Efesios 1 - El Nuevo Testamento

Pablo okintlajkuiluij on tlaneltokakej ne ipan on ueyikalpan itoka Éfeso

¹ Nejua, Pablo, niiapóstol* JesuCristo pampa Dios okinek. Nikijkuiloua in tlajkuilolamatl para nemejuamej yejuan yolchipajkej itech Dios, yejuan nenchantij ne ipan on ueyikalpan itoka Éfeso, niman yejuan nochipa nenkichiuaj on tlen Cristo Jesús kineki.

² Ma Dios toTajtsin niman toTEKO JesuCristo mechmakakan inueyitetlajsojtlalis niman inyolseuilis.

Tlatiochiualistli de toTEKO Jesucristo

³ Ma tikyekteneuakan Dios, iTajtsin toTEKO JesuCristo, yejuan otechtiochiu ikan nochi sesekneka tlatiochiualistli ne iluikak. Yejua otechtiochiu pampa san sekan tinemij iuan Cristo.

⁴ Ijkuak xe onkatka in tlaltikpaktli, Dios otechtlapejpenij para tinemiskej san sekan iuan Cristo. Otechtlapejpenij para tikpiyaskej toyojlo chipauak, niman para xtikpiyaskej tlajtlakojli ne ixpan Dios.

⁵ Ijkuak xe onkatka in tlaltikpaktli, Dios ikan tetlajsojtlalistli* okitlalij iyojlo para techselis ken ikoneuan itechkopa JesuCristo ijkon ken okinek.

⁶ Ijkon okichiu para nochi tlakatl ma kiyekteneua ipampa on iueyitetlajsojtlalis* yejuan xtechtocarouaya tikseliskej itechkopa itlajsojkaKonetsin.

⁷ ItlajsojkaKonetsin okitlaxtlau ikan iyesyo totlajtlakoluan, niman aman Dios yotechtlapojpoluilij ikan iueyitetlajsotlalis.

⁸ Dios otechititij miyek iteiknelilis*, ikan nochi tlamatkilistli* niman kajsikamatilistli.

⁹ Yejua otechpanextilij ken okinek on tlen xakaj kimatiya itechkopa Cristo.

¹⁰ On tlen otechpanextilij, nochiuas ijkuak nocumpliros on tonaltin. Kemaj, Dios kisentlalis nochi tlajtlamach* yejuan okitlalij ne iluikak niman nikan ipan in tlaltikpaktli para Cristo kimandaros.

¹¹ Pampa tinemij san sekan iuan Cristo, Dios otechmakak toherencia. Ijkuak in tlaltikpaktli xe onkatka, Dios otechtlapejpenij para techmakas on herencia ken yejua okinek. Nochi tlajtlamach* tlen yejua kichiua, kichiua ken yejua kineki.

¹² Yejua ijkon okichiu para tejuamej hebreos*, yejuan achtopa otikneltokakej Cristo, ma tikyekteneuakan iueyilis.

¹³ Niman no ijki nemejuamej yejuan xnenhebreos* onenkineltokakej JesuCristo, ijkuak onenkakkej on temachtijli yejuan tlen melauak, on kuajli tlajtojli yejuan kiteijlia ken Dios temakixtia. Niman ijkuak onenkineltokakej, Dios omechsellaroj ika on Espíritu Santo yejuan omechprometerouilijka.

¹⁴ Aman, on Espíritu Santo techmelajkaititia ika melauak Dios techmakas on herencia yejuan otechprometerouilij, niman yejua kejeuas hasta on tonajli ijkuak techmakas. Yejua ijkon kichiua para tejuamej ma tikyekteneuakan iueyilis.

Pablo kitlajtlanilia Dios ma kinmaka tlamatkilistli on Efesios

¹⁵ Nejua nikmati ika nemotlaneltok nenkipiyaj itech toTEKO Jesús, niman nenkipiyaj nemotetlajsojtlalis* itech on yejuan kineltokaj Dios.

¹⁶ Yejua ika, xnikajkaua ika nikmaka tlaxtlauijli Dios nemopampa. Nemechelnamiki ipan nooración,

¹⁷ niman niktlajtlanilia iDios toTEKO JesuCristo, on toueyiTajtsin, para ma mechmaka itechkopa on Espíritu Santo tlamatkilistli niman kajsikamatilistli para más kuajli nenkixmatiskej.

¹⁸ No niktlajtlanilia Dios ma kuajli mechtlamachilisti para nenkajsikamatiskej on tlamachalistli* yejuan nenkiseliskej, niman ken sanoyej* ueyi herencia yejuan Dios kinmaka on yejuan tlaneltokaj.

¹⁹ No niktlajtlanilia para xmatikan ken sanoyej ueyi ipoder on yejuan ika nochi techpaleuiya tejuamej yejuan titlaneltokaj. Xakaj ueli kimati kech ika ueyi on poder. In ueyi poder sano yejua on yejuan Dios okitekitiltij

²⁰ ijkuak okiyoliuitij* niman okuiteu Cristo ipan itlalkon, niman okitlalij iyekmakopa ne iluikak.

²¹ Aman Cristo kinmandaroua nochimej on yejuan tlayekankej, on yejuan tekiuajkej, on yejuan kipiyaj poder, niman on yejuan uejueyixtokej. Itokatsin Cristo, más sanoyej ueyixtikaj xken nochimej on yejuan uejueyixtokej ipan in tonaltin niman no ipan on tonaltin uajlas.

²² Dios nochi yokimaktilij Cristo para kimandaros. Niman no okitlalij Cristo intlayekankau nochimej on tlaneltokakej yejuan nochiuaj itiopan.

²³ Niman itiopan sano yejua icuerpo Cristo. Yejua kitemiltia on icuerpo ikan iEspíritu sano ijki ken on iEspíritu nemi nochiuiyan.