2 Corintios 5 - El Nuevo Testamento

Toiluikaknakayo

¹ Ijkuak totlaltikpaknakayo yejuan ken itlaj soyakajli xoxotonis, tikmatstokej ika Dios techmakas ne iluikak sen iluikaknakayotl yejuan nochipa onyas. Yejua on iluikaknakayotl xakaj tlakatl kichijchiuas.

² Aman sanoyej* titejeltiaj pampa sanoyej tiknekij tikpatlaskej totlaltikpaknakayo ika on iluikaknakayotl

³ pampa xtiknekij tiaskej iluikak san ika toalma yejuan xkipiya itlalnakayo.

⁴ Chika tinemij ikan totlaltikpaknakayo, titejeltiaj. In xkijtosneki ika tiknekij tikpoloskej totlaltikpaknakayo, yej tiknekij ma nopatla totlaltikpaknakayo ika on iluikaknakayotl para on tlaltikpaknakayososojli yejuan ueli miki ma popoliui ika on yenkuik nemilistli yejuan nochipa onyas.

⁵ Dios yokichiu para tikseliskej on iluikaknakayotl, niman otechmakak on Espíritu Santo para kichiuas melauak tikseliskej.

⁶ Yejua ika, nochipa tikpiyaj toyojlo itech. Niman tikmatstokej ika chika tinemij ikan totlalnakayo, xe tinemij ne iluikak iuan toTEKO.

⁷ Aman, in tikmatij itechkopa totlaneltok niman xitechkopa on tlen tikitaj.

⁸ Yejua ika, nochipa tikpiyaj toyojlo itech, niman más tiknekiskiaj ma tiktlalkauikan totlalnakayo niman ma tichantitij iuan toTEKO.

⁹ Yejua ika tikchiuaj kanika para nochipa tikpaktiskej toTEKO tla tinemij nikan ikan totlaltikpaknakayo noso ne iluikak ikan toiluikaknakayo.

¹⁰ Ijkon tikchiuaj pampa, ika onkaj tinochimej tajsiskej ixpan Cristo, kampa techyolkuitis niman techtlaxtlauilis ken noneki on tlen kuajli noso xkuajli otikchijkej ijkuak tinemiyaj ikan totlalnakayo.

On itlajtol Dios kitemaka yolseuilistli

¹¹ Yejua ika, pampa tikmakajsij toTEKO, tikchiuaj kanika para oksekimej tlakamej ma kineltokakan niman ma kitlakamatikan Dios. Pero Dios ye kimatstikaj ika tikchiuaj on ikan yolchipaualistli, niman ojalá nemejuamej no ijki xmatikan ipan nemotlamachilis.

¹² Xtitoueyiteneuaj oksejpa nemixpan. San tiknekij nemejuamej xmomatikan kuajli de tejuamej, niman ijkon uelis nenkinnankiliskej on tlakamej yejuan noueyiliaj ika on tlen nesi niman xejua ika on tlen onkaj ipan inyojlo.

¹³ Tla tinesij ken tilocos, on pampa tikpaleuiyaj Dios. Niman tla xtinemij locos, on para nemejuamej temechpaleuiyaj.

¹⁴ Pampa itetlajsojtlalis* Cristo techyekana, tikmatij ika yejua okiselij icastigo nochi tlakatl ijkuak omik. Yejua ika, aman Dios kita nochi tlakatl ken yokiselij icastigo ika on mikilistli.

¹⁵ Cristo omik ipampa nochi tlakatl para on yejuan nemij maka kinoyaxkatikan* innemilis, yej ma kimaktilikan on yejuan impampa omik niman onokuiteu ipan itlalkon.

¹⁶ Yejua ika, tejuamej xok tikintaj oksekimej ken kuajkualtin noso xkuajkualtin ika on ken yejuamej nouikaj. Maski ijkuak xe titlaneltokayaj no ijkon otiknemilijkej de Cristo, pero aman xok tikitaj ken san yakaj tlakatl.

¹⁷ Yejua ika, tla yakaj nemi san seknek iuan Cristo, yejua sen yenkuik tlakatl ipan inemilis. On xkuajli inemilis yejuan kipiyaya yopanok, niman aman kipiya yenkuik inemilis.

¹⁸ Niman nochi on kichiua Dios yejuan itechkopa Cristo otlauelseu touan niman otechselij ikan yolseuilistli. Niman Dios no yejua otechtekiutij para itech ma tikinuikakan nochimej oksekimej, para yejua tlauelseuis inuan, niman kinselis ikan yolseuilistli.

¹⁹ In tej, kijtosneki ika ipan on kojnepanojli* Dios nemiya iuan Cristo, niman ompa otlauelseu inuan on tlaltikpaktlakamej, niman okinselij, niman intech kitlalijtikatka iyolseuilis. Yejua xok okichiuilij cuenta on intlajtlakol. Niman tejuamej otechtlalij para tiktemachistiskej on temachtijli yejuan kijtoua kenijki Dios tlauelseui inuan on tlaltikpaktlakamej niman kinselia ikan yolseuilistli.

²⁰ Ijkon tej, Cristo otechtlalij para tiitenojnotskauan. Niman aman sano Dios mechnojnotsa totechkopa. Aman tej, sanoyej temechtlajtlaniliaj ken technauatia Cristo: xkauilikan Dios ma tlauelseui nemouan, niman ma mechseli ikan yolseuilistli.

²¹ Maski Cristo xokichiu nion se tlajtlakojli, Dios san topampa okimakak castigo ken tlajtlakolej yeskia. In onochiu para Dios ma techseli ken tiyolmelajkej ijkuak san sekan tinemij iuan Cristo.