Colosenses 3 - El Nuevo Testamento

¹ Pampa Dios omechyoliuitij niman omechkuiteu iuan Cristo, xtejtemokan nochi tlajtlamach* riquezas yejuan onkaj iluikak kampa Cristo yeuatikaj iyekmakopa Dios ikan ueyilistli.

² Xtlanemilikan itech on tlajtlamach* yejuan onkaj ne iluikak, niman maka yejuan onkaj nikan ipan in tlaltikpaktli,

³ pampa onenmikkej iuan Cristo. Aman nenkipiyaj nemonemilis iyantikaj iuan yejua yejuan nemi san sekan iuan Dios.

⁴ Cristo sano yejua nemonemilis, niman ijkuak yejua nopanextis, ijkuakon nemejuamej no nemopanextiskej iuan yejua. Niman no iuan nenkipiyaskej iueyilis.

On nemilistli yejuan yopanok niman on yenkuik nemilistli

⁵ Yejua ika tej, xpopolokan nochi tlen xkuajli nemotech onkaj yejuan kisa ipan in tlaltikpaktli. Maka yakaj ma auilnemi. Xkixtikan nochi on tlen xchipauak ipan nemonemilis. Maka xkauilikan nemoeleuilis* ma mechyekana, nion maka xnejnekikan on yejuan tlen xkuajli, nion maka xnekikan nochi nenkimoyaxkatiskej. Tla nenkinekij nochi nenkimoyaxkatiskej, on sano ijki ken nenkimauistiliskiaj on ídolos.

⁶ Yejua ika, ipampa in tlajtlamach*, uajlau on itlauel Dios intech on yejuan xkitlakamatij.

⁷ Nochi in nemejuamej no nenkichiuayaj ipan nemonemilis yejuan yopanok.

⁸ Pero aman xkajkauakan nochi in tlajtlamach*: tlauejli, tlaueltsajtsilistli, tlauijuikaltilistli, xompayejyeualistli, niman xkuajli kamanajli.

⁹ Maka xmokajkayauakan iuan oksekimej, pampa nemonemilis yonenkipatlakej. Xok nennemij nion nemouikaj ken achtoj nemouikayaj.

¹⁰ Aman yonenkiselijkej yenkuik nemilistli, niman Dios kiyenkuilijtiu hasta nokauas ken yejua tlacha para kuajli nenkixmatiskej. Niman on yenkuik nemilistli nochijtiu ken on akin okichijchiu.

¹¹ Imintech on yejuan kipiyaj in yenkuik nemilistli, xok nesi akinon xhebreo* noso hebreo, nion akinon okiselij on circuncisión* ipan itlalnakayo noso ka, nion akinon xchanej, noso yejuan ken yolki yejuan xitlaj kimati, nion esclavo, noso xesclavo. Yejua in melauak, pampa Cristo kinyekana nochimej on yejuan yenkuik innemilis, niman yejua nemi impan nochimej yejuamej.

¹² Dios mechtlajsojtla* niman yomechtlapejpenij. Yejua ika tej, xmouikakan ikan teiknelilistli*, yolkuajlilistli, yolyemanilistli*, kuajli tenotsalistli, niman ikan ijyouilistli.

¹³ Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia, ijkon ken Cristo omechtlapojpoluij.

¹⁴ In yejua más ueyi kijtosneki, xmotlajsojtlakan* iuan oksekimej, pampa on tetlajsojtlalistli* yejua más kuajli kichiua para melauak notlajsojtlalo.

¹⁵ Niman xkauilikan on yolseuilistli yejuan Cristo mechmaka ma mechyekana ipan nemoyojlo, pampa yejua ika Dios omechnots para nennemiskej ipan san se tlalnakayotl. Niman xpiyakan tetlajsojkamachilistli.

¹⁶ Xselikan nochi itemachtil Cristo ipan nemoyojlo. Xmomachtikan niman xmoyoleuakan iuan oksekimej ikan nochi tlamatkilistli*. Xmokuikatikan itech Dios ikan tlaxtlauijli ipan nemoyojlo. Xmokuikatikan salmos, himnos niman coros de yekteneualistli itech Dios.

¹⁷ San tlinon yejuan nenkichiuaskej noso nenkijtoskej, xchiuakan nochi ikan itokatsin toTEKO Cristo, niman xmakakan tlaxtlauijli Dios itechkopa Cristo.

On ken noneki kiyekanaskej innemilis on tlaneltokakej

¹⁸ Siuamej, cada se de nemejuamej xtlakamatikan nemoueuentsin. In yejua noneki nenkichiuaskej pampa nentlaneltokaj itech toTEKO.

¹⁹ Tlakamej, cada se de nemejuamej xtlajsojtlakan* nemosiuau niman maka xkintlajtlauelitakan.

²⁰ Kokonej, nochi ika xkintlakamatikan nemotajuan, pampa in yejua kipaktia toTEKO.

²¹ Tatajtin, maka xkinkuajkualanikan nemokoneuan, para maka najmanaskej hasta kampa yolajsiskej.

²² Esclavos, nochi ika xkintlakamatikan nemotlaltikpaktekouan. Maka xkintlakamatikan san ijkuak yejuamej mechitstiaskej para yejuamej mechijliskej ika nenkuajkualtin. Yej, xkintlakamatikan ikan nochi nemoyojlo, pampa nenkitlakaitaj toTajtsin.

²³ San tlinon yejuan nenkichiuaskej, xchiuakan ikan kuajli nemoyojlo ken nenkichiuaskiaj para toTEKO niman xpara on tlakamej.

²⁴ Ijkon xchiuakan, pampa nenkimatstokej ika toTEKO mechmakas sen herencia. Nemejuamej nenkitekipanouaj Cristo yejuan melauak toTEKO.

²⁵ Pero yejuan kichiua tlen xkuajli kiselis itlaxtlauil de on tlen xkuajli okichiu, pampa Dios xkichikoita* se tlakatl iuan okse.