2 Timoteo 4 - El Nuevo Testamento

¹ Ixpan Dios niman toTEKO JesuCristo, yejuan kinyolkuitis niman kintlajtlakolmakas on yejuan nemij niman on yejuan mikatsitsimej, ijkuak uajlas niman tlamandaros ken Rey, nimitsnauatia

² xteijli on kuajli tlajtojli. Xchiua ijkuak on tlakamej kinekiskej kakiskej niman ijkuak xkinekiskej. Xteselilti on kuajli tlajtojli, xteajua niman xteyoleua ikan nochi ijyouilistli niman tlamachtijli,

³ pampa yejkos on tonajli ijkuak on tlakamej xok kuelkakiskej on chipauak temachtijli. Ijkuakon, yejuamej kinekiskej kinkakiskej miyekej temachtijkej para ma kinmachtikan on tlen yejuamej kinekiskej ika inyoltechikaualis.

⁴ Kitlalkauiskej on tlen melauak, yej más kinekiskej kakiskej on tlajtlamach* cuentojtlajtoltin yejuan kixnamikij on tlen melauak.

⁵ Pero tejua nochipa xpiya on kuajli tlamachilistli, xxiko on tlajyouilistli, xpiya moyojlo para tikteijlis on kuajli tlajtojli yejuan kiteijlia kenijki Dios temakixtia, niman kuajli xchiua motekiu.

⁶ Aman yoyejkok tiempo para nechtemakaskej itech Dios ken sen uentli. Aman ye nisiu para nimikis.

⁷ Ye kuajli yonikchiu kanika ipan itekiu Dios no ijki ken sen tlakatl ijkuak teuan notlatlani ipan sen tlaksalistli*. Aman yonitlan itekiu Dios niman nochipa onikejeu on tlaneltoktli.

⁸ Aman sa nikcha notlaxtlauil, on corona de tetlanilistli yejuan nechtocaroua nikselis, yejuan toTEKO on Juez yolchipauak nechmakas ipan on tonajli. Ipan on tonajli xsan nejua nechmakas, yej no kinmakas nochimej on yejuan ikan paktli kimachaj on tonajli ijkuak uajlas Cristo.

Sa ika nochi tlajtojli para Timoteo

⁹ Xchiua kanika para saniman xnechitaki

¹⁰ pampa Demas más okeleuij tlen onkaj ipan in tlaltikpaktli, niman yejua ika yonechtlalkauij. Yejua yoyaj Tesalónica, Crescente oyaj Galacia niman Tito Dalmacia.

¹¹ Lucas san yejua nouan nikan nemi. Ijkuak tiuajlas, xkuajuika Marcos, pampa yejua uelis nechpaleuis ipan notekiu.

¹² Tíquico oniktitlan ne ueyikalpan Éfeso.

¹³ Ijkuak tiuajlas, xkuajki nocapa yejuan onikau ne Troas ichan Carpo, niman noamamoxuan, niman más nikneki on nomimilamauan intoka pergaminos.

¹⁴ Alejandro, on yejuan kitekiti tepostli, onechchiuilij miyek tlen xkuajli. ToTEKO kitlaxtlauilis nochi tlinon yejua okichiu.

¹⁵ Tejua xmocuidaro de yejua, pampa yejua sanoyej* yokitlauelitak totemachtil.

¹⁶ Ipan on noachtojmanauilis yejuan onipix intech on uejueyitekiuajkej, xakaj onechpaleuij. Yej nochimej onechtlalkauijkej. Niknekiskia maka Dios kincastigaro pampa ijkon onechchiuilijkej.

¹⁷ Pero toTEKO xonechtlalkauij. Yejua onechmakak chikaualistli para ouel onikteijlij nochi on kuajli tlajtojli yejuan kiteijlia ken Dios temakixtia, niman onikchiu para ma kaki nochi tlakatl yejuan xhebreos*. Ijkon toTEKO onechmakixtij ikamak on león.

¹⁸ Niman yejua nechmakixtis itech nochi tlen xkuajli, niman nechejeuas para ninemis ne iluikak kampa Cristo tlamandaroua. ¡Yejua ma kipiya ueyilistli para nochipa! Ma ijki nochiua.

Tlajpalouilistli niman tlatiochiualistli

¹⁹ Xtlajpalo Prisca niman Aquila, niman ifamilia Onesíforo.

²⁰ Erasto onokau ne Corinto, niman Trófimo onikau kualo ne Mileto.

²¹ Xchiua kanika para xuajla chika xe ajsi invierno ijkuak seua. Mitstlajpalouaj Eubulo, Pudente, Lino, Claudia niman nochimej tokniuan.

²² Ma toTEKO JesuCristo mouan nemi, niman ma Dios mechtiochiua nemochimej*. Ma ijki nochiua.