Colosenses 1 - El Nuevo Testamento

Pablo okintlajkuiluij on tlaneltokakej de on iueyikalpan Colosas

¹ Nejua, Pablo, niiapóstol* JesuCristo pampa Dios ijki okinek. Nejua niman tokniu Timoteo

² temechtlajpalouaj ompa on Colosas nemejuamej yejuan nenyolchipajkej niman nenmelajkanemij ipan on tlaneltoktli itech Cristo. Ma Dios toTajtsin mechtiochiua niman ma mechmaka iyolseuilis.

Pablo okichiu oración impampa on tlaneltokakej

³ Nochipa tikmakaj tlaxtlauijli Dios, iTajtsin toTEKO JesuCristo, ijkuak tikchiuaj oración nemopampa.

⁴ Tikmakaj tlaxtlauijli pampa otikakkej ika on nemotlaneltok nenkipiyaj itech Cristo Jesús, niman on nemotetlajsojtlalis* nenkimpiyaliaj nochimej on yejuan yolchipajkej.

⁵ Nenkipiyaj in tlaneltoktli niman tetlajsojtlalistli* pampa nenkimachaj* on tlen yejyejtikaj para nemejuamej ne ipan iluikak. Opeu nenkipiyaj in tlamachalistli* ijkuak onenkakkej on melauak kuajli tlajtojli yejuan kiteijlia ken Dios temakixtia

⁶ yejuan oyejkok nemotech. Nochiuiyan ipan in tlaltikpaktli más miyek tlakatl yokiselij Cristo ipampa in temachtijli. Ijkon onochiu nemotsajlan desde onenkakkej niman onenkajsikamatkej ika melauak Dios mechmaka iteiknelilis*.

⁷ Yejua in omechmachtij on totlajsojkaEpafras yejuan kuajli tlapaleuijketl de Cristo, niman tekiti nemouan topampa.

⁸ Yejua otechijlij ika sanoyej* nemotlajsojtlaj ijkon ken on Espíritu Santo mechititia.

⁹ Yejua ika, desde on tonajli ijkuak otikakkej de nemotlaneltok niman nemotlajsojtlalis, xtikajkauaj para tikchiuaj oración nemopampa. Tiktlajtlaniliaj Dios ma mechpaleui nenkimatiskej nochi on tlen kineki para nenkichiuaskej itechkopa on tlamatkilistli* niman kajsikamatilistli yejuan kisa itech on Espíritu Santo.

¹⁰ Ijkon tiktlajtlaniliaj Dios para nenueliskej nenkitlakaitaskej niman nenkipaktiskej toTEKO ikan nemonemilis. Nenueliskej nenkichiuaskej nochi tlajtlamach* tlen kuajli, niman cada mojmostla más kuajli nenkixmatiskej Dios.

¹¹ No tiktlajtlaniliaj Dios para nenkipiyaskej yolchikaualistli ikan nochi iueyi poder, para ijki uelis nenkixikoskej nochi tlajtlamach* ikan miyek ijyouilistli niman pakilistli.

¹² Nenkimakaskej tlaxtlauijli toTajtsin, pampa omechmelajkatlalij para nenkiseliskej on herencia inuan nochimej on yolchipajkej ne ipan iluikak kampa tlauilpan.

¹³ Yejua otechkixtij itech ipoder Satanás kampa tlamandaroua ipan tlayouajlotl, niman otechtlalij kampa tlamandaroua itlajsojkaKonetsin,

¹⁴ yejuan okitlaxtlau nochi totlajtlakol, niman otechtlapojpoluij.

Itechkopa imikilis Cristo tikpiyaj yolseuilistli iuan Dios

¹⁵ Cristo on iKonetsin Dios, yejua okipantlantiko kenijki nemi Dios yejuan xnesi inemilis kenijki onkaj. Niman Cristo yejua nemi desde ijkuak nochi tlen onkaj, xe onkatka.

