2 Corintios 11 - El Nuevo Testamento

Pablo kimanauiya itekiu intech on yejuan xmelauak apóstoles*

¹ Nikneki xnechijyouikan achijtsin nemejuamej ika on tlen nemechijlis maski kakisti ken achi niloco. Nemechtlajtlanilia, xnechijyouikan.

² Nejua nemechtlajsojtla* ika on tetlajsojtlalistli* yejuan Dios mechpiyalia. Nejua onemechtemakak para xmonamiktikan san iuan Cristo. Ijkon onikchiu para uelis nemechtemaktilis itech Cristo ken sen chipauak ichpochtli.

³ Pero ninomojtia tla nemotlamachilis mechkajkayauas ken on kouatl ikan itlakajkayaualis okajkayau Eva. Tla ijkon, xok nenkitlajsojtlaskej Cristo ikan nochi nemoyojlo.

⁴ Nejua tej, ninomojtia pampa nemejuamej kuajli nenkinseliaj on yejuan kipatlaj on temachtijli itechkopa Jesús, niman xijki ken tejuamej otemachtijkej. Niman nenkiseliaj sen espíritu niman sen temachtijli de temakixtilistli yejuan xijki ken on Espíritu Santo niman on kuajli tlajtojli yejuan kiteijlia ken Dios temakixtia yejuan onenkiselijkej de tejuamej.

⁵ Pero nejua xijki niknemilia ika on yejuan nenkinseliaj, yejuan noteneuaj sanoyej* uejueyixtokej apóstoles*, más ueyi kimatij xken nejua.

⁶ Maski xmás ueli nitenojnotsa, nikpiya tlaixmatkilistli itechkopa Dios. Ijkon nochipa yonemechititij ika on tlajtlamach* yejuan yonikchiu.

⁷ Ijkuak onemechmachtij on kuajli tlajtojli yejuan kiteijlia ken Dios temakixtia, xitlaj* onennechtlaxtlauilijkej. Nejua oninotekipanoj para ouel onemechmachitij. Ijkuak ijkon onikchiu, ¿onitlajtlakoj?

⁸ Se ueliskia kijtoskia ika onikinkuilij on oksekimej tiopanmej para onemechmachtij, pampa yejuamej onechpaleuijkej ikan tomin para ouel onemechpaleuij.

⁹ Chika nemotech oninen, niman nechpolouaya tlinon ika ninopanoltis, xitlaj* onemechtlajtlanij, pampa on tokniuan yejuan oualejkej Macedonia onechmakakej on tlen nechpolouaya. Xonemechtlajtlanij nemejuamej on tlen nechpolouaya, niman xkaman nemechtlajtlanis.

¹⁰ Nejua kuajli nikmatstikaj ika melauak nikixmati on tlen melauak itechkopa Cristo. No kuajli nikmatsitikaj ika xakaj nechkuilis on ueyilistli yejuan nikpiya ika xkaman nikselis tomin ipan on región de Acaya.

¹¹ ¿Tline* tej, ijkin nikijtoua? ¿Tlen manin yej xnemechtlajsojtla? Dios kimatstikaj ken sanoyej nemechtlajsojtla*.

¹² Ijkon ken aman nikchiua, ijki nochipa nikchiuas, para maka nikinkauilis on oksekimej yejuan noteneuaj apóstoles* noueyiteneuaskej ika kichiuaj itekiu Dios ken tejuamej tikchiuaj.

¹³ Yejuamej tej, kijtouaj ika apóstoles* pero xmelauak apóstoles*. Yejuamej tekitij para tlakajkayauaj. Yejuamej nixpatlaj ken apóstoles* para mechtlaneltokiltiskej ika yejuamej no melauak apóstoles*.

¹⁴ Niman in xitlaj yenkuik kemach onesiko, pampa Satanás sano yejua nixpatla ken sen chipauak ángel.

¹⁵ Yejua ika, xnechtlatlachaltia tla itekitkauan no nixpatlaj ken kuajkualtin tlakamej. Pero yejuamej kiseliskej intlaxtlauil ken noneki ika on tlen kichiuaj.

Pablo noueyiteneua ika on ken yotlajyouijtinen

¹⁶ Oksejpa tej, nemechijlia: maka yakaj ma kinemili ika nejua niloco. Pero tla nenkinemiliaj ika nejua niloco, xnechkauilikan ma nemechnotsa ken yakaj loco para no uelis achijtsin ninoueyiteneuas.

