2 Timoteo 2 - El Nuevo Testamento

Sen kuajli soldado de JesuCristo

¹ Tejua nokoneu Timoteo, xmoyolchikaua ika on ueyitlajsojtlalistli* yejuan toyaxka* pampa aman san sekan tinemij iuan Cristo Jesús.

² On tlen yotinechkakilij imixpan miyek testigos, xkinnauati on tlakamej yolmelajkej yejuan uelij kuajli temachtiaj para yejuamej ma temachtikan.

³ Tejua tej, xkijyoui tlajtlamach* tlajyouilistli ken se kuajli soldado itech JesuCristo.

⁴ Xkuajli para on yejuan tekiti ken sen soldado tlamach ika nokalaktis, pampa ika onkaj kimpaktis on uejueyixtokej. Yejua ika, okitlapejpenij on tekitl de soldado para kichiuas.

⁵ No sano ijki, on yejuan teuan notlatlani xuelis kiselis ipremio tla yejua xkuajli kichiua on notlatlanilistli.

⁶ No ijki on yejuan tekiti ikan miltekitl, yejua kitocaroua achtoj kiselis on tlen yotlak.

⁷ Kuajli xnemili tlinon nimitsijlia, niman toTEKO mitspaleuis para tikajsikamatis nochi.

⁸ Xkelnamiki nochipa JesuCristo, ika yejua teuejkakoneu itech rey David niman ika yejua okitôkakej* niman onokuiteu oksejpa ijkuak yomikka. Ijkon ken kijtoua on kuajli tlajtojli yejuan nitemachtia.

⁹ Niman pampa nikteijlia in kuajli tlajtojli, nikijyouiya tlajtlamach* hasta ika nechtsajtsakuaj ken yakaj on tlakatl xompayejyeua. Pero itlajtoltsin Dios xuelij kitsakuaj.

¹⁰ Ijkon tej, impampa on yejuan Dios okintlapejpenij, nikijyouiya nochi tlajtlamach* para yejuamej ma kiselikan temakixtilistli. In temakixtilistli techmaka pakilistli para nochipa, niman tikseliaj ijkuak tinemij san sekan iuan Cristo Jesús.

¹¹ In tlajtojli sanoyej* melauak: Tla iuan yotimikkej, no ijki iuan tinemiskej.

¹² Tla titlajyouiskej, no tiueliskej titlamandaroskej iuan Cristo. Tla tiknenekiskej* Cristo, yejua no technenekis.

¹³ Tla tikijneuaj ipan totlaneltok, Cristo sanken* ikan kuajli iyojlo kichiuas on tlen yokijtoj, pampa Cristo xkaman uelis sano yejua notlajtolkuepas.

Timoteo noneki nochiuas sen kuajli tekitketl

¹⁴ Xkinmelnamikti in tlajtlamach* niman xkinchikajkanauati ixpan toTEKO, para maka itlaj ika ma nokamauijsokikan. In xitlaj* ika kimpaleuiya, yej kintlamachilispoloua* on yejuan kikakij on kamauijsokilistli.

¹⁵ Xchiua kanika para kuajli tonixnesis ixpan Dios ken sen kuajli tekitki, yejuan xitlaj* ika pinaua ipan itekiu pampa kuajli melajki kiteijlia in tlajtojli tlen melauak.

¹⁶ Maka xtekitilti kamanajli nion maka xtlajtlajto ika on tlajtoltin yejuan xitlaj* kijtosneki yejuan kitekitiltiaj on tlaltikpaktlakamej, pampa ijkon kichiuaj más saniman onxinij ipan on tlen xkuajli.

¹⁷ Niman on tlen kitemachtiaj ueyikatias ken se temojtij kualolistli itoka cáncer yejuan noskaltia ipan tonakayo hasta techmiktia. Ijkon impan onochiu Himeneo niman Fileto

¹⁸ yejuan yonoxelojkej itech on tlen melauak. Yejuamej kijtouaj ika Dios yokinyoliuitij niman yokinkuiteu on mikatsitsimej, niman ika in kimpopolouaj ipan intlaneltok sekimej tlaneltokakej.

¹⁹ Pero Dios yokitlalij on tlen melauak yejuan kojtitikaj ken itlaj cimiento* de tepantli. Niman ipan on cimiento* kipiya in kuajli tlajtojli: “ToTEKO kimixmatstikaj yejuan melauak iyaxkauan”, niman “Nochimej on yejuan kineltokaj niman kimauistiliaj toTEKO noneki ma kajkauakan on tlen xkuajli.”

²⁰ Ipan sen kajli ueyi kampa tlayejyeualo onokej seseknekamej trastes: onokej yejuan tlachijchijtin ikan oro, de plata niman no onokej yejuan de kojtli* niman de sokitl. On yejuan de oro niman de plata ika tlakajtli kintekitiltiaj para itlaj iluitl pero on yejuan de kojtli* niman de sokitl mojmostla kitekitiltiaj.

²¹ No ijki, tla sen tlakatl nochipauas, yejua petlanis ken on tlajtlamach* tlachijchijtli ikan oro yejuan iteko kixeloua niman kitekitiltia ipan se tekitl yejuan ueyixtikaj, pampa yejua uelis tekitis ipan nochi tlen kuajli.

²² Xtlalkaui inxkuajlieleuilis on telpokamej. Tejua xtejtemo on tlen melajki, tlaneltoktli, tetlajsojtlalistli* niman yolseuilistli. Ijkon xchiua inuan nochimej on yolchipajkej yejuan kinotsaj toTEKO JesuCristo.

²³ Maka teuan xkamauijsoki ika on tlen xitlaj* kijtosnekij. Ye tikmatstikaj ika ompa peua nokuajkualaniua.

²⁴ Sen itekitkau toTEKO xkitocaroua teuan nokualanijtinemis, yej kemaj, kuajli tenotski yes iuan nochi tlakatl. Yejua noneki uelis temachtis, niman no ijki kijyouis tlajtlamach* yejuan ipan nochiuas.

²⁵ Ikan yolyemanilistli* ma kinmelajkatlali on yejuan xipanteitaj. Kas Dios kichiuas para noyolpatlaskej niman ijkon kixmatiskej tlen melauak.

²⁶ Tla ijkon, tlamachilistlachaskej niman nomanauiskej itech on diablo* yejuan kinnoyaxkatia niman kinchiualtia ma kichiuakan tlen yejua kineki.