2 Timoteo 3 - El Nuevo Testamento

On tlakamej sanoyej xkuajli nouikaskej ijkuak nisiu tlatlalpoliuis

¹ No noneki tikmatis ika ijkuak nisiu tlatlalpoliuis tlamach nochiuas tlen sanoyej* xkuajli.

² On tlakamej ijkin nouikaskej: sanoyej notlajsojtlaskej sano yejuamej, sanoyej tominnekiskej, noueyimatiskej, xkitlakaitaskej Dios, xkintlakamatiskej intajuan, xitlaj* kitlajsojkamatiskej, niman sanoyej xompayejyeuaskej.

³ Xkintlajsojtlaskej* oksekimej nion xteikneliskej, chakuamej yeskej, xkiteltiskej iminxkuajlieleuilis, sanoyej xipanteitaskej niman xitlaj* kuelitaskej tlen kuajli.

⁴ Teichtakauiskej, xnomojtiskej itlaj kichiuaskej, noueyimatiskej, sanoyej kinekiskej nopaktiskej, niman xkinekiskej kipaktiskej Dios.

⁵ Nochiuaskej ken kineltokaj Dios, pero ika on tlen kichiuaj nesi ika xnejli kineltokaj. Maka inuan xmouika kennomej.

⁶ Sekimej de yejuamej kalakij techajchan niman ikan intemachtil kinkajkayauaj on siuajmej yejuan xkojtikej niman tlajtlakouaj, niman imineleuilis* kinchiualtia kichiuaj tlajtlamach* tlen xkuajli.

⁷ In kenimej siuamej nochipa nomachtiaj para kajsikamatiskej itlaj yenkuik, pero xkaman uelij kajsikamatij on tlen melauak.

⁸ No ijki ken on nanaualtin Janes niman Jambrés okixnamikej Moisés, yejuamej in tlakamej no ijki kixnamikij on tlajtojli tlen melauak. Intlamachilis noijtlakoua, xitlaj* kimatij itech ika on tlaneltoktli.

⁹ Pero xuejka yaskej ika intemachtil, pampa nochi tlakatl kimatis ika yejuamej xkuajli tlanemiliaj, ijkon ken impan onochiu on omemej yejuan okixnamikej Moisés.

Sa ika nochi tlanauatijli de Pablo para Timoteo

^10-11 Pero tejua kuajli tikmatstikaj notemachtil kenijki ninoyekana, on tlinon nikneki nikchiuas, notlaneltok, noijyouilis, notetlajsojtlalis, tlinon nejua nikxikoua, niman on tlaueltotokalistli yejuan nikijyouiya. Tikmatstikaj nochi tlen nopan onochiu ne ipan on uejueyikalpan Antioquía, Iconio niman Listra, niman nochi tlajyouiltilistli onikijyouij. Pero toTEKO onechmakixtij itech nochi on.

¹² No ijki nochimej kintlauelitaskej niman kintlajyoulitiskej on yejuan kinekiskej nouikaskej yolchipajkej itech Cristo Jesús.

¹³ Niman on yejuan xkuajkualtin tlakamej niman tlakajkayajkej tlakamej, inyojlo más ijtlakautias. Tlakajkayauaskej niman sano yejuamej yokinkajkayajkej.

¹⁴ Pero tejua xtlakamati nochipa melajki tlinon omitsmachtijkej niman on tlen tikneltoka, pampa tejua tikmatstikaj akinomej omitsmachtijkej.

¹⁵ Niman desde tikonetl, tikixmati on iYektlajkuilol Dios yejuan uelis mitstlamachilistis niman mitsuikas itech on temakixtilistli itechkopa motlaneltok itech Cristo Jesús.

¹⁶ Nochi Yektlajkuilojli itech Dios ualejtikaj, niman yejua otechmakak para aman techpaleuiya. On Yektlajkuilojli techmachtia on tlen melauak, techchikajkanotsa, kiyektlalia on tlen xkuajli, niman temachtia kenijki onyas sen nemilistli melajki.

¹⁷ On Yektlajkuilojli onkaj para sen tekoneu itech Dios ma ueltiu niman ma noyektlalijtiu para kichiuas nochi tlen kuajli.