Colosenses 4 - El Nuevo Testamento

¹ Tetekouan, xchiuakan ken kitocaroua inuan nemoesclavos. Xkelnamikikan ika nemejuamej no nenkipiyaj nemoTEKO yejuan nemi iluikak.

² Xchiuakan oración, niman ipan nemooración kuajli xpiyakan nemotlamachilis. Niman maka xkelkauakan para nenkimakaskej tlaxtlauijli Dios.

³ No xchiuakan oración topampa para Dios ma kinyolmatoka on tlakamej para uelis tikinnojnotsaskej ikan itemachtil Cristo on tleniyantikatka* para on tlakamej. Aman nitsakutikaj pampa nitenojnotsa ika itemachtil Cristo.

⁴ Xchiuakan oración para kuajli ma niktemelajkaijli on temachtilistli ken noneki nikchiuas.

⁵ Xmouikakan ken tlamatkej* inuan on yejuan xtlaneltokaj, niman maka xkixpolokan tiempo.

⁶ Noneki nochipa nenteyeknojnotsaskej niman nemotlajtol ma yemanki para kuelkakiskej. Niman no noneki nenkimatiskej kenijki nenkinankiliskej cada se.

Sa ika nochi tetlajpalouilistli

⁷ Totlajsojkaikniu Tíquico, yejuan nochipa kuajli kitekipanoua Dios, niman nechpaluiya, yejua mechtlajtlajtouilis kenijki nopan nochiua.

⁸ Yejua niktitlani para mechonijlis kenijki tinemij niman para mechonyoleuas.

⁹ Iuan yejua no yau totlajsojkaikniu Onésimo. Yejua melauak kineltoka Dios ikan nochi iyojlo, niman yejua sen nemochanejkau. Yejuamej mechijliskej nochi tlinon nochiua nikan.

¹⁰ Aristarco, nocompañero yejuan iuan nitsakutikaj, niman Marcos, iprimo Bernabé, mechtlajpalouaj. Nemejuamej yonenkiselijkej tlanauatijli para kenijki nenkiseliskej Marcos. Tla yau mechonnotsa, xselikan kuajli.

¹¹ No ijki mechtlajpaloua Jesús, on yejuan no itoka Justo. Yejuamej in yeyimej san yejuamej hebreos* yejuan nouan tekitij ipan itekiu Dios, niman yejuamej nechyoltlaliaj.

¹² No ijki mechtlajpaloua Epafras yejuan nemochanejkau niman itekipanojkau Cristo. Yejua nochipa sanoyej kitlajtlanilia Dios para nemejuamej xmelajkanemikan niman xchijchikajtiakan ipan nemotlaneltok, niman para kuajli nenkimatiskej on tlen Dios kineki para nenkichiuaskej.

¹³ Nemechmachistia ika yejua sanoyej notekimaka nemopampa, niman no impampa on yejuan nemij ne ipan on uejueyikalpanmej Laodicea niman Hierápolis.

¹⁴ Lucas totlajsojkatepajtijkau niman Demas mechtlajpalouaj.

¹⁵ Xkintlajpalokan on tokniuan yejuan nemij ipan on ueyikalpan Laodicea, niman on tokniu siuatl Ninfas, niman on tokniuan yejuan nosentlaliaj ichan.

¹⁶ Ijkuak nemejuamej yonenkimomachtijkej in tlajkuilolamatl, xchiuakan para on tokniuan yejuan nosentlaliaj ipan on tiopan de Laodicea no ma kinomachtikan. Niman no xmomachtikan on tlajkuilolamatl yejuan oniktitlanilijka on tiopan de Laodicea.

¹⁷ Ijkin xkijlikan Arquipo: “Xchiua kanika para kuajli titlamis nochi on itekiu toTEKO yejuan omitsmaktilij.”

¹⁸ Nejua Pablo, onikijkuiloj in tetlajpalouilistli ikan nejua noma. Xkelnamikikan ika nitsakutikaj. Ma Dios mechmaka iueyitetlajsojtlalis*. Ma ijki nochiua.