1 Timoteo 6 - El Nuevo Testamento

¹ Yejuamej on yejuan nemij esclavos, ma kipiyakan miyek tetlakaitalistli itech inteko para maka itlaj xkuajli kijtouiliskej Dios niman on totemachtil.

² Niman tla on esclavos kipiyaj inteko yejuan tlaneltokaj, maka ma kauakan ika kintlakaitakan pampa aman ken iknijtin ika on intlaneltok. Yej, noneki on esclavos, hasta más kuajli kichiuaskej intekiu, pampa aman kichiuaj on tekitl para on akin iuan notlajsojtlaj yejuan no kineltokaj Dios.

On xkuajli temachtijli niman tomin

³ Tla yakaj kitemachtia itlaj temachtijli yejuan xmelauak, niman xiuan yau on tlen melauak itemachtil toTEKO JesuCristo niman no xiuan yau on tlen chipauak,

⁴ on sen noueyimatki yejuan xitlaj* kimati. Yej kipiya ken xkuajli kualolistli para teuan kinijixkomaka* tlajtlamach* niman notentlani ikan tlajtoltin. Yejua ika on, peua nexikojli, tlauejli, tsajtsilistli, xkuajli ome tlamatilistli,

⁵ niman nochipa iminuan nokualania on tlakamej yejuan ijtlakauki intlamachilis niman xkimatij on tlen melauak. Yejuamej kinekij kitlaniskej tomin para ricojtiskej itechkopa in tlaneltoktli. Xkintlalkaui on kenomej.

⁶ Melauak on ken se tlaneltoka yejua ueyi riqueza, tla se paki san ika on kechkich kinopiyalia,

⁷ pampa xitlaj* otikuajkikej ipan in tlaltikpaktli, niman ijkuak timikiskej xitlaj* tikitkiskej.

⁸ Yejua ika tej, tla tikpiyaj tlen tikuaj niman no tikpiyaj totlaken, ma tipakikan san yejua ika on.

⁹ Pero on yejuan kinekij ricojtiskej, xkixikouaj on tetlatlatalistli yejuan kintlajkali ipan tlajtlakojli. Yejuamej kipiyaj miyek xkuajli ineleuilis* yejuan kinuika kampa teyolkokoj niman kampa xoxotonij.

¹⁰ Pampa ijkuak se sanoyej kixtlajsojtla* tomin, ompa peua nochi tlajtlamach* tlen xkuajli. Niman sekimej yejuan okeleuijkej tomin, okipolojkej intlaneltok, niman kipiyaj miyek ajmantli ipan innemilis.

Pablo okinauatij Timoteo tlinon kichiuas

¹¹ Pero tejua, yejuan tikuajli tlakatl itech Dios, xtlalkaui nochi on tlajtlamach*. Yej xpiya yolmelaualistli, yolchipaualistli, tlaneltokalistli, tetlajsojtlalistli*, ijyouilistli, niman yolyemanilistli*.

¹² Xchiua kanika para tikchiuas on tlen technauatia totlaneltok. Xmoyaxkati* on nemilistli yejuan para nochipa, pampa yejua ika Dios omitsnots, niman kuajli otikijtoj imixpan miyekej tlaneltokakej ika tikneltoka.

¹³ Aman, ixpan Dios yejuan kimaka nemilistli nochi tlen yoltikaj, niman no ixpan JesuCristo, yejuan sanoyej* kuajli oteixpantilij on tlen melauak ixpan Poncio Pilato, nimitstlatkitia:

¹⁴ xtlakamati itlanauatil Cristo ikan nemonemilis chipauak para maka yakaj mitsteneuilis tlen xkuajli hasta kaman uajlas toTEKO JesuCristo.

¹⁵ Ijkuak yejkos on kuajli tiempo, Dios kuajtitlanis JesuCristo. Dios san yejua iselti ueyi tlanauatijketl yejuan tlatiochijketl, san yejua Dios yejuan nochi ueli kichiua, niman yejua Rey impan nochimej reyes niman inTEKO nochimej on tetekouan.

¹⁶ San yejua xkaman mikis. Yejua nemi tlauilpan kampa xe yakaj ueli ajsi. Yejua xe kaman yakaj kita niman xkaman ueli kitaj. Yejua ika tej, yejua ma kiseli tetlakaitalistli niman ueyilistli para nochipa. Ma ijki nochiua.

¹⁷ On yejuan kipiyaj miyek tlajtlamach* nikan tlaltikpak, xkinnauati maka ma noueyimatikan, nion ma kitlalikan inyojlo itech on miyek tlen kipiyaj, pampa on san panos. Más kuajli tla yej itech Dios kitlaliskej inyojlo. Yejua yoltikaj niman techmakatikaj nochi tlen ika tompanotokej para kuajli tinemij.

¹⁸ Xtlanauati ma kichiuakan tlen kuajli, ma nochiuakan ricos ikan nochi kuajli tekitl niman ma kipiyakan inyojlo para kitemakaskej niman kitexelouiliskej on tlen kipiyaj.

¹⁹ Ijkin tej, kisentlalijtiaskej miyek tlajtlamach* ne iluikak kampa yejyejtias kuajli. Niman on melauak yes. Ijkon tej, yejuamej ueliskej kipiyaskej nemilistli on yejuan melauak nemilistli para nochipa.

Sa ika nochi tlaktitijli para Timoteo

²⁰ Timoteo, xkejeua tlen omitstlaktitijkej. Maka xkaki tlen xchipauak niman xitlaj* kijtosneki yejuan kijijtouaj on tlaltikpaktlakamej. Nion maka xkaki on xkuajli temachtiltin yejuan sekimej kitejteneuaj tlaixmachilistli pero xnejli tlaixmachilistli.

²¹ Sekimej okineltokakej on tlen xnejli niman okipolojkej intlaneltok. Ma Dios mitsmaka itlatiochiualis. Ma ijki nochiua.