2 Corintios 10 - El Nuevo Testamento

Pablo kimanauiya itekiuajyo yejuan kipiya ken apóstol

¹ Nejua, Pablo, nemechnotsa ken Cristo kichiuaskia ikan iyolyemanilis niman itetlajsojtlalis*. Sekimej kijtouaj ika niyolyemanki* ijkuak ompa ninemi nemouan, pero ijkuak xompa ninemi nemouan chikauak nemechnotsa ipan notlajkuilolamau.

² Yejua ika, ijkuak nemechonnotsas, nemechtlajtlanilia maka nennechchiualtiskej chikauak nemechnotsas. Niuelis ijkon nikinnotsas on yejuan techijtouiliaj ika titouikaj ken on tlaltikpaktlakamej yejuan xtokniuan niman xken tlanauatia Dios.

³ Maski tejuamej titlaltikpaktlakamej, tejuamej xtitouijsokij ken on oksekimej tlakamej ipan in tlaltikpaktli kichiuaj.

⁴ On armastin yejuan tikintekitiltiaj ijkuak teuan titouijsokij xkenomej inarmas on oksekimej tlaltikpaktlakamej. On armastin yejuan tikintekitiltiaj kipiyaj ipoder Dios niman ueli kixoxotoniaj ipoder on diablo*.

⁵ Ijkon tej, tikxoxotoniaj nochi on xkuajli tlateixpanuijli yejuan ika techixnamikij. Tikxoxotoniaj on noueyimatilistli yejuan kichiua para se xueli kiselia kajsikamatilistli itech ika Dios. Intlamachilistli nochi tlakatl tikchiualtiaj ma kitlakamati Cristo.

⁶ Niman ijkuak nemejuamej kuajli ye nenkitlakamatij Cristo, tikincastigaroskej nochimej yejuan xkitlakamatij.

⁷ Nemejuamej san nenkitaj on ken se tlajtlacha noso tlajtlajtoua. Tla yakaj kuajli kimatstikaj ika iuan Cristo nopoua, tla ijkon, noneki kelnamikis ika tejuamej no ijki iuan Cristo titopouaj.

⁸ Maski nejua achi ninoueyiteneua ika on totlanauatil yejuan tikpiyaj, xitlaj* ika nipinaua pampa toTEKO otechmakak in tlanauatijli para temechiskaltiskej ipan nemotlaneltok, niman xpara temechxoxotoniskej.

⁹ Xnikneki ma kakisti ken nemechmomojtisneki ikan notlajkuilolamauan.

¹⁰ Sekimej kijtouaj ika ipan notlajkuilolamauan sanoyej nitlauelej niman nitlajtolkojtik, pero ijkuak nemouan ninemi, xnejli nitlajtolkojtik niman notlajtol xakaj kimojmojtia.

¹¹ Pero on yejuan ijkon kijtoua, ma kimatstia ika ijkon ken titlajtolkojtikej ijkuak uejka temechtlajkuiluiyaj, no ijki tikchiuaskej ijkuak nemouan tinemiskej.

¹² Xkaman tiknemiliaj titotlaniskej nion titotlatlataskej inuan on yejuan noteneuaj sanoyej kuajkualtin tlakamej. Ijkuak se teuan notlatlani niman teuan notlatlata kiteititia ika semi xtlamatki*.

¹³ Tejuamej xtitoueyiteneuaskej ika on tlen xtechtocaroua, yej san tiktekitiltiskej on tlanauatijli yejuan Dios otechmakak. Niman yejua otechmakak on tlanauatijli para titekitiskej nemouan.

¹⁴ Tejuamej xtitoueyiteneuaj ika on tlen xtechtocaroua. Ijki yeskia tla xachtopa tejuamej temechonmachtiskiaj. Pero tejuamej achtoj otemechmachistitoj on kuajli tlajtojli yejuan kiteijlia ken Dios temakixtia.

¹⁵ Niman xkaman tiktoyaxkatiaj* on tekitl yejuan oksekimej yokichijkej. Yej titlamachaj* más ma noskalti nemotlaneltok niman ijkon más ueyi yes totekiu nemouan, pero nochipa titekitiskej kampa techtocaroua.

¹⁶ Ijkuak más ueyi yes totekiu nemouan, ye uelis tikonteijliskej on kuajli tlajtojli yejuan kiteijlia ken Dios temakixtia neka kampa más uejuejka de nemejuamej. Pero xkaman titoueyiteneuaskej ika otikchijkej on tekitl yejuan oksekimej yokipeualtijkej.

¹⁷ Maka ma yakaj noueyiteneua ikan itekiu, yej ma noueyiteneua ika on tekitl yejuan toTEKO kichiua itechkopa.

¹⁸ Ijkon xchiuakan, pampa sen tlakatl xkitlakaitaj tla sano yejua noueyiteneua, yej kiselia tekaitalistli ijkuak Dios kiueyiteneua ika okichiu tlen kuajli.