2 Corintios 1 - El Nuevo Testamento

Pablo okintlajkuiluij on tlaneltokakej

¹ Nejua, Pablo, niiapóstol* JesuCristo pampa Dios ijki okinek onechtlalij. Nejua iuan tokniu Timoteo temechtlajkuiluiyaj nemejuamej tokniuan yejuan nennemij ipan itiopan Dios ompa ipan on ueyikalpan Corinto, niman para nochimej yejuan tlaneltokakej itech Dios yejuan chantij imanian on iueyitlalpan Acaya.

² Ma Dios toTajtsin niman toTEKO JesuCristo mechtiochiuakan niman ma mechmakakan yolseuilistli.

Pablo okimakak tlaxtlauijli Dios

³ Ma tikyekteneuakan toTajtsin Dios yejuan iDios niman iTajtsin toTEKO JesuCristo, pampa yejua techiknelijtikaj niman nochipa techyoltlalijtikaj.

⁴ Dios techyoltlalia ipan nochi on tlen tikijyouiyaj, para tejuamej no uelis tikinyoltlaliskej on yejuan kipiyaj tlajyouilistli. Niman tikinyoltlaliskej sano ika on teyoltlalijli yejuan Dios ika techyoltlalia.

⁵ Ijkon ken miyek tlajyouilistli yejuan uajlau ipan Cristo no topan uajlau, no ijki itechkopa Cristo tikseliaj sen ueyi teyoltlalijli.

⁶ Niman tla tejuamej titlajyouiyaj, titlajyouiyaj san para nemejuamej xselikan on teyoltlalilistli niman on temakixtilistli. Niman tla Dios techyoltlalia, techyoltlalia san para nenkipiyaskej teyoltlalilistli niman temakixtilistli. Ijkon tej, uelis nenkixikoskej ikan ijyouilistli sano yejua on tlajyouilistli yejuan tejuamej tikijyouiyaj.

⁷ Tikpiyaj sen melajki tlamachalistli* nemotechkopa, pampa tikmatij ika ijkon ken nentlajyouiyaj ken tejuamej, no ijki nenkiseliskej sano yejua on teyoltlalilistli ken tejuamej.

⁸ Aman tej nokniuan, tiknekij xmatikan on tlen temojtij tlajyouilistli otikpixkej neka iueyitlalpan Asia. Otikpixkej tlauejli sanoyej* ueyi hasta xok ueliya tikxikouaj niman hasta tiknemiliayaj ompa timikiskej.

⁹ Titomatiyaj ken on yejuan yokintlajtlakolmakakej para ma mikikan. Pero in onochiu para maka san tejuamej ma titonmatikan, yej para ma tiktlalikan toyojlo san itech Dios yejuan kinyoliuitia on mikatsitsimej.

¹⁰ Dios otechmakixtij de on ueyi temojtij mikilistli, niman ijki techmakixtijtias. Yejua tej, itech tiktlaliaj nochi toyojlo ika techmakixtijtias,

¹¹ tla nemejuamej nentechpaleuiyaj ikan nemooraciones. Niman tla miyekej topampa kichiuaj inoraciones, no miyekej kimakaskej tlaxtlauijli Dios ipampa on tlatiochiualistli yejuan techmaka ijkuak yokinankilij nemooración.

Pablo okinmijlij tline xokinnotsato

¹² Sanoyej techpaktia temechijliaj ika totlamachilis techmachistia ika nochipa titouikaj yolchipajkej, niman yolmejlajkej pampa Dios techpaleuiya. Ijkon tej, titouikaj iuan nochi tlakatl, niman hasta más nemouan. Ijkon titouikaj xpampa techyekana totlamatkilis*, yej pampa techyekana iueyitetlajsojtlalis* Dios yejuan xtechtocarouaya tikseliskej.

¹³ Ipan totlajkuilolamauan xitlaj* okse temechijkuilouiliaj, yej san on yejuan ueli nenkimomachtiaj niman nenkajsikamatij. Niman temechnekiliaj para no uelis nenkajsikamatiskej tline* ijkin titouikaj.

¹⁴ Aman xmás nenkajsikamatij tline ijkin titouikaj. Pero tiknekij para kuajli nenkajsikamatiskej para on tonajli ijkuak uajlas toTEKO Jesús, uelis nenpakiskej topampa sano ijki ken tejuamej tipakiskej nemopampa.

^15-16 Kuajli nikyolmatstikatka ika nennechseliskej. Yejua ika, oniknemilijka nemechnotstikisaskia ijkuak niaskia para Macedonia, niman no ijkuak niuajnokuepaskia oksejpa nemechajnotstikisaskia. Ijkon tej, ueliskia nemechpaktiskia okpa. No ijki, ijkuak niuajnokuepaskia, ueliskia nennechpaleuiskiaj ika on tlen nechpoloskia ijkuak niaskia ne Judea.

¹⁷ Ijkuak onemechtlajkuiluij ika oniknemilij nemechontas, sekimej nemejuamej onenkinemilijkej ika xikan kuajli noyojlo onemechijlij, pampa xonemechitato ken onemechtlajkuiluij ika nikchiuas. ¿Nemejuamej nenkinemiliaj ika ijkuak niknemilia itlaj nikchiuas, niknemilia ken yakaj tlakatl yejuan más sakin* notlajtolpatla?

¹⁸ Ijkon ken Dios nochipa kichiua tlen kijtoua, nejua no ijki xkaman nemechijlia “kemaj nemechonnotsas” niman nojtikopa uej niknemilijtikaj ika xnias.

¹⁹ Ijkon nikchiua pampa JesuCristo iKonetsin Dios, yejuan Silvano, Timoteo niman nejua ika titemachtiaj, xkaman okijtoj itlaj kichiuas, niman kemaj ijtikopa kinemilijtikaj itlaj okse kichiuas. Itlajtol Cristo nochi kuajli melauak nochiua.

²⁰ Cristo tej, ocumpliroj nochi ipromesas Dios. Yejua ika ipampa Cristo tikijtouaj: “Ma ijki nochiua.” Niman ijkon Dios kiselia ueyilistli.

²¹ Niman sano yejua Dios yokimelajkatlalij toyojlo niman nemoyojlo itech Cristo niman itech tiyektitokej.

²² Yejua yotechtlalilij isello yejuan kiteititia ika itech titeyaxkauan*, niman ipan toyojlo yokuajtitlan iEspíritu Santo yejuan techititijtikaj ika melauak tikseliskej nochi on tlatiochiualistli yejuan otechprometerouilij.

²³ Aman tej, niktestigojtlalia Dios. Xoniaj Corinto ken oniknemilijka, pampa xoniknek nemechajmanas.

²⁴ Tejuamej xtiknekij temechnauatiskej ken nentlaneltokaskej, pampa nemotlaneltok ye melajki onkaj itech Cristo. Yej titekitij para xpiyakan pakilistli.