2 Corintios 4 - El Nuevo Testamento

On tesoros yejuan yejtokej ipan kontli de sokitl

¹ Dios ikan iteiknelilis* yotechmakak in tekitl. Yejua ika, xkaman tikpolouaj totlamachalis*.

² Tejuamej yotikajkej on tlen xkuajli san nochtakachiua niman on tlen tepinajtij. Xtitlakajkayajtinemij nion tikpatlaj itemachtil Dios. Yej ixpan Dios tikpantlantiaj on tlen melauak, niman ijkon itlamachilis cada tlakatl yejuan techixmatstokej kimatij ika kuajli titouikaj.

³ Pero tla sekimej xkajsikamatij on kuajli tlajtojli, xkajsikamatij pampa yejuamej yauij ipan on ojtli para popoliuiskej.

⁴ Satanás, yejuan imindios on tlaltikpaktlakamej, yokintlamachilispoloj para maka kajsikamatiskej on kuajli tlajtojli yejuan kipantlantia iueyilis Cristo. Niman Cristo kipanextia Dios.

⁵ Ijkuak titemachtiaj, xtoka tejuamej titemachtiaj, yej tikteijliaj ika JesuCristo yejua toTEKO niman ika tejuamej titochiua nemotekipanokauan pampa tiktlajsojtlaj Jesús.

⁶ Dios, yejuan otlanauatij ma petlani on tlauijli ne kampa tlayouatok, no yotechueliltij para itlauil ma petlani ipan toyojlo, niman ijkon yotikixmatkej iueyilis yejuan kipantlantia ipan ixayak JesuCristo.

⁷ Tikpiyaj in kajsikamatilistli de iuelilis Dios ken itlaj tesoro ipan totlalnakayo yejuan ken itlaj kontli tlachijchijtli ikan sokitl. Ijkon kiteititia ika on ueyi poder yejuan topan onkaj xtotech kisa, yej ualeua itech Dios.

⁸ Maski tikpiyaj miyek tlen tepajsolo, xkaman titoyolmajxalouaj. Ijkuak sanoyej* tlajtlamach* xkuajli topan nochiua, xkaman tikpolouaj totlamachalis*.

⁹ Maski techtlaueltotokatinemij, Dios xkaman techtlalkauiya. Niman maski techtlajkalij ipan tlajli, xkaman techpopolouaj.

¹⁰ Nochiuiyan kampa tiauij, nochipa tinemij listos para timikiskej, ijkon ken Jesús nemiya listo para mikis. Ijkon tej, nochiua para nochimej ma kitakan ika inemilis Cristo ye onkaj touan.

¹¹ Chika tikpiyaj nemilistli ipan in tlaltikpaktli, mojmostla techmiktisnekij ipampa Jesús para nopanextia inemilis Jesús ipan in tomikatlalnakayo.

¹² Ijkon tej, chika tiktekipanouaj Cristo nemotsajlan, on mikilistli techtlamijtiu. Yejua ika, nemejuamej yej nenkiseliaj nemilistli yejuan para nochipa.

¹³ Ijkin tlajkuilolnestikaj ipan on Yektlajkuilojli: “Onitlaneltokak, yejua ika onikpix tlinon onikijtoj.” Tejuamej tikpiyaj sano yejua on tlaneltoktli, niman yejua ika titlajtlajtouaj.

¹⁴ Titlajtlajtouaj pampa tikmatstokej ika Dios yejuan okiyoliuitij* niman okuiteu toTEKO Jesús ne ipan itlalkon no techyoliuitis niman techkuiteuas ipan totlalkon, pampa tinemij san sekan iuan Jesús. Niman san sekan nemouan techuikas ne ixpan.

¹⁵ Nochi tlen tikijyouiyaj, tikijyouiyaj para temechpaleuiyaj. Niman para ijkon más miyekej kiseliaj iueyitetlajsojtlalis* Dios yejuan xkintocarouaya kinseliskej, no más miyekej ma kimakakan tlaxtlauijli para yejua kiselis más ueyilistli.

¹⁶ Yejua ika, xkaman tikpoloskej totlamachalis*. Maski totlalnakayo tlantiu, toalma mojmostla yenkuixtiu.

¹⁷ Maski titlajyouiyaj achijtsin nikan ipan in tlaltikpaktli, on tlen tikijyouiyaj san panoua. Niman pampa titlajyouiyaj, Dios techmakas ueyilistli yejuan para nochipa tikpiyaskej. Niman on ueyilistli más sanoyej ueyi kijtosneki xken on tlen aman tikijyouiyaj.

¹⁸ Yejua ika tej, xitech tontlachixtokej on tlajtlamach* tlen tikitaj, tejuamej yej tontlachixtokej itech on tlajtlamach* tlen xtikitaj, pampa on tlajtlamach* tlen tikitaj san panouaj, pero on tlen xtikitaj onkaj para nochipa.