Efesios 4 - El Nuevo Testamento

On Espíritu Santo techpiya san sekan

¹ Yejua ika, nejua yejuan nitsakutikaj pampa nitekiti para toTEKO, sanoyej* nemechtlajtlanilia para xmouikakan ken kitocaroua para kuajli nemokauaskej ken Dios omechnots para nenkichiuaskej.

² Nemejuamej maka xmoueyimatikan, yej xmonotsakan ikan yolyemanilistli*. Xmijyouilikan nochi iuan cada se ikan tetlajsojtlalistli*.

³ Xchiuakan kanika para on Espíritu Santo ma mechpiya san sekan ikan yolseuilistli yejuan san sekan mechpiyas.

⁴ Nochimej nemejuamej san se tiopan nemochiuaj itech Dios, niman san se Espíritu mechsentlalia, no ijki san se tlamachalistli* omechmakak Dios.

⁵ Nemi san se toTEKO para tinochimej, san se totlaneltok, san se tlakuatekilistli para tinochimej.

⁶ Nemi san se Dios niman san se Tajtli para nochimej. Yejua no inTEKO para nochimej. Yejua tekiti impan nochimej, niman no nemi impan nochimej.

⁷ Cristo otechmakak cada se sesekneka tetlayokoliltin ken yejua okinek yejuan techueliltia on tlen aman ueli tikchiuaj. Yejua otechmakak cada tisesentemej on tetlayokoliltin yejuan okinek para tiueliskej tiktekipanoskej Dios.

⁸ Yejua ika, on Yektlajkuilojli kijtoua: Ijkuak otlejkok ne iluikak, okinmanauijteu on yejuan tsakutikatkaj, niman okinmakateu tetlayokoliltin on tlakamej.

⁹ (¿Niman tlinon kijtosneki on ika otlejkok? Kijtosneki ika achtopa otemok ne kampa más tlatsintlan ipan in tlaltikpaktli.

¹⁰ On yejuan otemok sano yejua on yejuan otlejkok ne kampa más tlakpak de nochi cielos*, para sano yejua kitemiltia nochiuiyan ikan iEspíritu.)

¹¹ Niman on tlakamej okinmakak tetlayokolijli* de uelilistli. Sekimej okinueliltij para apóstoles*, sekimej okinueliltij para tiotlajtojkej, sekimej okinueliltij tenojnotsaskej ika on kuajli tlajtojli yejuan kiteijlia ken Dios temakixtia, oksekimej okinueliltij para pastores niman temachtijkej.

¹² Ijkon okintlalij itekitkauan para kinyektlaliskej nochimej on yejuan kineltokaj Dios para ijkon yejuamej ueliskej kitekipanoskej, niman ijki kiskaltiskej itiopan Cristo.

¹³ Ijkon kichiua hasta kaman tinochimej san se totlaneltok tikpiyaskej niman para tinochimej kuajli tikixmatiskej ikonetsin Dios. Ijkon titoskaltijtiaskej ipan tonemilis, niman hasta kuajli tichikauiskej no ijki ken Cristo.

¹⁴ Yejua ika, xok titouikaskej ken kokonej yejuan ijkuak kinmachtiaj yenkuik temachtiltin nimantsin kipatlaj intlamachilis, niman onxinij ipan tlakajkayaualistli, pampa kinkajkayauaj on tlakamej yejuan sanoyej kimatij ken tlakajkayauaskej. Yejuamej kinuikasnekij ipan on xkuajli ojtli.

¹⁵ Yej, ma tikijtokan on tlen melauak ikan tetlajsojtlalistli*, niman nochipa ma titoskaltikan ikan nochi tlen kuajli para tinemiskej ken Cristo yejuan kiyekana on tiopan.

¹⁶ Itechkopa Cristo nochimej ikoneuan Dios sasalijtokej san sekan ken sen tlalnakayotl yejuan kuajli sasalijtikaj nochiuiyan. Ijkuak cada parte itlalnakayo Cristo kuajli tekiti, nochi kuajli noskaltia niman chikajtiu ikan tetlajsojtlalistli*.

Yenkuik nemilistli itech Cristo

¹⁷ In tej, yejua nemechijlia, niman nemechmaktilia ikan itlanauatil toTEKO para maka sa xnemikan ken yejuamej on oksekimej yejuan xhebreos*. Yejuamej nouikaj ipan on yejuan sanenkaj kinejnemiliaj.

¹⁸ Kipiyaj intlamachilis yejuan xueli kuajli tlanemilia. Yejuamej xkipiyaj on nemilistli yejuan ualeua itech Dios, pampa xtlamatkej* niman yoltechikajkej.

¹⁹ Yejuamej xok kimatij tla itlaj tepinajtij. Yejua ika, kichiuaj nochi tlen xkuajli yejuan ualeua ipan intlamachilis. Ijkon tej, sanoyej kuelitaj kichiuaj nochi tlajtlamach* tlen xchipauak.

²⁰ Pero nemejuamej xomechmachtijkej itech Cristo para no ijki nenkichiuaskej.

²¹ Tla melauak onenkakkej de yejua, niman omechmachtijkej on tlen melauak, xmouikakan ipan on tlen melauak yejuan kisa itech Jesús.

²² Ijkon ken se kixtia itlaken ijkuak yotlajlouak, no ijki xkajkauakan on xkuajli nemoeleuilis* yejuan itlajkauki niman mechkajkayaua.

²³ Nemejuamej xkauilikan para kuajli ma kiyenkuilijtiu nemoyojlo niman nemotlamachilis.

²⁴ Niman ijkon ken yakaj tlakatl notlakentia ikan itlaken chipauak, nemejuamej no xmotlakentikan ika on yenkuik nemilistli. Xmelajkanemikan ken Dios yolmelajki niman yolchipauak.

²⁵ Yejua ika, maka sa xtekajkayauakan, yej cada se de nemejuamej xkijtokan on tlen melauak inuan tokniuan, pampa tinochimej tinemij ipan san se tlalnakayotl.

²⁶ Tla nenkualanij, maka xtlajtlakokan. Niman on tlauejli maka xpiyakan nochi tonajli, yej saniman xmoyoltlalikan.

²⁷ Niman maka xkauilikan on diablo* ma mechchiualti nenkichiuaskej nion achijtsin on tlen xkuajli.

²⁸ Yejuan tlachtekiya, maka sa ma tlachteki, niman ma peua tekiti. Niman ma kichiua sen tekitl yejuan kuajli para ma kipiya tlinon kinmakas on yejuan mayankej.

²⁹ Maka sa xkijtokan on xkuajli tlajtojli, yej san xkijtokan tlen kuajli yejuan kimpaleuis oksekimej noskaltis intlaneltok, niman kinmakas tlatiochiualistli on yejuan kakiskej.

³⁰ Maka xkajmanakan iEspíritu Dios yejuan yolchipauak, pampa ika on Espíritu nemejuamej omechsellarojkej para nesi ika nenikoneuan Dios hasta ipan on tonajli ijkuak Cristo totemakixtijkau yejkos para kaxiltis totemakixtilis.

³¹ Xmokixtilikan nochi tekuatotonalistli*, nochi xkuajli eleuilistli, nochi tlauejli, nochi tsajtsilistli, nochi tetejteneualistli niman nochi xekyotl.

³² Yej oksekneka xnemikan. Nemejuamej xmouikakan tenotskej niman yolyemankej iminuan oksekimej, niman xmotlapojpoluikan iminuan oksekimej ijkon ken Dios omechtlapojpoluij itechkopa Cristo.