2 Corintios 13 - El Nuevo Testamento

Pablo kintlakanonotsa on yejuan tlaneltokaj ne Corinto

¹ In yejua ika yexpa nias nemechontas. Tla nensemej nenkipiyaj itlaj yejuan ika nenkiteixpanuiskej yakaj, nejua nikixtlalos. Nochi tlateixpanuilistli yejuan nenkichiuaskej, ika onkaj kimelajkaijtoskej omemej noso yeyimej testigos.

² Ijkuak ika okpa onemechnotsatoya, onikinchikajkanauatijka yejuamej on yejuan kichiuayaj tlajtlakojli, niman nochimej on oksekimej. Aman ika uejka ninemi, oksejpa nikinchikajkanauatia ika ijkuak oksejpa nias nemechonnotsas, nochimej yejuan sanken* tlajtlakouaj ika onkaj nikinmajajuas.

³ Ijkuakon, nenkimatiskej tlen nenkinekij, tla melauak Cristo notechkopa tlajtoua noso ka. Cristo xkipoloua poder para mechmelajkatlalis, yej kiteititis ipoder nemouan.

⁴ Maski Cristo okajkopilojkej ken xkipiyaskia poder, aman yejua nemi ikan ipoder Dios. No ijki tejuamej xtikpiyaj poder ken Cristo xokipix, pero iuan Cristo tinemiskej ikan ipoder Dios para temechpaleuiskej.

⁵ Sano nemejuamej kuajli xmixtlalokan para nenkitaskej tla nenmelajkanemij ipan nemotlaneltok. ¡Xmotlatlatakan! Ye nenkimatstokej ika Cristo nemi ipan nemoyojlo. Tla xnenkimatij ika Cristo nemi ipan nemoyojlo, tla ijkon, nemejuamej xmelauak nentlaneltokaj.

⁶ Niknekiskia para xmatikan ika tejuamej melauak titlaneltokaj.

⁷ Tejuamej tikchiuaj oración itech Dios para maka xchiuakan on tlen xkuajli. Tikchiuaj oración xpara tikteititiaj ika kuajli tikchiuaj totekiu, yej san tiknekij xchiuakan on tlen kuajli, maski oksekimej ma kinemilikan ika totekiu xitlaj* kijtosneki.

⁸ Xitlaj onkaj yejuan ika tikixnamikij on tlen melauak, yej nochi tikchiuaj para tikpaleuiyaj on tlen melauak.

⁹ Tejuamej tej, tipakiskej tla xnoneki chikauak temechcastigaroskej, pampa on kijtosneki ika kuajli nemouikaj. Niman tikchiuaj oración para más xmoyektlalijtiakan.

¹⁰ Nemechtlajkuiluiya in tlajkuilolamatl ijkuak xe nemechonta, para ijkuak nemotech najsis, maka nemopan yetiyas notlanauatil yejuan toTEKO onechmakak. Yejua onechmakak in tlanauatijli para nemechiskaltis ipan nemotlaneltok niman xpara nemechxoxotonis.

¹¹ Aman nokniuan, ikan in tlajtojli tlami nikijkuiloua in tlajkuilolamatl. Xpiyakan paktli. Xtejtemokan ken nenkichiuaskej nochi tlen kuajli. Xselikan on tlen yonemechijlij ipan in tlajkuilolamatl. San se tlamachilistli xpiyakan. Xpiyakan yolseuilistli, niman toDios yejuan kitemaka yolseuilistli niman tetlajsojtlalistli* nemouan nemis.

¹² Kuajli xmotlajpalokan inuan oksekimej ikan tetlajsojtlalistli*.

¹³ Nochimej on yejuan kineltokaj Dios mechtlajpalouaj.

¹⁴ Xselikan itlatiochiualis toTEKO JesuCristo niman itetlajsojtlalis* Dios. Niman ma nemi nemouan on Espíritu Santo. Ma ijki nochiua.