Efesios 6 - El Nuevo Testamento

Kokonej niman intajuan

¹ Tekoneuan, xkintlakamatikan nemotajuan ijkon ken toTEKO otechnauatij, pampa in sanoyej* kuajli.

² In yejua achtoj tlanauatijli yejuan kipiya promesa, niman ijkin kijtoua: “Xtlakaita motataj niman monana,

³ para tikpiyas miyek tlatiochiualistli niman para tikpiyas ueyi nemilistli nikan ipan in tlaltikpaktli.”

⁴ Tatajtin, nemejuamej maka xkinkuajkualanikan nemokoneuan, yej kuajli xkinmachtikan niman xkinchikajkanotsakan ken toTEKO kineki.

On esclavos niman iminteko

⁵ Esclavos, nemejuamej xkintlakamatikan niman xkintlakaitakan nemotekouan yejuan nenkimpiyaj nikan tlaltikpak ikan nochi nemoyojlo ken Cristo nenkitlakamatiskiaj.

⁶ Maka xkintekichiuilikan san ijkuak yejuamej mechitstokej para nenkimpaktiskej yejuamej, yej xkintekichiuilikan ikan nochi nemoyojlo pampa nenesclavos itech Cristo yejuan nenkichiuaj on tlen Dios kineki.

⁷ Xchiuakan on tekitl ikan kuajli nemoyojlo, ken nenkichiuaskiaj para toTEKO niman xpara tlakamej.

⁸ Ye nenkimatstokej ika cada se, tla esclavo noso ka, kiselis itlaxtlauil itech toTEKO on tlen kuajli kichiua.

⁹ Niman nemejuamej tetekouan, sano ijki kuajli xmouikakan iuan nemoesclavos. Maka xkinmomojtikan kitl itlaj xkuajli nenkinchiuiliskej. Xkelnamikikan ika nemejuamej niman nemoesclavos ne iluikak nenkipiyaj san se nemoTEKO yejuan itech nenteyaxkauan*, niman on nemoTEKO xakaj kichikoita*.

Iminarmas on yejuan tlaneltokaj

¹⁰ Sa ika nochi nokniuan, xmokojtilikan ikan iueyi poder toTEKO.

¹¹ Xmotsakuilikan ikan nochi on armas yejuan Dios mechmaka, para uelis nenmelajkanemiskej niman nenkitlaniskej itlakajkayaualis on diablo*.

¹² Ijkon xchiuakan, pampa tejuamej xtitouijsokij inuan on tlaltikpaktlakamej. Yej titouijsokij inuan on xkuajkualtin espíritus yejuan kipiyaj poder. Titoxixikouaj inuan on espíritus yejuan tlamandarouaj, niman kipiyaj tekiuajyotl niman nemij ne tlakpak, niman ajakamej yejuan tlamandarouaj nikan ipan in tlaltikpaktli.

¹³ Yejua ika, xpiyakan nochi armas yejuan Dios mechmaka, para uelis nenmelajkanemiskej ijkuak on nemotlauelikniu mechixnamikis. Ijkon tej, ijkuak tlamis on tlauijsokilistli, nemejuamej sanken* nenmelajkanemiskej.

¹⁴ Yejua ika, xmelajkanemikan. Ijkon ken sen soldado notlajkosaloua ikan iilpikau, no ijki xmotlajkosalokan ika on tlen melauak. Ijkon ken sen soldado notsakuilia iyelpan ikan iteposchaleco, no ijki xmotsakuilikan ikan on yolmelaualistli.

¹⁵ Ijkon ken sen soldado isijkanejnemi ikan izapatos no ijki xchiuakan para nenmontenojnotsaskej ika on kuajli tlajtojli yejuan kitemaka yolseuilistli.

¹⁶ Ijkon ken sen soldado kipiya sen escudo* para notsajtsakuilia ijkuak kimojmotlaj ikan flechas, no ijki xpiyakan nemotlaneltok para ika nemotsajtsakuiliskej ijkuak on diablo* mechmojmotlas ikan flechas yejuan tlikuitiu.

¹⁷ Ijkon ken sen soldado kitlalia sen casco para kimanauiya itsontekon, no ijki xpiyakan temakixtilistli para ma kimanaui nemoalma. Niman ijkon ken sen soldado kipiya sen espada para kinuisoki itlauelikniuan, no ijki xpiyakan itlajtoltsin Dios yejuan on iespada on Espíritu Santo.

¹⁸ Nochipa xchiuakan oración ken on Espíritu Santo mechyekanas. Xtlachixtiakan niman nochipa xchiuakan oración impampa nochimej on yejuan ikoneuan Dios.

¹⁹ No ijki xchiuakan oración nopampa, para Dios ma nechmaka tlajtojli ijkuak nitlajtos, niman para uelis nitlajtos ikan yolchikaualistli ijkuak niktemachtis on tlen iyantikaj itech on kuajli tlajtojli yejuan kiteijlia ken Dios temakixtia.

²⁰ Dios onechajtitlan ken itenojnotskau para nikteijlis in temachtilistli yejuan aman ipampa nitsakutikaj. Xchiuakan oración para nejua nikteijlis in temachtilistli ikan yolchikaualistli ken noneki nikchiuas.

Itetlajpalol Pablo

²¹ Tíquico, totlajsojkaikniu niman tlapaleuijketl yejuan ikan kuajli iyojlo nochipa kichiua on tlen melauak ipan itekiu toTEKO, mechtlajtlajtouilis nochi on tlajtlamach* yejuan nopan nochiua para nemejuamej no xmatikan.

²² Yejua ika, nemechtitlanilia para mechijlis kenijki tinemij niman ijki mechyoleuas.

²³ Ma Dios toTajtsin niman toTEKO JesuCristo ma kinmaka on tokniuan yolseuilistli, tetlajsojtlalistli* niman tlaneltoktli.

²⁴ Niman Dios ma kinmakaj iueyitetlajsojtlalis* nochimej on yejuan kitlajsojtlaj toTEKO JesuCristo ikan tetlajsojtlalistli* yejuan xkaman nopatla. Ma ijki nochiua.