2 Corintios 2 - El Nuevo Testamento

¹ Yejua ika, oniktlalij ipan noyojlo ika xnemechonnotsas oksejpa niman nemechajmanas,

² pampa tla nejua nemechajmanaskia, ¿akinomej ueliskiaj nechpaktiskiaj tla xsanno nemejuamej yejuan onemechajman?

³ Yejua ika, onemechijkuilouilij ipan on okse tlajkuilolamatl ken onikchiu pampa xoniknek nias niman nikselis ajmantli nemotech, pampa más kitocarouaya nennechpaktiskej. Kuajli nikmatstikaj ika tla nipakis, no nenpakiskej nemochimej*.

⁴ Ijkuak onemechijkuilouilij on tlajkuilolamatl, sanoyej nipajsoliuiya niman ninajmanaya ipan noyojlo, niman hasta nichokaya. Nejua xonemechtlajkuiluij para nemechajmanas, yej onemechtlajkuiluij para xmatikan ken sanoyej ueyi tetlajsojtlalistli* nemechpiyalia.

Noneki tiktlapojpoluiskej on yejuan okichiu tlen xkuajli

⁵ Onemechtlajkuiluij de on yejuan sanoyej xkuajli okichiu. Xsan nejua onechajman yej más omechajman nemejuamej. (Xnikneki nikijtos más de on tlin melauak.)

⁶ On castigo yejuan yokiselij ijkuak nenmiyekej onencastigarojkej ye kuajlonkaj.

⁷ Aman tej, ye noneki nenkitlapojpoluiskej niman nenkiyoltlaliskej para maka yej san ipampa on iajmanalis xok kinekis kitokas Cristo.

⁸ Yejua ika, sanoyej nemechtlajtlanilia, xkititikan ika sanken* nenkitlajsojtlaj*.

⁹ Ipan okse tlajkuilolamatl, onemechtitlanilij tlinon nenkichiuaskia para onemechtlatlatak tla nemejuamej nochi ika nennechtlakamatij.

¹⁰ Aman tej, on yejuan nemejuamej itlaj nenkitlapojpoluiliskej, nejua no niktlapojpoluilis. Tla onkatka tlinon niktlapojpoluilis, onikchiu san nemopampa ixpan Cristo.

¹¹ Ijkin yoniktlapojpoluilij para maka techtlanis Satanás, pampa kuajli tikixmatstokej tlinon xkuajli yejua kineki kichiuas.

Pablo najmana ipampa on ueyikalpan itoka Troas

¹² Ijkuak onajsik ipan on ueyikalpan Troas para nitemachtis, onitemachtij de on kuajli tlajtojli de Cristo, niman onikitak ika onkaj miyek tekitl yejuan ueliskia nikchiuaskia para toTEKO.

¹³ Pero xnoyolika katka pampa xoniknextijtajsik ompa tokniu Tito. Yejua ika, inuan oninouatij on tokniuan ika ye niau para Macedonia niman kemaj oniaj.

Nochipa titetlanij ijkuak tinemij san sekan iuan Cristo

¹⁴ Tikmakaj tlaxtlauijli Dios yejuan kichiua para nochipa titetlanij pampa tinemij san sekan iuan Cristo. Ijkon ken itlaj ajuiyalistli panoua, no ijki totechkopa panoua on temachtijli de Cristo.

¹⁵ Dios techita, niman para yejua tinemij ken iajuiyalis Cristo pampa totechkopa panoua nochiuiyan on temachtijli de Cristo, impan on yejuan nomakixtiaj niman impan on yejuan xnomakixtiaj.

¹⁶ Para on yejuan xnomakixtiaj, on temachtijli ken itlaj askayotl* yejuan temiktia, pero para on yejuan nomakixtiaj, on temachtijli kinmaka nemilistli. ¿Akinon tej, uelis kuajli temachtis ika ipoder? ¡Xakaj uelis temachtis!

¹⁷ Xtitemachtiaj itlajtol Dios ken miyekej kichiuaj yejuan temachtiaj para kitlaniskej tomin. Yej titemachtiaj ken Dios otechnauatij. Yejua ika, titemachtiaj ikan nochi toyojlo ixpan Dios san sekan iuan Cristo.