1 Timoteo 3 - El Nuevo Testamento

On yejuan kinekij tlayekankej yeskej ixpan Dios

¹ In sanoyej* melauak, tla se kineki tekitis ken tlayekanketl ipan itiopan Dios, sanoyej kuajli on tekitl yejuan kineki kichiuas.

² Pero yej kemaj on yejuan kinekis tlayekanas ipan itiopan Dios ika onkaj kuajli nouikas para maka itlaj kijixkomakaskej*, san se isiuau ma kipiya, kuajli ma nouika, ma kitelti ixkuajlieleuilis*, ma kuajli nouika para kipiyaliskej tlakaitalistli, kuajli ma teseli ichan niman ma kuajli temachti.

³ No ijki maka tlauanis, nion kitejtemojtinemis tlauejli, nion kixpachos tetomin. Pero yej kemaj yejua ma tenotski niman ma yolyemanki*, niman maka sanoyej keleuis tomin.

⁴ Ma kuajli kimati kenijki kiyekanas ifamilia, niman ma kichiua para ikoneuan ma kitlakamatikan niman ma kitlakaitakan.

⁵ (Tla sen tlayekanki xkimati kenijki kiyekanas ifamilia, ¿kenijki uelis kinyekanas ikoneuan Dios?)

⁶ Xkuajli para tlayekanketl yes on yejuan kemach tlaneltoka, pampa uelis noueyimatis. Niman, tla ijkon kichiuas, Dios kitlajtlakolmakas niman kicastigaros ken okichiuilij on diablo*.

⁷ No ijki, noneki kuajli ma nouika para on yejuan xtlaneltokaj kitlakaitaskej para maka itlaj ika nopijpinajtis niman onuetsis ipan imauan on diablo*.

Ken noneki nouikaskej on diáconos* ipan itiopan Dios

⁸ No ijki on diáconos ipan itiopan Dios, ma nemikan ken uelis kintlakaitaskej, niman ma nochipa kijtokan on tlen melauak. Maka tlauaniskej, nion kinekiskej tomin yejuan san kitekuiliskej.

⁹ Ika onkaj kejeuaskej on tlen melauak yejuan Dios okipanextij. Ma kejeuakan kuajli para maka kintlajtlakolmakas inchipajkatlamachilis.

¹⁰ Achtopa ma kintlatlatakan, niman tla xokichijkej on tlen xkuajli, kuajli para yejuamej diáconos yeskej itech Dios.

¹¹ No ijki insiuauan on diáconios noneki kipiyaskej tlakaitalistli, niman maka tlajtolchijchijkej. Ma kuajli noyekanakan, niman ma nouikakan kuajli ipan nochi.

¹² Sen tlakatl diácono, kipiyas san se isiuau, niman kuajli kinyekanas ikoneuan niman nochimej yejuan chantij ipan ichan.

¹³ On diáconos yejuan kuajli kichiuaj intekiu, kitlanij tetlakaitalistli, niman no kipiyaj más tlaneltokalistli itech Cristo Jesús.

On tlen ueyi kijtosneki totlaneltok

¹⁴ Nikneki para saniman nias nimitsontas, pero achtoj nimitstlajkuilouiya in tlajtlamach*,

¹⁵ para tla saman ninouejkauas, in tlajkuilojli mitsititia kenijki noneki se nouikas ipan ichan Dios. On ichan Dios kijtosneki on yejuan tlaneltokaj itech Dios yejuan melauak yoltikaj. Niman yejuamej kejeuaj niman kimanauiyaj on tlen melauak.

¹⁶ Tinochimej tikmatij ika on tlen iyantikatka* yejuan Dios otechititij itechkopa totlaneltok sanoyej ueyi kijtosneki: Dios ouajlaj ken sen tlakatl; on Espíritu Santo okiteititij ika yejua chipauak. On ángeles okitakej. Okitemachistijkej ipan tlaltikpaktli. On tlakamej okineltokakej nochiuiyan ipan in tlaltikpaktli. Niman kemaj okuikakej iluikak.