Efesios 5 - El Nuevo Testamento

Ijkin noneki nemiskej ikoneuan Dios

¹ Xmouikakan itech ika Dios para nennemiskej ken yejua, pampa nemejuamej nentetlajsojkakoneuan yejua itech.

² Niman xkintlajsojtlakan* oksekimej sano ijki ken Cristo otechtlajsojtlak. Yejua onouentlalij topampa ken sen ofrenda niman sen uentli yejuan sanoyej* ajuiyak itech Dios.

³ Aman pampa nemejuamej ye neniyaxkauan* Dios, maka nion achijtsin xteneuakan on auilnemilistli, nion itlaj okse yejuan xchipauak, nion itlaj yejuan xkuajli eleuilistli*.

⁴ Maka xkijtokan itlaj tlen tepinajtij, nion itlaj tontojyotl, noso on xkuajli kamanajli, pampa in tlajtlamach* xtechtocaroua para tikijtoskej, yej ma tikmakakan tlaxtlauijli Dios.

⁵ Tej, ye nenkimatstokej ika on yejuan auilnemi, noso xyolchipauak, noso nochi kinoyaxkatisneki xuelis kalakis kampa Cristo niman Dios tlamandaroua. Yejuamej ken kinyekteneuaskiaj on ídolos.

⁶ Maka xkauilikan yakaj mechkajkayauas ikan tlajtoltin yejuan xitlaj* kijtosneki. Ipampa in tlajtlamach* tlen xkuajli, uajlau iueyitlauel Dios impan on yejuan xkitlakamatij.

⁷ Yejua ika, maka inuan xmonelokan.

⁸ Ipan okse tiempo onenkichijkej on tlen xkuajli. Pero aman nenkichiuaj on tlen kuajli, pampa nennemij san sekan iuan toTEKO. Yejua ika, xnemikan ipan itlauil Dios niman xchiuakan tlen kuajli.

⁹ Nochimej yejuan nemij ipan tlauijli kijtouaj tlen melauak, niman kichiuaj tlen kuajli, niman yolmelajkej.

¹⁰ Xtejtemokan ken uelis nenkipaktiskej toTEKO.

¹¹ Maka xchiuakan tlen xkuajli yejuan kichiuaj on tlajtlakolejkej. Pero ijkuak nenkitaskej ika kichiuaj on tlen xkuajli, xkajuakan teixpan on tlajtlakolej niman xkinmijlikan ika xkuajli on tlen kichiuaj.

¹² Tepinajtij para tikijtoskej on tlen yejuamej kichtakachiuaj.

¹³ Pero ijkuak se kimpannextilia on intlajtlakol ikan itlauil Dios, kintitia ika yejuamej sanoyej xkuajkualtin, pampa on tlauijli ueli kipannextia nochi.

¹⁴ Yejua ika ijkin nijtoua: Xtlacha tejua yejuan tikochi. Xmokuiteua niman xkisa ne intsajlan on mikatsitsimej yejuan kichiuaj on tlen xkuajli. Tla ijkon tikchiuas, Cristo mitstlauiluis.

¹⁵ Yejua ika kuajli xmotakan sano nemejuamej ken nemouikaskej. Maka xmouikakan ken on yejuan xtlamatkej, yej xmouikakan ken tlamatkej.

¹⁶ Maka xpolokan tiempo, yej nochipa xchiuakan tlen kuajli, pampa in tonaltin sanoyej xkuajkualtin.

¹⁷ Yejua ika maka xnemikan ken on yejuan xkimatij tlinon toTEKO kineki, yej kuajli xkajsikamatikan on tlen kineki.

¹⁸ Maka sa xtlauanikan, pampa on tlauanalistli mechyekana para más nenkichiuaj on tlen xkuajli. Yej nemejuamej xkauilikan on Espíritu Santo ma mechyoltemiti niman ma mechyekana.

¹⁹ Xmotlajtlajtouilikan salmos. Xmokuikatikan himnos niman coros de yekteneualistli itech Dios. Xmokuikatikan niman xkueyilikan toTEKO ikan nochi nemoyojlo.

²⁰ Ikan itokatsin toTEKO JesuCristo, nochipa xmakakan tlaxtlauijli Dios toTajtsin ipampa nochi tlajtlamach*.

Tlakamej yejuan tlaneltokaj niman insiuauan

²¹ Xmotlakamatikan inuan oksekimej para ijkon kitlakaitaskej Dios.

²² On tesiuauan ma kintlakamatikan inueuentsitsiuan ijkon ken kitlakamatij toTEKO.

²³ Ijkon ma kichiuakan, pampa Dios okitlalij on tlakatl tlayekanki* itech isiuau, ijkon ken Cristo yejua tlayekanki intech on yejuan kineltokaj. On yejuan kineltokaj nochiuaj icuerpo niman yejua kimakixtia.

²⁴ Ijkon ken kitlakamatij Cristo on yejuan tlaneltokaj, no ijki on siuamej nochi ika ma kintlakamatikan inueuentsitsiuan.

²⁵ On tlakamej ma kintlajsojtlakan insiuauan ijkon ken Cristo okintlajsojtlak* on yejuan kineltokaj niman impampa onotemakak para omik.

²⁶ Yejua ijkon okichiu para on yejuan tlaneltokaj okinnochipauilij. Okinnochipauilij ikan atl niman ikan itlajtoltsin Dios.

²⁷ No ijkon okichiu para sano yejua ixpan kinuajtelketsas ikan miyek ueyilistli on yejuan kineltokaj. Yejua kinselis ken sen novia yejuan xkipiya mancha de tlajtlakojli, niman chipauak nouika ken nesi itlaj tlakentli* yejuan xkanaj kojkolochtik. Yej kinselis yolchipajkej niman xonyas itlaj okse yejuan ika kichichiuas.

²⁸ Ijkon tej, ken on tlakatl kitlajsojtla* itlalnakayo, no ijki noneki kitlajsojtlas* isiuau. Yejuan kitlajsojtla* isiuau, sano yejua notlajsojtla.

²⁹ Xakaj nemi yejuan xkitlajsojtla itlalnakayo, yej kitlakualtia niman cuidaroua, no ijki ken Cristo kichiua para on yejuan kineltokaj,

³⁰ pampa otechtlalij ipan itlalnakayo ken tiinnakayo niman tiiomiyouan.

³¹ Ijkin tlajkuilolnestikaj ipan on Yektlajkuilojli: “Yejua ika, on tlakatl kauas itataj niman inanaj para nosentlalis iuan isiuau. Ijkon tej, on omemej nochiuaskej san se tlalnakayotl.”

³² Xtiuelij tikajsikamatij kenijki sen tlakatl niman isiuau uelij nochiuaj ken sen tlalnakayotl maski on melauak. In tej, sen ejemplo de on namiktilistli de Cristo niman on yejuan tlaneltokaj.

³³ Pero aman oksejpa nemechijlia: On tlakatl noneki kitlajsojtlas* isiuau sano ijki ken yejua notlajsojtla, niman on siuatl no noneki kitlakaitas iueuentsin.