2 Corintios 6 - El Nuevo Testamento

¹ Ijkon tej, pampa titekitij ipan itekiu Dios, sanoyej* temechtlajtlaniliaj maka san xkauilmatikan iueyitetlajsojtlalis* yejuan xtechtocarouaya tikseliskej,

² pampa yejua ijkin okijtoj: Ipan sen kuajli tonajli onimitskak ijkuak oniteiknelij*. Ipan on tonajli ijkuak oniktemakak temakixtilistli, onimitspaleuij. Xkakikan tej, aman in yejua on kuajli tonajli. Aman in yejua on tonajli ijkuak Dios kipiya ipan iyojlo para mechmakixtis.

³ Tejuamej xitlaj* tikchiuaj tlen xkuajli, para maka yakaj kijtouilis tlen xkuajli on totekiu.

⁴ Yej, nochi kech tikchiuaj, kiteititia ika tiitekitkauan Dios. Ijkon, titeititiaj ijkuak ikan miyek ijyouilistli tikxikouaj on tlajyouilistli, ijkuak tlajtlamach* techpoloua niman tikpiyaj miyek pajsoloualistli.

⁵ Tejuamej techuijuitekij, techtsajtsakuaj, niman miyek tlakatl techixnamiki. Tejuamej sanoyej chikauak titekitij, kamanian xtikochij niman hasta xtitlakuaj.

⁶ No tikteititiaj ika tiitekitkauan Dios ipampa toyolchipaualis, totlaixmatilis*, toijyouilis, niman ika tikchiuaj on tlen kuajli para oksekimej. Ijkon tikchiuaj itechkopa on Espíritu Santo, niman totetlajsojtlalis* chipauak.

⁷ Otiktemachtijkej on tlen melauak niman otikpanextijkej ipoder Dios ipan nochi tlen otikchijkej. Tiktekitiltiaj on melajkanemilistli ken toarmas para titeixnamikij niman para titomanauiyaj ijkuak techixnamikij.

⁸ Kamanian techtlakaitaj, noso xtechtlakaitaj. Kamanian kijtouaj ika tikuajkualtin tlakamej, noso xtikuajkualtin tlakamej. Kamanian techpiyaj ken tlakajkayajkej maski tikijtouaj on tlen melauak.

⁹ Kamanian techitaj ken xtechixmatiskiaj maski kuajli techixmatij. Kamanian kijtouaj ika ye timiktiuij, pero sanken* tikpiyaj nemilistli. Tejuamej techcastigarouaj pero xtechmiktiaj.

¹⁰ Maski titajmanaj, xkaman tikpolouaj topakilis. Maski timayankej, miyekej tikinricojtlaliaj itech Dios. Niman maski xitlaj* tikpiyaj, nochi tlajtlamach* toyaxka.

¹¹ Nokniuan corintios, yotemechnojnotskej melajki niman temechtlajsojtlaj ikan nochi toyojlo.

¹² Tejuamej sanoyej temechtlajsojtlaj, pero nemejuamej xijki nentechtlajsojtlaj.

¹³ Aman tej, nemechnotsa ken sen tajtli kinnotsa ikoneuan. Xnechtlajsojtlakan ken nejua nemechtlajsojtla*.

On tlaneltokakej xkintocaroua inuan nouikaskej on yejuan xtlaneltokakej itech Cristo

¹⁴ Maka itlaj iminuan xmatikan on yejuan xkineltokaj Cristo. ¿Kenijki yakaj yejuan yolmelajki uelis nouikas iuan yakaj yejuan xyolmelajki? On sano ijki ken on tlastalotl xnouika iuan on tlayouajlotl.

¹⁵ Noso, ¿kenijki uelis Cristo nouikas iuan Satanás? Noso, ¿kenijki uelis san se tlamachilistli kipiyas on yejuan tlaneltoka iuan on yejuan xtlaneltoka?

¹⁶ Noso, ¿kenijki on itiopan Dios yejuan nochiua ikoneuan, uelis nemiskej san sekan inuan on tlamachijchiualtin ídolos? Nemejuamej tej, nemochiuaj itiopan on Dios yejuan nochipa nemi, ijkon ken sano Dios okijtoj: Intsajlan nichantis niman inuan nikistinemis. Nejua niiminDios yes niman yejuamej nokoneuan yeskej.

¹⁷ Yejua ika, ijkin kijtoua toTEKO: Xkisakan ne intsajlan on yejuan xtlaneltokaj, niman intech xmoxelokan. Maka xchiuakan on tlen xchipauak, niman nejua nemechselis.

¹⁸ Nejua ninochiuas nemoTajtsin, niman nemejuamej nennokoneuan yeskej. Ijkin kijtoua on toTEKO nochi ueli kichiua.