Efesios 3 - El Nuevo Testamento

Pablo temachtia intsajlan on yejuan xhebreos*

¹ Nejua Pablo, nitsakutikaj pampa nikteijlia on kuajli tlajtojli nemotsajlan nemejuamej yejuan xnenhebreos*.

² Nikuitia ye nenkimatstokej ken Dios onechmaktilij in tekitl para nemechijlis de on iueyitetlajsojtlalis* nemejuamej yejuan xnenhebreos*.

³ Dios onechmachistij on tlen iyantikatka* ijkon ken yonemechijkuilouilij ikan keski tlajtojli.

⁴ Ijkuak nenkimomachtiskej in tlajkuilolamatl, uelis nenkimatiskej tlinon nikixmati ika on yejuan iyantikatka* itechika Cristo.

⁵ On tlen kiyantikatka Dios, xakaj okimachistij ipan okse tiempo, pero aman ikan iEspíritu Santo kinmachistia on yektitokej apóstoles* niman tiotlajtojkej.

⁶ On ichtakayotl* sano yejua in: Itechkopa on kuajli tlajtojli yejuan kiteijlia ken Dios temakixtia, on yejuan xhebreos* sano yejua herencia kiseliaj yejuan inherencia on hebreos*, niman nochiua san se tiopan. No ijki aman san sekan kiseliskej on tlen Dios okitlalij ipan ipromesa.

⁷ Dios, ikan iueyitetlajsojtlalis* niman ikan iueyipoder, onechtlalij para nikteijlia in kuajli tlajtojli yejuan kiteijlia ken Dios temakixtia.

⁸ Maski nejua xijki niueyixtikaj ken nochimej on yejuan ikoneuan Dios, yejua ikan iueyitetlajsojtlalis* onechmakak in tekitl para nikimijlis on yejuan xhebreos* de on iriquezas Cristo yejuan xakaj uelis kijtos kech ika miyek.

⁹ Dios yejuan nochi okichijchiu tlen onkaj niman nochi kech yoltikaj, onechtlalij para nikinmachistis nochimej ika ye kichijtikaj on tlen achtoj iyantikatka* desde ijkuak opeu in tlaltikpaktli hasta aman.

¹⁰ Aman intechkopa on tlaneltokakej, nochimej on ángeles ne iluikak yejuan tlayekanaj niman kipiyaj poder, uelis kixmatiskej itlamatkilis* Dios ipan nochi on sesekneka tlen onkaj.

¹¹ Dios nochi okichiu ken yokitlalijka ipan iyojlo desde yeuejkaui. Ijkon okichiu itechkopa Cristo Jesús toTEKO.

¹² Niman aman san sekan iuan Cristo xtitomojtiaj para tiknisiuiyaj Dios ikan nochi toyojlo, pampa tikneltokaj Cristo.

¹³ Nemechtlajtlanilia, maka mechyolmajxalo on tlen nikijyouiya nemopampa, pampa in nochiua para mechpaleuis.

Itetlajsojtlalis Cristo

¹⁴ Yejua ika tej, ninotlakuantelketsa ixpan iTajtsin toTEKO JesuCristo,

¹⁵ yejuan nochi kech familias yejuan nemij ne iluikak niman nikan ipan in tlaltikpaktli itech kiseliaj innemilis.

¹⁶ Niktlajtlanilia toTajtsin ma kojtili nemoalma itechkopa iEspíritu ikan ipoder yejuan kisa itech iuejueyiriquezas,

¹⁷ para Cristo ma nemi ipan nemoyojlo itechkopa nemotlaneltok. Niman niktlajtlanilia Dios para nemejuamej xmokojtilikan ipan on tetlajsojtlalistli* yejuan nenkipiyaj ken sen kojtli* yejuan uejkatlan nokiktsia ikan ineluayo, niman ken sen kajli yejuan uejkatlan peua.

¹⁸ Niman no niktlajtlanilia Dios para nemejuamej kuajli xkajsikamatikan inuan nochimej on tlaneltokaj, kech sanoyej* patlauak, niman ueyak, niman uejkatlan, niman tlakpak on itetlajsojtlalis* Cristo.

¹⁹ Tej, niktlajtlanilia Dios para nemejuamej xkixmatikan on itetlajsojtlalis*, maski xkaman uelis nochi kuajli nenkajsikamatiskej on itetlajsojtlalis*, niman para nentemiskej de nochi tlen Dios kipiya.

²⁰ Niman aman, ma tikmakakan ueyilistli Dios yejuan uelis kichiuas miyek más de on yejuan tejuamej tiktlajtlaniaj noso on yejuan tiknemiliaj, ipampa ipoder yejuan tekiti topan.

²¹ Tinochimej tlaneltokakej yejuan tinemij san seknek iuan Cristo, ¡Ma tikueyilikan Dios para nochipa! Ma ijki nochiua.