2 Pedro 3 - El Nuevo Testamento

ToTEKO Cristo oksejpa uajlas

¹ Notlajsojkaikniuan, in yejua ika ome tlajkuilolamatl nemechtitlanilia. Niman ipan in omemej notlajkuilolamauan oniknek nemechtlanemililtis ipan on tlen kuajli tlamachilistli.

² Nikneki xkelnamikikan on tlen Dios okijtoj ye uejkaui intechkopa on yolchipajkej itiotlajtojkauan. Niman no nikneki xkelnamikikan on tlanauatijli yejuan toTEKO JesuCristo akin toTemakixtijkau omechmakak intechkopa on apóstoles* yejuan omechmachtijkej.

³ Achtoj xkajsikamatikan in. Ipan on sa ika nochi tiempo nemiskej tlakamej yejuan kipijpinauiskej on tlen nenkineltokaj. Yejuamej kichiuaskej on tlen inxkuajlieleuilis kineki.

⁴ Yejuamej tetlajtoltiskej: “¿Tline* hasta aman xuajlau Cristo ijkon ken okijtoj? Desde ijkuak nemiyaj toachtojtajuan hasta aman, sanken* sano ijki tikitaj tlaojonkaj ken ijkuak nochi kemach opeu.”

⁵ Yejuamej ijkin kijtouaj pampa xkinekij kitaskiaj ika ipan on achtoj tiempo Dios okitlalij on cielos* niman in tlaltikpaktli san ika itlajtol. Niman no xkinekij kineltokaskej ika in tlaltikpaktli okis ipan on atl niman onkaj itlajkotian on atl.

⁶ Niman itechkopa on atl ye uejkaui Dios no okapachoj in tlaltikpaktli niman okixoxotonij.

⁷ Pero in cielos niman in tlaltikpaktli yejuan amantsin onkaj sano ika itlanauatil Dios kinkajtikaj para kinxoxotonis ikan tlitl. Dios kinkajtikaj para ipan on tonajli ijkuak kintlajtlakolmakas niman kinxoxotonis nochimej on xyolchipajkej tlakamej.

⁸ Pero nemejuamej, notlajsojkaikniuan, maka xkelkauakan ika para toTEKO se tonajli sano ijki ken se mil xipan, niman se mil xipan sano ijki ken se tonajli.

⁹ ToTEKO xnouejkaua kichiua on tlen prometeroua ken sekimej kinemiliaj, yej nochi kichijtiu ijkuak yejko on tiempo. Pero aman techpiyalia ijyouilistli, pampa nion se tlakatl xkineki ma poliui, yej kineki para nochimej ma noyolpatlakan.

¹⁰ Pero ijkon ken sen tlachteketl, xkaman kimatij tlen hora kanaj ontlachteki, no ijki yejkos on tonajli ijkuak toTEKO oksejpa uajlas. Ijkuakon on cielo xoxotonis ikan sen temojtij niman chikauak kokomokalistli. Niman nochi tlen onkaj xoxotonis ikan tlitl. In tlaltikpaktli niman nochi tlen ipan onkaj tlatlas.

¹¹ Aman tej, pampa tikmatij ika nochi ijkon xoxotonis, ¿tlinon noneki tikchiuaskej? Noneki titouikaskej ikan yolchipaualistli niman yolkuajlilistli.

¹² Ijkon chika tikchaj ma yejko on tonajli ijkuak Dios kitlajtlakolmakas nochi tlaltikpaktli, noneki tikchiuaskej kanika para saniman ma yejkotetsi. Ipan on tonajli on cielo tlatlas niman popoliuis. Niman nochi tlen onkaj patis ika on tlitl.

¹³ Pero tejuamej tikmachixtokej on yenkuik cielo iuan on yenkuik tlaltikpaktli yejuan Dios otechprometerouilij. Ompa tej, nochimej nouikaskej yolmelajkej.

¹⁴ Yejua ika tej, notlajsojkaikniuan, chika nemejuamej nenkimachixtokej on tonajli, xchiuakan kanika para Dios mechnextijtejkos nenkipiyaj yolseuilistli, nenyolchipajkej niman xikan tlajtlakojli.

¹⁵ Xkajsikamatikan ika on ijyouilistli yejuan toTEKO techpiyalia, techpiyalia pampa kineki techmakas tonaltin para ma tikselikan itemakixtilis. Ijkin tej, yomechtlajkuiluij on totlajsojkaikniu Pablo ikan itlamatkilis* yejuan Dios yokimakak.

¹⁶ Pablo okiteneu in tlajtlamach* ijkuak okijkuiloj ipan nochi itlajkuilolamauan, maski seki itemachtil sanoyej* ouijtikaj* para se kajsikamatis. Niman on yejuan xitlaj* kimatij niman xkojtikej ipan intlaneltok oksekneka kikuepaj, ijkon ken no kikuepaj oksekij Yektlajkuilojli. Ijkon tej, sano yejuamej noxoxotoniaj.

¹⁷ Yejua ika tej, notlajsojkaikniuan, xmotlajpiyakan, pampa nemejuamej ye nenkimatij nochi in. Xmotlajpiyakan para maka mechajkajkayauaskej ika on xmelauak kuajli temachtijli on yejuan kitemachtiaj on tlakamej yejuan xkitlakamatij itlanauatil Dios, niman ijkon xnenkipoloskej on ika kuajli iuan nemouikaj Cristo.

¹⁸ Pero xkixmatstiakan más kuajli toTEKO on toTemakixtijkau JesuCristo, niman xmoskaltikan más ikan iueyitetlajsojtlalis*. Sanken aman niman para nochipa, yejua ma kiseli ueyilistli. Ma ijki nochiua.