2 Corintios 3 - El Nuevo Testamento

Pablo otemachtij de on yenkuik pacto*

¹ Ijkuak ijkin tikijtouaj, ¿nemejuamej nenkinemiliaj titoteneuasnekij tikuajkualtin tlakamej para xtechselikan? ¿Nenkinemiliaj ika nonekis sen amatlajkuilojli yejuan temechititiskej kampa kijtouaj ika tikuajkualtin tlakamej, noso nenkinemiliaj ika temechtlajtlaniskej para xtechmakakan sen amatlajkuilojli de nemejuamej ken oksekimej kichiuaj?

² ¡On melauak ika ka! Tejuamej xtechpoloua in amatlajkuilojli de sen tlakatl, pampa sano nemejuamej nennemij ken se tlajkuilolamatl yejuan ipan toyojlo tlajkuilolnestikaj. Niman in tlajkuilolamatl nochi tlakatl uelis kixmatis niman kinomachtis.

³ Kuajli nestikaj ika nemejuamej ken sen tlajkuilolamatl yejuan Cristo okititlan totechkopa. Yejua in tlajkuilolamatl xonijkuiloj ikan tlajpajli, yej ikan iEspíritu on Dios yejuan nochipa nemi. In tlajkuilolamatl xipan itlaj tepatlachtin onijkinkuiloj, yej ipan nemoyojlo.

⁴ Ijkon onikijtoj, pampa tikneltokaj ika Dios kichiua para totekiu kuajli kisa itechkopa Cristo.

⁵ Xueli tikijtouaj ika itlaj ueli tikchiuaj toseltimej. Yej nochi tlen ueli tikchiuaj Dios techueliltia,

⁶ pampa yejua techueliltia kuajli tiktetlajtlajtouiliaj on yenkuik pacto*. On yenkuik pacto* xejua on tlanauatijli yejuan tlajkuilolnestikaj, yej on tlen kisa itech on Espíritu Santo. On ley kitemaka mikilistli, pero on Espíritu Santo kitemaka nemilistli.

⁷ Iley Moisés onijkuiloj ipan tepatlachtin, niman ijkuak onotemakak, onotemakak ikan se petlanki ueyilistli. Niman ijkuak Moisés okinselij on tepatlachtin, ixayak sanoyej* opetlan hasta on hebreos* xouel okitakej ixayak. Pero maski on tlanauatijli ijkon onotemakak, on petlanalistli opopolijtiaj. Tla on tlanauatijli yejuan kitemaka mikilistli okipanextij sen petlanki ueyilistli,

⁸ tla ijkon itekiu on Espíritu Santo kipanextia más sanoyej ueyilistli.

⁹ Niman tla on tlanauatijli yejuan tetlajtlakolmaka ikan mikilistli kipiyaya ueyilistli, más sanoyej kipiya ueyilistli on yenkuik pacto* yejuan techmachistia ken Dios kiteneua ika nochi totlajtlakoluan yokimpopoloj.

¹⁰ Ijkuak on ley yejuan achtoj kipiyaya ueyilistli, iuan kitaj on yenkuik pacto*, nejsi ika xok kipiya ueyilistli, pampa on yenkuik pacto* más sanoyej kipiya ueyilistli.

¹¹ Tla on ley yejuan san achijtsin tiempo otlanauatij okipix ueyilistli, on yenkuik pacto*, yejuan para nochipa onkaj, más kipiya ueyilistli.

¹² Aman titemachtiaj ikan nochi yolchikaualistli pampa tikpiyaj in tlamachalistli* de on yenkuik pacto*.

¹³ Tejuamej xtikchiuaj ken Moisés, yejuan nixtlapachouaya ika sen tela para on hebreos* xkitayaj kenijki popolijtiaya on petlanki ueyilistli yejuan ye onkatka para poliuis.

¹⁴ Yejuamej tej, xkajsikamatiyaj on achtoj pacto*. Niman aman, ijkuak kinomachtiaj on achtoj pacto*, sanken* xkajsikamatij. Nesi ken on tela yejuan kixtlapachouaya Moisés sanken* kintlapachouilia inkajsikamatilis*. Pero se ueli san kajsikamati ijkuak kineltoka Cristo.

¹⁵ Niman yejuamej hasta aman xueli itlaj kajsikamatij ijkuak kinomachtiaj on tlen okijkuiloj Moisés. Ken itlaj tela kinmixtlapachojtikaj.

¹⁶ Pero ijkuak sen tlakatl kineltoka toTEKO, on tela yejuan kixtlapachoua popoliui.

¹⁷ ToTEKO JesuCristo yejua Espíritu, niman kampa nemi iEspíritu, ompa nemij tlamanauiltin para on tlaneltokakej.

¹⁸ Tinochimej tejuamej yopoliu topan on tela para otitochijkej ken itlaj espejo yejuan ipan ueli petlani iueyilis toTEKO. Niman titochijtiuij más ken yejua ipan itlachalis pampa tikpiyaj más niman más de iueyilis. Niman in kichiua toTEKO yejuan Espíritu.