¹⁶ Itechkopa Cristo, Dios okichijchiu nochi tlen onkaj ne iluikak niman nikan ipan tlaltikpaktli, on yejuan tikitaj niman on yejuan xtikitaj. Niman itechkopa Cristo, Dios okintlalij espíritus yejuan kipiyaj poder, tekiuajyotl, niman tlamandarouaj. Dios okichijchiu nochi tlajtlamach* itechkopa Cristo, niman okichijchiu nochi tlajtlamach* no para Cristo.

¹⁷ Cristo ye nemiya ijkuak nochi tlajtlamach* xe onkatka, niman yejua ipampa nochi tlajtlamach* kuajli onkaj.

¹⁸ No ijki, Cristo yejua tlayekanketl intech on yejuan tlaneltokaj yejuan nochiuaj itiopan. Niman yejua kinmaka nemilistli on yejuan nochiuaj itiopan. Yejua, yakatstikaj de nochi. No ijki yejua achtoj onokuiteu ipan itlalkon para yakatstikaj ipan nochi tlajtlamach* tlen nemi niman tlen onkaj.

¹⁹ Dios ikan paktli okitlalij ipan Cristo, nochi tlen yejua ika tentikaj.

²⁰ Itechkopa iyesyo Cristo yejuan okitoyau ijkuak omik ipan kojnepanojli*, nochi tlajtlamach* tlen onkaj niman tlen nemi, nikan ipan in tlaltikpaktli niman iluikak, san sekan okitlalij ikan yolseuilistli.

²¹ Ipan okse tiempo, nennemiyaj ken xnenchanejkej niman ken nentlaueliknijtin katkaj iuan Dios ipampa on tlajtlamach* tlen xkuajli nenkichiuayaj niman nenkinemiliayaj.

²² Pero aman Dios omechtlalij yejua itech ikan yolseuilistli ipampa imikilis itlalnakayo Cristo. Ijkon okichiu para mechpiyas chipajkej ixpan, yejuan xitlaj* mancha kipiyaj niman xikan ixkomakalistli.

²³ Pero in san nochiuas tla melauak yonenkineltokakej Cristo niman xkaman nenkauaj nemotlaneltok. Niman no noneki nochipa nentlamachaskej itech on kuajli tlajtojli yejuan kiteijlia ken Dios temakixtia yejuan onenkakkej. Yejua in kuajli tlajtojli noteijlia nochiuiyan imanian in tlaltikpaktli. Niman nejua Pablo yejua niknotekimaka para nikteijlia.

Itekiu Pablo para on yejuan tlaneltokaj

²⁴ Aman sanoyej nipaki ika on tlen nemopampa nikijyouiya. Aman ikan notlalnakayo nikajxitijtias on tlajyouilistli yejuan kijyouiya Cristo impampa on tlaneltokakej yejuan nochiuaj itiopan.

²⁵ Dios onechtlalij ken itekitkau para nemechpaleuis nemejuamej yejuan xnenhebreos*. Yejua onechmakak para nemechijlis nochi itemachtil,

²⁶ yejuan iyantikatka* para nochi tlakatl. Pero aman Dios okipantlantij intech on iyolchipakauan.

²⁷ Dios okinek okimpanextijlij yejuamej on tlen kichtakapiyaya, para ma kimatikan ika on sanoyej kuajli tlajtlamach* yejuan kipiya para on yejuan xhebreos*. Niman on tlen iyantikatka* sano yejua Cristo yejuan nemi ipan cada se de nemejuamej. In kijtosneki ika Dios mechmaka se parte de on iuelis yejuan kipiya.

²⁸ Tejuamej titenojnotsaj itechkopa Cristo. Tikintlakanonotsaj nochimej, niman tikinmachtiaj cada se ikan nochi totlamatkilis* para tikinmajxitiskej kuajkualtin ixpan Cristo.

²⁹ Yejua ika in sanoyej nitekiti. Nikchiua kanika ika nochi chikaualistli yejuan Cristo ikan ipoder nechmaka.