Efesios 2 - El Nuevo Testamento

Dios techmakixtia ikan iueyitetlajsojtlalis*

¹ Achtoj, nemoalmas miktoyaj ixpan Dios ipampa on tlen xkuajli onenkichijkej niman ipampa on nemotlajtlakoluan.

² Nemouikayaj ken on oksekimej tlakamej yejuan nemij ipan in tlaltikpaktli. Nenkitlakamatiyaj on xkuajli espíritu itoka diablo* yejuan kinmandaroua ikan ipoder on xkuajkualtin espíritus ne tlakpak ipan ajakatl. Yejua no aman tekiti ipan inyojlo on yejuan xkitlakamatij Dios.

³ Ipan okse tiempo, tinochimej ijkon tinemiyaj. Tiktlakamatiyaj on xkuajli toeleuilis*. Tikchiuayaj nochi tlajtlamach* tlen xkuajli yejuan kinekiya totlalnakayo niman totlamachilis. Yejua ika tej, pampa ijkon tikchiuayaj, timemiyaj ipan on temojtij iueyitlauel Dios sano ijki ken oksekimej nemij.

⁴ Pero Dios ikan iueyiteiknelilis* niman iueyitetlajsojtlalis*

⁵ okinyoliuitij toalmajtsitsiuan san sekan iuan Cristo, maski miktoyaj ixpan ipampa totlajtlakol. Dios omechmakixtij ikan iueyitetlajsojtlalis* yejuan xtechtocarouaya tikseliskej.

⁶ No ijki Dios otechkuiteu iuan Cristo Jesús, niman otechtlalij ne iluikak kampa Cristo yeuatikaj.

⁷ In okichiu para nochipa techititis ken sanoyej* ueyi iteiknelilis* niman itetlajsojtlalis* yejuan techmaka itechkopa Cristo.

⁸ Ijkon tej, Dios ikan iueyitetlajsojtlalis* yejuan xmechtocarouaya nenkiseliskej, omechmakixtij ijkuak onenkineltokakej Cristo. In temakixtilistli onenkiselijkej xpampa itlaj kuajli onenkichijkej, yej pampa Dios omechtlayokolij.

⁹ Xakaj ueli kiselia in temakixtilistli itechkopa on tlajtlamach* tlen kuajli kichiua. Yejua ika xuelis ika noueyimatis.

¹⁰ Dios otechchijchiu itechkopa Cristo Jesús para ma tikchiuakan tlajtlamach* tlen kuajli yejuan Dios desde ye uejkaui okitlalij para ma tikchiuakan.

Yolseuilistli yejuan tikpiyaj itechkopa Cristo

¹¹ Nemejuamej xonentlakatkej hebreos*. (Yejua ika on hebreos* xmechtlakaitayaj pampa xomechtlalilijkej on neskayotl itoka circuncisión* yejuan yejuamej okintlalilijkej ipan intlanakayo.)

¹² Yejua ika, xkelnamikikan ika ipan okse tiempo, nemejuamej nenxelijtikatkaj itech Cristo. No ijki nennemiyaj ken xchanejkej katkaj intech on hebreos* yejuan ikoneuan Dios, niman xnenkipiyayaj on pactos* yejuan Dios okinmakak on hebreos*. Nennemiyaj ipan in tlaltikpaktli xikan tlamachalistli* nion xnenkipiyayaj Dios.

¹³ Nemejuamej yejuan uejka nennemiyaj itech Dios, aman nennemij san sekan iuan Cristo Jesús ipampa iyesyo ijkuak omik.

¹⁴ Cristo otechyoltlaliko ijkuak otechtlalij san sekan on hebreos* inuan on yejuan xhebreos*. Okipopoloj on tlauejli yejuan katka ken sen tepantli yejuan techxelojtikatka.

¹⁵ Ipampa imikilis, okipopoloj on ley iuan itlanauatiluan para okinsentlalij san sekan on hebreos* niman on yejuan xhebreos*. Ijkon onochiu yolseuilistli intech yejuamej.

¹⁶ Itechkopa imikilis Cristo ipan on kojnepanojli, okipopoloj on tlauejli yejuan on hebreos* niman on xhebreos* okipixkej, niman san sekan onokuepkej itech Dios.

¹⁷ Cristo ouajlaj niman omechijlij on kuajli temachtijli de yolseuilistli para nemejuamej xnenhebreos* yejuan uejka nennemiyaj itech Dios, niman intech on hebreos* yejuan nisiu nemiyaj itech Dios.

¹⁸ Aman itechkopa Cristo, tla tihebreos* noso ka, tiueliskej tiaskej itech toTajtsin ikan sanno yejua Espíritu.

¹⁹ Aman tej, nemejuamej nenchanejkej. Xok nennemij ken on tlakamej yejuan san tepal chantiyaj kampa tetlalpan. Aman nennemij ken ifamilia Dios.

²⁰ Nemejuamej nemochiuaj itiopan Dios yejuan ken sen kajli yejuan onkaj ipan sen cimiento*. On cimiento sano yejua on temachtijli yejuan on apóstoles* niman on tiotlajtojkej okitlalijkej. Niman iesquineroj on cimiento* sano yejua Cristo Jesús.

²¹ Iuan Cristo on kajli kuajli sasalijtikaj, niman noskaltia para nochiua sen tiopan yektitikaj itech toTEKO.

²² Niman ijkon, nemejuamej san sekan iuan Cristo nemosentlaliaj iuan nochimej on oksekimej yejuan tlaneltokaj para nemochiuaj sen kajli kampa Dios nemi ikan iEspíritu Santo.