2 Pedro 2 - El Nuevo Testamento

On temachtijkej yejuan tlakajkayauaj

¹ Ijkon ken nemiyaj on yejuan tlakajkayajkej tiotlajtojkej intsajlan on hebreos*, no ijki nemiskej nemotsajlan on yejuan tlakajkayajkej temachtijkej. Yejuamej mechmachtiskej on temachtijli tlen xkuajli yejuan uelis kixoxotonis nemotlaneltok. Yejuamej kichiuaskej kanika para maka nenkimomakaskej cuenta ika mechmachtiaj on tlen xmelauak. Yejuamej hasta kinenekiskej* toTEKO yejuan okinmakixtij. Yejua ika nimantsin impan uajlas tlaxoxotonilistli.

² Niman miyekej kitokaskej on xkuajli temachtijli yejuan on tlakajkayajkej temachtijkej kitemachtiskej. Niman san ipampa on tlen kichiuaj, on yejuan xtokniuan kiteneuiliskej tlen xkuajli on yektlajtojli yejuan melauak.

³ Yejuamej, pampa sanoyej* keleuiyaj tomin, mechmachtiskej ikan tlakajkayaualistli yejuan san yokinejnemilijkej. Pero desde ye uejkaui Dios ye nemi listo para kintlajtlakolmakas niman kintlaxoxotonilis.

⁴ Dios xokintlapojpoluij on ángeles yejuan otlajtlakojkej, yej okominxinij miktlan kampa tetlajyouiltiloyan niman tlayouatok. Ompa salijtokej ikan teposcadenas hasta ipan on tonajli ijkuak Dios kinyolkuitis niman kintlaxtlauilis.

⁵ Dios xokintlapojpoluij on tlakamej yejuan nemiyaj ye uejkaui, yej okuajtitlan sen temojtij kiautli para oapachijkej on xkuajkualtin tlakamej. Niman san okimakixtij Noé, on yejuan okiteijlij kenijki se uelis kuajli nouikas ken noneki, iuan chikome ifamilia.

⁶ Dios no okinxoxotonij on uejueyikalpamej Sodoma niman Gomorra. Yejua okintlatij hasta otlikonextiakej. Niman ijkon okichiu para kintitia on yejuan sakin* tlakatiskej xkuajkualtin tlakamej ika no ijkon impan nochiuas.

⁷ Pero ipan on temojtij tlaxoxotonilistli, Dios okimakixtij Lot. Lot sen tlakatl yolmelaki katka, niman yejua noyolkokouaya ijkuak kintaya ken xkuajli kipiyaj innemilis on xkuajkualtin tlakamej.

⁸ In yolmelajki tlakatl, yejuan inuan ochantik on xkuajkualtin tlakamej, mojmostla noyolajmanaya pampa kitaya niman kakiya on tlen xkuajli tlajtlamach* kichiuayaj.

⁹ Yejua ika tej, tikitaj ika hasta aman Dios ueli kinmanauiya on yolchipakej tlakamej itech on tetlatlatalistli, niman no kinmaka on temojtij tlajyouilistli para on xyolchipajkej tlakamej hasta kaman ajsi on tonajli ijkuak kinyolkuitis niman kintlaxtlauilis ikan tlajyouilistli.

¹⁰ Dios tej, melauak xkelkauas kintlaxtlauilis ikan temojtij tlajyouilistli nochimej on yejuan kichiuaj on tlen xchipauak ken inxkuajli eleuilis* kineki niman on yejuan xkitlakaitaj itekiuajyo Dios. On yejuan tlakajkayajkej temachtijkej xipan teitaj niman noueyimatij. Yejuamej xnomojtiaj para kinuijuikaltiaj on tlayekankej ángeles.

¹¹ Pero ne ixpan toTEKO, on kuajkualtin ángeles, maski kipiyaj más poder niman tlanauatijli, xkinuijuikaltiaj on xkuajkualtin ángeles yejuan aman kitekipanouaj on diablo*.