¹⁷ In tlen nemechijlijtikaj xnemechijlia ikan itlanauatil toTEKO, yej nemechijlia ken sen loco, pampa ninoueyiteneua.

¹⁸ Niman pampa nemij miyekej yejuan noueyiteneuaj ken on tlaltikpaktlakamej yejuan xkixmatij Dios, nejua no ninoueyiteneuas.

¹⁹ Nemejuamej nenkinemiliaj nentlamatkej*, pero nenkinmijyouiyaj on yejuan locos.

²⁰ Nemejuamej yej nenkinmijyouiyaj on yejuan mechchiualtiaj xkintekichiuilikan ken nenesclavos yeskiaj. Yejuamej mechtominkualijtokej, mechnoyaxkatiaj*, xmechnekij, niman mechxayakauitekij.

²¹ Hasta nipinaua nikijtos ika tejuamej xotitoyolchikajkej para ijkon temechchiuiliskej. Nochi tlajtlamach* yejuan oksekimej ueli ika noueyiteneuaj, nejua no ueli ika ninoueyiteneua, maski in tlen nikijtoua nikijtoua ken yakaj loco.

²² ¿Noueyiteneuaj ika hebreos*? Nejua no nihebreo. ¿Noueyiteneuaj ika ualejtokej intech iuejkakoneuan Israel? Nejua no niiuejkakoneu Israel. ¿Noueyiteneuaj ika ualejtokej itech Abraham? Nejua no niualejtikaj itech Abraham.

²³ ¿Noueyiteneuaj ika kitekichiuiliaj Cristo? Nejua no niktekichiuilia Cristo más xken yejuamej. (Nikmati ika ijkon ken nikijtoua, kakisti ken niloco.) Nejua tej, más sanoyej yonitekit xken yejuamej, más miyekpa yonechmajmakej xken yejuamej, más miyekpa yonechtsajtsakukej, niman miyekpa nisiu katka para nimikis.

²⁴ On hebreos* makuilpa onechuijuitekej hasta treinta y nuevejpa.

²⁵ Yexpa onechtlakouijuitekej, niman sejpa onechtemojmotlakej. Yexpa opolak on barco yejuan ipan niaya. Niman sejpa se yeuajli niman se tonajli oninen ipan mar kampa tlajkotian.

²⁶ Miyekan yoniajkaj, miyekpa namimikiskia ipan ríos, niman nechmiktiskiaj on tlachtekkej. Niman miyekpa nechmiktiskiaj on nochannekauan* hebreos*, niman no on yejuan xhebreos*. Ueliskia nimikiskia ipan uejueyikalpanmej, ipan on xalpatlajkan, ipan mar, niman intech on yejuan noteneuaj ika tokniuan pero xmelauak tokniuan.

²⁷ Yonikpanok miyek tekitl niman pajsolouilistli. Miyekpa hasta xnechmaka tiempo nikochis. Nejua yonikijyouij apistli niman amiktli. Miyekpa xonitlakuaj. Sanoyej yonikpanok sekutli, niman xonikpix tlakentli*.

²⁸ Nochi in nopan onochiu. Pero no mojmostla nopan yetiya nochi on tlen nikomatstikaj intech nochimej on yejuan tlaneltokaj nouiyan.

²⁹ Tla yakaj kualo, ken nejua no nikualoskia. Niman tla yakaj kitlajkali sen tokniu ipan tlajtlakojli, nechyolkokoua niman nechkualania.

³⁰ Tla noneki para ninoueyiteneuas, ninoueyiteneuas ika on tlajtlamach* yejuan kiteititiaj ika xnikojtik.

³¹ Dios yejuan iTajtsin toTEKO JesuCristo, yejuan para nochipa noneki kiselis yekteneualistli, kimatstikaj ika nikijtoua tlen melauak.

³² Ijkuak oninen Damasco, on gobernador, yejuan kipaleuiya on rey itoka Aretas, okintlalij soldados ipan itsakuijlouan* on ueyikalpan para nechajsiskiaj ijkuak ompa nikisaskia.

³³ Pero onechtemoltijkej ikan sen ueyi chikiutli ipan sen ventana yejuan onkaj ipan itepanchinan on ueyikalpan. Niman ijki onicholoj intech on soldados.