1 Timoteo 4 - El Nuevo Testamento

On yejuan kitlalkauiyaj on tlaneltoktli

¹ Pero on Espíritu Santo kimelajkaijtoua ika ijkuak ye nisiu tlajtlalpoliuis, sekimej kitlalkauiskej intlaneltok. No ijki kintlakamatiskej on espíritus tlakajkayajkej, niman yejuamej kineltokaskej on xkuajli temachtiltin yejuan kisaskej intech demonios yejuan temachtiskej on xkuajli temachtijkej.

² On yejuan kitlalkauiskej intlaneltok, kinkakiskej on tlakamej yejuan omexayakyejkej niman tlakajkayajkej. On tlakajkayajkej xok noyolijmatiskej ijkuak tlamach xkuajli kichiuaskej, pampa intlamachilis yotepetlatiak niman ijkon xok ueli noyolkokouaj.

³ On tlakajkayajkej temachtiaj ika xkuajli nonamiktilos, niman ika xkuajli nokuas seki tlakuajli, maski Dios nochi okitlalij para on yejuan tlaneltokaj niman yokixmatkej on tlen melauak kiseliskej ikan tlaxtlauijli.

⁴ Ijkon tej, nochi tlen Dios okichijchiu nochi kuajli. Niman xkuajli para itlaj tikchichiuaskej, yej tikseliskej ikan tlaxtlauijli,

⁵ pampa ikan itlajtol toTajtsin niman ikan oración nokaua chipauak.

Sen kuajli tekitketl itech JesuCristo

⁶ Xkinmachti on tokniuan in tlajtlamach*, niman kuajli titekitki yes itech JesuCristo, niman xmoyolchikau ikan on tlajtojli de on tlaneltoktli niman de on kuajli temachtilistli yejuan tiktlakamati.

⁷ Maka xkinkaki on tlajtlamach* cuentojtlajtoltin yejuan kixnamiki on tlen melauak, yej xkejeko tikchiuas nochi tlen kuajli itechika Dios.

⁸ Tla tikchiua ejercicio, achijtsin mitspaleuiya ipan motlalnakayo. Pero tla tikchiua on tlen Dios kipaktia, nochi ika mitspaleuiya. Aman techmaka on tlen kuajli, niman no techmakas on tlen kuajli ipan okse nemilistli.

⁹ In tlajtojli sanoyej melauak, niman kuajli para nochimej kineltokaskej.

¹⁰ In yejua ika sanoyej titekitij niman tikijyouiyaj tlauejli, pampa san se toyojlo yotiktlalijkej itech on Dios yejuan yoltikaj, yejuan nochi tlakatl itemakixtijkau, niman más para yejuamej on yejuan kineltokaj.

¹¹ Yejua in tlajtlamach* ika onkaj tejua titlanauatis niman tiktemachtis.

¹² Motech ma kitakan on yejuan tlaneltokaj kenijki titlajtlajtoua, kenijki timouika, kenijki titetlajsojtla*, kenijki titlaneltoka, niman ika monemilis chipauak para ijkon xuelis yakaj mitspijpinauis pampa titelpochtli.

¹³ Chika nejua najsi, xmomachti itlajtoltsin Dios ne ixpan on tojlamej. Xkinyoleua niman xkinmachti.

¹⁴ Xtekitilti on tetlayokoliltin yejuan otikselij itech Dios ijkuak on ueuetkej tlayekankej itech tokniuan okitlalijkej inmauan mopan, niman omitsijlijkej on tlen okinmijlij on Espíritu Santo.

¹⁵ Xchiua in tlajtlamach*. Xchiua nochi niman san ika xmokaua, para ma kitakan nochimej kenijki timoskaltijtiu ipan motlaneltok.

¹⁶ Kuajli xkita ken timouikas niman kuajli xkita on tlen tiktemachtia. Nochipa ijkon xchiua. Tla ijkin tikchiuas, timomakixtis niman no tikinmakixtis on yejuan mitskakiskej.