¹² Pero in yejuan tlakajkayajkej temachtijkej kiuijuikaltiaj on tlen xkajsikamatij. Yejuamej ken xkuajkualtin tepeyolkej yejuan xtlanemiliaj, niman nouikaj ken yolkej. Tlakatij para kimajsij niman kinmiktiaj. Yejuamej no ijki mikiskej ken mikij on tepeyolkej.

¹³ Yejuamej no ijki tlajyouiskej ken oksekimej yejuan yejuamej kintlajyouiltiaj. Nomatij ikan pakilistli ijkuak kistinemij, niman kichiuaj nochi tlen inxkuajli eleuilis kineki ne kampa teixpan. Yejuamej kichiuaj tlen tepinajtij niman xyolchipajkej ijkuak nemouan nemij ipan on iluimej kampa nemouikaj ikan tetlajsojtlalistli*. Ijkon nouikaj chika ikan pakilistli tekajkayauaj.

¹⁴ Yejuamej ijkuak kitaj sen siuatl, nimantsin kejeleuiyaj. Xkaman siauij ika tlajtlakouaj. Yejuamej kintlajkalij ipan tlajtlakojli on yejuan xkojtikej ipan intlaneltok. Inyojlo keleuiya tomin. Dios kijtoua ika yejuamej sanoyej kincastigaros.

¹⁵ Yejuamej yonopojpolojkej, yokikajkej on kuajli ojtli, niman kitokaj iejemplo Balaam ikoneu Beor. Yejua sanoyej kinekiya kitlanis tomin niman yejua ika okichiu tlen xkuajli.

¹⁶ Pero okajuakej ipampa on itlajtlakol ijkuak ipolokotsin*, maski yolki yejuan xueli tlajtoua, yejua otlajtoj ken yakaj tlakatl yeskia, niman okiteltij on tekitl yejuan kichiuaskia xikan itlamachilis.

¹⁷ Yejuamej miyek tlajtlamach* kiprometerouaj pero xkaman itlaj kitemakaj. Yejua ika, yejuamej ken on ameyaltin yejuan xkipiyaj atl, noso ken itlaj moxtli yejuan xkipiya atl niman kuika ajakatl. Para yejuamej Dios yokitlalij kampa más tlayouatok niman para nochipa ompa nemiskej,

¹⁸ pampa yejuamej para kinyojyoleuaj on tlakamej kinmijliaj tlajtlamach* ikan kualtsin tlajtoltin maski melauak xitlaj* kijtosneki. Kinchiualtiaj oksekimej no ma kichiuakan on tlen sanoyej xkuajli yejuamej kichiuaj niman on tlen keleuiyaj, on yejuan sa axkan* kikajtiuij on ken xkuajli nouikaj.

¹⁹ Kimprometerouiliaj ika xnemiskej esclavos itech yakaj nion itlaj ika, pero sano yejuamej nemij esclavos ipan inxkuajli nouikalis. Nochi tlakatl nokaua esclavo itech nochi on tlen kinokauilia.

²⁰ On yejuan yokixmatkej toTEKO JesuCristo akin toTemakixtijkau, yokikajkej on tlen xkuajli kichiuaj on tlaltikpaktlakamej. Pero tla oksejpa nokajkayauaj ika on tlajtlamach* niman kinokauiliaj kintlani on tlen xkuajli, tla ijkon, nokauaskej más xkuajli xken achtoj nemiyaj.

²¹ Niman más kuajli xkixmatiskiaj kenijki se nouikas ikan yolmelajkilistli xken aman kixmatij niman kitlalkauiyaj on yektlanauatijli yejuan okiselijkej.

²² Pero kuajli impan onocumpliroj on ken kijtoua on tlajtojli: “On chichi* oksejpa kikua isotlal, niman on pitso yejuan kemach okonaltijkej oksejpa onnosokipopolaktia.”