2 Pedro 1 - El Nuevo Testamento

Pedro kintlajkuiluiya on tlaneltokakej

¹ Nejua, Simón Pedro, niitekitkau JesuCristo niman niiapóstol. Nemechijkuilouilia in tlajkuilolamatl para nemejuamej yejuan nenmelajkatlakamej ixpan Dios niman JesuCristo totemakixtijkau. Nemejuamej nenkipiyaj kualtsin nemotlaneltok yejuan sanoyej ueyi kijtosneki, no ijki ken tejuamej tikpiyaj.

² Xselikan miyek tlatiochiualistli niman yolseuilistli pampa nenkixmatij Dios niman Jesús on toTEKO.

Dios yokinnots niman yokintlapejpenij on tlaneltokakej itech Cristo

³ Dios ikan ipoder yotechmakak nochi tlen techpoloua para tonemilis niman para tinemiskej chipajkej ken yejua. In nemilistli niman chipaualistli tikpiyaj pampa tikixmatij yejua yejuan otechnots ika iueyilis niman ikualtsin tekiu.

⁴ Ijkon tej, otechmakak sanoyej uejueyi ipromesas, yejuan uejueyi kijtosneki. Ika on promesas yejuan Dios omechmakak, nemejuamej uelis nennemiskej ken Dios nemi. Niman no uelis nenkisaskej ipan on tlen xkuajli yejuan onkaj ipan in tlaltikpaktli ipampa xkuajli eleuilistli*.

⁵ Yejua ika, maka san xtleneltokakan, yej on nemotlaneltok ma mechpaleui nenkichiuaskej tlen kuajli, niman on tlen kuajli ma mechpaleui nenkipiyaskej kajsikamatilistli,

⁶ niman on kajsikamatilistli ma mechpaleui nenkiteltiskej on xkuajli eleuilistli, niman ika xok nenkipiyaj on xkuajlieleuilistli, ma mechpaleui xkipiyakan ijyouilistli, niman on ijyouilistli, ma mechpaleui más xmouikakan itech Dios,

⁷ niman on ika más nemouikaskej itech Dios, ma mechpaleui más kuajli teuan xmouikakan, niman on ika más kuajli teuan nemouikaskej, ma mechpaleui más xtetlajsojtlakan.

⁸ Tla ipan nemoyojlo onkaj in tlajtlamach* niman noskaltia, nemonemilis xsanenkaj onyas, yej nenkichiuaskej tlajtlamach* para Dios pampa xsanenkaj nenkixmatij toTEKO JesuCristo.

⁹ Pero on yejuan xipan iyojlo onkaj in tlajtlamach*, yejua xueli tlacha, niman ijkon xkajsikamati tlajtlamach* itech ika Dios. Yejua kelkaua ika itlajtlakoluan yokintlapojpoluijkej.

¹⁰ Yejua ika, nokniuan, xchiuakan kanika para nenkimatiskej ikan nochi nemoyojlo ika Dios melauak yomechnots niman yomechtlapejpenij. Tla ijkon, nenkichiuaskej xkaman nenuetsiskej.

¹¹ Yej kuajli nenkalakiskej ne kampa toTEKO, yejuan toTemakixtijkau JesuCristo, tlamandaroua para nochipa.

¹² Yejua ika, nemechelnamiktijtias in tlajtlamach*, maski ye nenkimatstokej niman ye nenmelajkanemij ipan on kuajli temachtijli yejuan yonenkiselijkej.

¹³ Nikuitia kuajli, chika sanken* ninemi, para nemechelnamiktis in tlajtlamach* yejuan ika yonemechnojnots.

¹⁴ Nikmati ika saniman nimikis ken toTEKO JesuCristo yonechmachistij.

¹⁵ Niman nikchiuas kanika para ijkuak nejua nimikis nemejuamej nochipa nenkelnamikiskej in tlajtlamach*.

Pedro niman oksekimej okitakej iueyilis Cristo

¹⁶ Ijkuak otemechnojnotskej de ipoder toTEKO JesuCristo niman ika yejua oksejpa uajlas, xotiknejnemilijkej ken itlaj cuentos para ika otemechkajkayajkej, yej otikitakej iueyilis toTEKO ikan tixtololojuan.

¹⁷ Tejuamej otikitakej ijkuak Dios toTajtsin okimakak Cristo tlakaitalistli niman ueyilistli, niman Dios ikan iueyilis okijtoj: “In yejua notlajsojkaKoneu yejuan nechpaktia.”

¹⁸ Sano tejuamej otikakkej on tlajtojli yejuan ualeuaya ne iluikak ijkuak tinemiyaj iuan toTEKO ipan on yektitikaj tepetl.

¹⁹ Yejua ika más tikneltokaj ikan nochi toyojlo ika on tiotlajtojli yejuan okijkuilojkej on tiotlajtojkej sanoyej melauak. Nemejuamej kuajli nenkichiuaskej tla nenkitenkakiskej on tiotlajtojli, pampa on tiotlajtojli ken itlaj lámpara yejuan tlauiloua kampa tlayouatok hasta kaman tlanesi. In no ijki ken ijkuak on toTEKO Cristo uajlau ipan iyojlo sen tlakatl niman kixtia nochi tlen xkuajli ompa onkaj.

²⁰ Pero achtoj xmatikan yejua in. Xakaj tlakatl iselti uelis kijtos tlinon kijtosneki on tlajtoltin yejuan on tiotlajtojkej okijkuilojkej ipan on Yektlajkuilojli.

²¹ Xakaj uelis kijtos tlinon kijtosneki, pampa intemachtil on tiotlajtojkej xopeu intechkopa on tlakamej yejuan san okinejnemilijkej ken okinekkej, yej on tlakamej okijtojkej itechkopa on Espíritu Santo.