1 Timoteo 5 - El Nuevo Testamento

Kenijki timouikas inuan on tlaneltokakej

¹ Maka xkajua yejuan ueuentsin, yej xtlakanonotsa ken yakaj motataj yeskia. Niman on telpokamej, xkinnotsa ken mokniuan.

² On lamajtsitsimej kuajli inuan xmouika ken timouikaskiaj iuan monanaj, niman on ichpokamej no inuan xmouika ken mokniuan yeskiaj ikan nochi chipaualistli.

³ Xkintlakaita niman xkimpaleui on siuakaualtsitsimej* yejuan melauak xitlaj* kipiyaj.

⁴ Pero tla sen siuakaualtsintli kipiya ikoneuan noso ixuiuan, yejuamej ma kintekipanokan infamilia ken kitocaroua. Ijki tej, kintlajsojkamachiliskej on tlen achtopa yejuamej okiselijkej de intajuan ijkuak kojkonej katkaj. Yejua in sanoyej* kuajli niman kixpakaita Dios.

⁵ Sen siuatl yejuan melauak kaualtsintli yejuan yonokau iselti, san kitlalia itlamachalis* itech Dios. Yejua nochipa kichiua oración niman kinotlajtlanilijtikaj para ma kipaleui ikan tonajli niman yeuajli.

⁶ Pero on siuakauajli* yejuan nemi para nopaktis, yejua ken miktikaj ixpan Dios maski nemi.

⁷ Ijkin xkinnauati on siuakaualtsitsimej niman infamilia ixpan on tlaneltokakej para maka itlaj kinteneuiliskej.

⁸ Tla yakaj xkintekipanoua on yejuan ken kinta, niman más on yejuan ifamilia, tla ijkon tej, xkichiua tlen technauatia totlaneltok, niman kichiua más xkuajli xken on yejuan xtlaneltoka.

⁹ Maka tiktlalis ipan lista sen siuakaualtsitsintli yejuan xe kaxitia 60 xipan, niman tla okipix san sentetl iueuentsin,

¹⁰ niman tla nochimej kuajli kimatij ika okichiu miyek tekitl yejuan kuajli. In kijtosneki tla kuajli okinyekan ikoneuan, tla ipan ichan kuajli kinselia on yejuan xchanejkej, tla kinmikxipajpaka on ikoneuan Dios ikan yolyemanilistli*, tla kimpaleuiya on yejuan tlajyouiyaj, niman tla kichiua nochi tlen kuajli tekitl.

¹¹ Pero maka tiktlalis ipan lista on siuakaualtsitsimej yejuan más kokonej, pampa tla xkixikouaj, kitlalkauiyaj Cristo niman oksejpa nonamiktiaj.

¹² Niman onkisaj tlajtlakolejkej pampa xkichiuaj on tlen okijtojkaj kichiuaskej.

¹³ Yejuamej peuaj kajkalaktinemij techajchan, niman nokuepaj tlatsijkej, niman chakuamej, niman nochi ika nokalaktiaj niman peua tlamach kijijtouaj yejuan xkitocaroua kijtoskej.

¹⁴ Yejua ika, nikneki on siuakaualtin yejuan kokonej ma nonamiktikan, ma tlaskaltikan, ma kuajli tlachakan inkalijtik, niman maka ma kauilikan on totlauelikniu para ma techistlako.

¹⁵ Sekimej siuakaualtin yonoxelojkej, niman kichiuaj tlen xkuajli niman ijki kitlakamatij on Satanás.

¹⁶ Pero tla saman yakaj yejuan tlaneltoka tlakatl noso siuatl kipiya siuakauajli* ipan ichan, ma yejua kitekipano. Maka ma impan yetiya nochimej on tlaneltokakej, para ijkon yejuamej oksekimej uelis kimpaleuiskej yejuan melauak xakaj impan tlacha.

¹⁷ On ueuetkej tlayekankej yejuan kuajli tlayekanaj intech on tlaneltokakej, yejuamej ma kintlakaitakan. Pero más ma kintlakaitakan on yejuan ika nokauaj tenojnotsaj ika on kuajli tlajtojli niman temachtiaj.

¹⁸ On Yektlajkuilojli kijtoua: “Maka xtensalo on uakax ijkuak kiteinia on trigo.” No ijki: “On tekitki kitocaroua kitlaxtlauiliskej.”

¹⁹ Ijkuak kiteixpanuiskej motech sen ueuetki tlayekanki itech tokniuan, maka xneltoka tlen kijtouaj tla xnemi ome noso yeyi testigo yejuan kijtoskej ika melauak okichiu on tlen xkuajli.

²⁰ Pero on yejuan xtlakakij, yej sanken* tlajtlakouaj, xkinmajua imixpan nochimej para ijkon on oksekimej ikoneuan Dios ma nomojtikan.

²¹ Nimitstlaktitia ixpan Dios niman toTEKO JesuCristo, niman imixpan on yektitokej ángeles tlatlapejpeniltin, xkintlakamati in tlanauatiltin. Maka san sekimej tikimpaleuis, nion maka yakaj tikchikoitas.

²² Achtoj xnemili kuajli antes tiktlalis momauan ipan yakaj para tikalaktis tlayekanki intech on tokniuan, para maka tikpiyas tlajtlakojli ipampa itlajtlakol. Nochipa xmejeua chipauak.

²³ Ijkon ken achi tikualo ipan mojti, maka san atl xkoni, yej no xkoni achijtsin vino.

²⁴ Intlajtlakol sekimej tlakamej nimantsin panesi ijkuak xe ajsi on tonajli para Dios tecastigaros. Pero intlajtlakol oksekimej xpanesi, yej hasta ajsis on tonajli ijkuak Dios tecastigaros.

²⁵ No sano ijki, on tlen kuajli tekitl nochiua, kamantika nimantsin panesi. Niman on xkuajli tekitl yejuan nochiua san ichtaka, yejkos tonajli ijkuak panesis.