2 Corintios 9 - El Nuevo Testamento

On uentomin para on tokniuan de Jerusalén

¹ Ika on uentomin yejuan nosentlalis para ika nenkimpaleuiskej on yejuan tlaneltokaj neka ipan iueyitlalpan Judea, xnoneki para nemechtlajkuiluis,

² pampa ye nikmatstikaj ika melauak nenkinekij nentepaleuiskej. On yejuan chantij ne Macedonia, ikan pakilistli nikimijlijtiu ika desde se xojtli katka nemejuamej yejuan nenchantij ne Acaya ye nenkipiyaj nemoyojlo para nentepaleuiskej. Niman pampa okakkej ken onenkimpaleuijkej, sakin* nochimej yejuan chantij ne Macedonia onoyolejkej para no ijki tepaleuiskej.

³ Pero nikintitlani in tokniuan para maka yej xijki onkisas on tlen kuajli yonikteijlij de nemejuamej. Ijkon tej, nennemiskej ikan nemouentomin sano ijki ken onikimijlij on tokniuan chantij Macedonia.

⁴ Tla sekimej yejuamej nouan yaskej niman mechnextijtajsiskej xe nenkisentlaliaj on uentomin, tla ijkon, tejuamej tipinauaskej, niman nemejuamej más nempinauaskej pampa onikimijlij ika melauak nennemiskej listos.

⁵ Para maka tej, ijkon nemopan nochiuas, niknemilia kuajli yes nikintlajtlanilis in tokniuan para ma mechnotsatij chika xe najsi, niman ma mechpaleuikan nenkajxitiskej on uentomin yejuan yonenkijtojkej ika nenkitemakaskej. Ijkon ijkuak najsis, on uentomin ye onyas niman nenkiteititiskej ika nenkitemakaj pampa nenkinekij nenkitemakaskej niman xpampa temechchiualtiaj.

⁶ Maka xkelkauakan yejua in. Yejuan achijtsin kitôka, no achijtsin kipixka, niman yejuan miyek kitôka, no miyek kipixka.

⁷ Cada se ma kitemaka iuentomin ken kixtia ipan iyojlo. Maka ma kixtoka tlen kitemaka, nion maka ma nomati san kichiualtiaj ma kitemaka, pampa Dios kitlajsojtla* on yejuan kitemaka iuentomin ikan paktli.

⁸ Dios uelis mechmakas nochi tlajtlamach* tlatiochiualistli para ijkon uelis nochipa nenkipiyaskej on tlen mechpolos, niman no nenkipiyaskej kech uelis ika nentlapaleuiskej ipan nochi kuajli tekitl.

⁹ Ipan in Yektlajkuilojli ijkin tlajkuilolnestikaj: Sen tlakatl yejuan nouika iuan Dios, ikan nochi iyojlo kimpaleuiya yejuan mayankej, niman on kuajli tlatlamach kichiua nochipa onyas.

¹⁰ Niman Dios yejuan kimaka xinachtli on tokaketl para ma tôka niman tlakuajli para kikua, no mechmakas nochi tlen mechpoloua para uelis nenkimpaleuiskej on yejuan itlaj kimpoloua.

¹¹ Dios mechmakas nochi tlajtlamach* riquezas para ikan nemoyojlo nochipa uelis nenkitemakaskej más miyek nemotlapaleuilis. Niman ijkin miyekej kimakaskej tlaxtlauijli Dios ipampa nemouentomin yejuan totechkopa nenkitemakaj para tikinmaktiliaj on tokniuan.

¹² Ijkuak nenkitemakaj nemotlapaleuilis, xsan kiseliaj nemotetlayokolil on yejuan tlaneltokaj, yej noyoleua para no kimakaj miyek tlaxtlauijli Dios.

¹³ Nemotlapaleuilis kinchiualtis kiyekteneuaskej Dios, pampa yejuamej kitaskej ken nenkitlakamatij on kuajli temachtijli de Cristo yejuan nenkiteneuaj nenkineltokaj. Yejuamej no kiyekteneuaskej Dios ipampa on kuajli uentomin yejuan nenkitemakaskej para yejuamej niman para nochimej oksekimej.

¹⁴ Sano yejuamej tej, nemopampa kichiuaskej oración, niman mechpiyaliskej miyek tetlajsojtlalistli* ipampa on ueyitetlajsojtlalistli* yejuan Dios okintitij nemotechkopa.

¹⁵ Ma tikmakakan tlaxtlauijli Dios ipampa iKonetsin yejuan otechmakak ken sen ueyi tetlayokolijli* yejuan xakaj ueli kipanextia ikan tlajtojli.