2 Timoteo 1 - El Nuevo Testamento

Pablo okitlajkuiluij Timoteo

¹ Nejua, Pablo, niiapóstol* JesuCristo. Dios onechajtitlan pampa yejua okinek para nikteijlis de on yenkuik nemilistli yejuan Dios otechprometerouilij yejuan tikpiyaj ijkuak tinemij san sekan iuan Cristo Jesús.

² Nimitstlajpaloua notlajsojkakoneu Timoteo, nikijkuiloua in tlajkuilojli para tejua. Nimitsnekilia ma Dios toTajtsin niman toTEKO JesuCristo mitsmakakan, inueyitetlajsojtlalis*, inteiknelilis*, niman inyolseuilis.

Pablo kimaka tlaxtlauijli Dios

³ Nochipa nimitselnamiki ipan nooración ikan tonajli niman ikan yeuajli. Nikmaka tlaxtlauijli noDios akin niktekipanoua ikan nochipajkatlamachilis, ken on nouejkatajuan okichijkej.

⁴ No ijki nochipa nikelnamiki ken tichokaya, niman aman niknekiskia ma nimitsitstetsi para sanoyej* nipakis.

⁵ Nikelnamiki ken kuajli titlaneltoka ika se moyojlo ijkon ken moabuelita Loida niman monanaj Eunice okipixkej achtopa. Aman kuajli nikmatstikaj ika no ijki tikpiya.

⁶ Aman tej, nimitselnamiktia para xtekitilti on tetlayokolijli* yejuan Dios omitsmakak ijkuak mopan onikintlalij nomauan.

⁷ Ijkon xchiua, pampa Dios xotechmakak sen espíritu de nemojtijli, yej otechmakak on espíritu de poder de tetlajsojtlalistli* niman para ma tikteltikan toxkuajli eleuilis*.

⁸ Yejua ika, maka xpinaua para titenojnotsas itechkopa toTEKO JesuCristo, nion notechkopa yejuan nitsakutikaj san ipampa. Yej no xseli in tlajyouilistli yejuan uajlau san ipampa in kuajli tlajtojli. Niman xmatstia ika Dios techyolchikauas ijkuak tikseliskej on tlajyouilistli.

⁹ Dios otechmakixtij niman otechnots para tikpiyaskej sen nemilistli chipauak. Ijkin okichiu xpampa tla tejuamej itlaj kuajli otikchijkej, yej pampa ijki okinek niman otechmakak iueyitetlajsojtlalis*. Yejua otechmakak in tetlajsojtlalistli* itech Cristo Jesús achtoj ijkuak xe onkatka in tlaltikpaktli.

¹⁰ Pero in teiknelilistli* okipantlantij ijkuak ouajlaj toTemakixtijkatsin JesuCristo. Yejua okixoxotonij ipoder on mikilistli, niman okuajkik nemilistli yejuan xok kaman uelis tlamis itechkopa on kuajli tlajtojli yejuan kiteijlia kenijki Dios temakixtia.

¹¹ Dios onechtlapejpenij para nikteijlis in temachtijli, niman onechtitlan ken apóstol* para nikinmachtis on yejuan xhebreos*.

¹² Yejua ika, aman tlamach nikijyouiya. Pero nejua xnipinaua, pampa nikmatstikaj akinon yonikneltokak. Niman kuajli nikmatstikaj ika yejua uelis kejeuas on tlen onechtlaktitij hasta ipan on tonajli ijkuak oksejpa uajlas.

¹³ No ijki, xmouika ipan on ejemplo yejuan onimitsmachtij itech on kuajli temachtilistli, niman xmokaua ipan on tlaneltoktli niman tetlajsojtlalistli* yejuan tikpiyaj pampa tinemij iuan Cristo Jesús.

¹⁴ Xkejeua on kuajli temachtijli ika ipoder on Espíritu Santo yejuan touan chanti.

¹⁵ Tejua ye tikmatstikaj ika nochimej on tlaneltokakej chanejkej imanian Asia onechtlalkauijkej, no ijki okichiu Figelo niman Hermógenes.

¹⁶ ToTEKO ma kimikneli ifamilia on tokniu Onesíforo, pampa yejua miyekpa onechyoltlaliko, niman yejua xopinau ika nitsakutikaj.

¹⁷ Yej yejua ijkuak oyejkok nikan Roma onechtejtemoj sanoyej hasta kampa onechnextij.

¹⁸ Ma toTEKO ma kikneli ipan on tonajli ijkuak uajnokuepas. Tejua ye tikmatstikaj kuajli ken miyekpa otechpaleuij ne Éfeso.