakatl kitas hasta on yejuan okimiktijkej. Niman nochimej on tlaltikpaktlakamej chokaskej yejua ipampa. Kemaj melauak ijki nochiuas. Ma ijki nochiua.

⁸ “Nejua niachtoj niman nisa ika nochi de nochi on tlajtlamach*, ijki ken on abecedario* peua ikan A niman ontlami ikan Z”, kijtoua on toTEKO Dios yejuan nochi ueli kichiua. Yejua aman nemi, nemiya, niman nochipa nemis.

Cristo okinotitij Juan

⁹ Nejua, Juan, ninemokniu. Pampa ninemi san sekan iuan Jesús ken nemejuamej nennemij, san sekan nemouan nikpiya tlajyouilistli, temakixtilistli niman tlaxikoualistli. Ninemiya ne ipan on tlaluaktli itoka Patmos yejuan onkaj atlajkotian. Ompa onechontotokakej pampa nikteijlia on itlajtoltsin Dios niman on tlen nikmati de JesuCristo.

¹⁰ Ipan se tonajli ijkuak domingo, on Espíritu Santo okiyekan notlamachilis ikan ipoder, niman onikak nokuitlapan sen chikauak tlajtojli yejuan okakistik ken kakisti on trompeta ijkuak kipitsaj.

¹¹ Yejua on tlajtojli onechijlij: —Nejua niachtoj niman nisa ika nochi de nochi on tlajtlamach*, no ijki ken on abecedario* peua ikan A niman ontlami ikan Z. Ipan sen tlajkuilolamatl xkijkuilo on tlen tikita. Niman kemaj on tlajkuilolamatl xkintitlanili on chikome tiopanmej yejuan onokej ipan on ueyitlalpan Asia. Xtitlani ne ipan on uejueyikalpanmej Éfeso, Esmirna, Pérgamo, Tiatira, Sardis, Filadelfia niman Laodicea.

¹² Oninomalakacho para onikontak akinon nechnotsaya niman onikitak chikome candeleros tlachijchijtin ikan oro.

¹³ Niman intlajkotian on chikome candeleros, onikitak yakaj yejuan nesiya ken sen tlakatl. Yejua tlakemej katka ikan sen tlakentli* yejuan hasta ikxitlan kitlamiliaya, niman iyelpan malintikatka ikan sen ilpikatl tlachijchijtli ikan oro.

¹⁴ Niman onikitak itson istak ken itlaj lana* yejuan sanoyej istak, noso ken on nieve. Niman ixtololojuan ken itlaj tlimilinajli.

¹⁵ Ikxiuan petlaniyaj ken on tepostli kostik itoka bronce ijkuak kipatlaj ipan horno. Ijkon ken chikauak komoni on ueyi atl ijkuak uejkatlan ontoyajtikaj, no ijki kakistiya itlajtol on yejuan onikitak.

¹⁶ Ipan iyekma kipiyaya chikome sitlalimej, niman ipan ikamak uajkistikatka sen espada yejuan okipix okan iten sanoyej tlateki. Ixayak sanoyej petlaniya ken on tonaltsintli ijkuak sanoyej chikauak tona.

¹⁷ Ijkuak ijkon onikitak oniuetstiaj ikxitlan ken onimik. Pero yejua nopan okuajtlalij iyekma niman onechijlij: —Maka xmomojti. Nejua niachtoj niman nisa ika nochi de nochi on tlajtlamach*.

¹⁸ Nejua nikpiya nemilistli. Nejua tej, onimikka, pero xkita, aman nikpiya nemilistli para nochipa. Nejua nikpiya poder para nikinyolitis on yejuan yomikkej niman nikpiya poder para niktlapos niman niktsakuas kampa nemij on mikatsitsimej.

¹⁹ Yejua ika tej, xkijkuilo in tlinon tikita, in tlen aman nochiua niman on tlen nochiuas.

²⁰ On chikomemej sitlalimej yejuan otikintak ipan noyekma niman on chikomemej candeleros tlachijchijtin ikan oro kipiyaj inichtakayo*. On inichtakayo yejua in kijtosneki: on chikomemej sitlalimej kitosneki impastores on chikome tiopanmej, niman on chikome candeleros kijtosneki on chikome tiopanmej.