1 Timoteo 2 - El Nuevo Testamento

Kenijki noneki kichiuaskej oración

¹ In yejua achtoj nemechtlajtlanilia, tlajtlamach* xtlajtlanilikan Dios on tlen poliui, xchiuakan oración impampa oksekimej, niman xmakakan tlaxtlauijli Dios ipampa on tlin kichiua para nochi tlakatl.

² Xchiuakan oraciones impampa on reyes, impampa nochimej on uejueyitekiuajkej, para ijkon kuajlotika tinemiskej ikan yolseuilistli. Niman ijkon uelis kuajli tinemiskej ken Dios tlanauatia, niman oksekimej ueliskej techtlakaitaskej.

³ In yejua kuajli niman kuelita Dios toTemakixtijkatsin,

⁴ yejuan kineki nochi tlakatl ma makisa niman ma kimati on tlen melauak.

⁵ San se nemi Dios, niman no san se nemi yejuan impampa tlajtoua on tlakamej ixpan Dios, in yejua JesuCristo.

⁶ Yejua ika, onotemakak ma kimiktikan para ijkon okitlaxtlau on castigo de tlajtlakojli, niman ijki okimakixtij nochi tlakatl. Ijkuak oyejkok on tiempo yejuan Dios okitlalij, Jesús omik para okipanextij ika yejua kineki nochi tlakatl ma makisa.

⁷ Yejua ika in, Cristo Jesús onechkalaktij ken itenojnotskau, iapóstol* niman temachtijketl intech on yejuan xhebreos* para nikinmachtis ika on tlaneltoktli niman on tlen melauak. Nejua nikijtoua tlen melauak itech Cristo, niman xnitekajkayaua.

⁸ Yejua ika, nikneki nochiuiyan on tlakamej ma kichiuakan oración. Ma ketsteuakan inmauan ika chipauak inyojlo, niman maka ma tlauanikan, nion maka ma nokamauijsokikan.

⁹ No ijki nikneki on siuamej maka ma texixikoltikan ken notlakentiaj, nion ken kualnextikaj intson. Maka ma notlajmachyotikan* ikan oro nion ikan perlas*, nion maka ma kitlalikan tlakentli* yejuan sanoyej patioj.

¹⁰ Yej, ma kichiuakan kuajli tekitl ijkon ken kitocaroua kichiuaskej on siuamej yejuan kitlakaitaj Dios.

¹¹ On siuamej ijkuak kakiskej on temachtijli, maka ma nauatikan, yej san ma tlakakikan ikan yolyemanilistli.

¹² Nejua xnikauilia sen siuatl ma temachti nion ma kimandaro tlakatl, yej maka ma nauati,

¹³ pampa Dios achtopa okichijchiu Adán niman kemaj Eva.

¹⁴ Niman on diablo* xokajkayau Adán, yej okajkayau Eva, niman yejua ouets ipan tlajtlakojli.

¹⁵ Pero on siuatl nomakixtis ijkuak kinnemitis ikoneuan, tla nochipa tlaneltokas, niman tetlajsojtlas*, niman tla kipiyas yolchipaualistli, niman maka ma texixikolti.