1 Timoteo 1 - El Nuevo Testamento

Pablo okitlajkuiluij Timoteo

¹ Nejua, Pablo, niiapóstol* JesuCristo ikan itlanauatil Dios toTemakixtijkatsin niman toTEKO JesuCristo yejuan totlamachalis*.

² Nimitstlajkuiluiya in tlajkuilolamatl, Timoteo, notlajsojkakonetsin itech JesuCristo. Ma Dios toTajtsin niman Cristo Jesús toTEKO ma mitsmakakan inueyitlajsojtlalis niman inteiknelilis* niman inyolseuilis.

Pablo kinteneua on xkuajkualtin temachtijkej

³ Nikneki xmokaua Éfeso sano ijki ken onimitsnauatij ijkuak nejua oniaj para Macedonia. Xmokaua niman xkinnauati on tlakamej yejuan temachtiaj on tlaixkajkayajki temachtijli maka más ma kitemachtikan.

⁴ Xkinnauati maka más ma kinkakikan on tlajtoltin* yejuan kixnamikij on tlen melauak niman intech on tokayomej de on achtotatajtin. In xtechpaleuiya tikchiuaj itekiu Dios yejuan tikchiuaj itechkopa totlaneltok, yej san ika nokamauijsokilo.

⁵ Ijkin xkinnauati para yejuamej ma notlajsojtlakan* cada se iuan oksekimej ikan yolchipaualistli, niman chipajkatlamachilistli, niman tlaneltokalistli yejuan melauak.

⁶ Sekimej okitlalkauijkej in kenin tlen kuajli niman onopopolojkej ika on kamauijsokilistli yejuan xitlaj* kijtosneki.

⁷ Yejuamej kinekij temachtijkej yeskej ikan itlanauatil Moisés, maski yejuamej xkajsikamatij tlinon kijtouaj, kitemachtiaj ken kuajli kajsikamatij.

⁸ Tikmatstokej ika on tlanauatijli kuajli, tla se kitekitiltia ken Dios kineki para notekitiltis.

⁹ No tikmatstokej ika nion se tlanauatijli xonijkuiloj para yejuan kuajli tlakatl. On tlanauatijli onkaj para on xompayejyeuamej, yejuan xtetlakamatij, on xkuajkualtin tlakamej, on tlajtlakolejkej, on yejuan xyolchipajkej, on yejuan xkitlakaitaj Dios nion itlanauatil, on yejuan kimiktiaj itataj noso inanaj, niman nochimej yejuan temiktijkej.

¹⁰ No ijki on tlanauatijli onkaj para on yejuan auilnemij, on tlakamej yejuan kineleuiyaj tlakamej, noso on siuamej yejuan kineleuiyaj siuamej, on yejuan kimichtekij tlakamej, on yejuan xkijtouaj on tlen melauak, niman para on yejuan xkuajli testigo kisaj. Niman on tlanauatijli no onkaj para nochi on yejuan xkinekij nouikaskej ipan on yektitikaj temachtijli.

¹¹ Yejua in yektitikaj temachtijli kuajli nouika iuan on kuajli tlajtojli yejuan Dios tlatiochijketl onechmaktilij para nikteijlis.

Pablo kipiya tlajsojkamachilistli ipampa iteiknelilis* Dios

¹² Nikmaka tlaxtlauijli toTEKO JesuCristo yejuan onechmakak poder, pampa yejua onechititij ika kitlalia iyojlo notech ijkuak onechtlalij ipan itekiu.

¹³ Maski nejua achtopa onikijtouilij Cristo tlen xkuajli, niman oniktlaueltotokatinen niman nikpijpinauiyaya, yejua sanoyej* onechiknelij*, pampa nejua xe nitlaneltokaya niman xnikmaktiya tlinon nikchiuaya.

¹⁴ Yejua ika, toTEKO onechmakak iueyitetlajsojtlalis* yejuan xnechtocarouaya nikselis, niman no onechmakak tlaneltoktli niman tetlajsojtlalistli* yejuan tikpiyaj pampa tinemij san sekan iuan Cristo Jesús.

¹⁵ Yejua in tlajtojli sanoyej melauak niman kuajli para nochimej kineltokaskej, ika Cristo Jesús ouajlaj ipan in tlaltikpaktli para okinmakixtiko on tlajtlakolejkej. Nejua tej, más niueyi tlajtlakolej xken nochimej tlajtlakolejkej.

¹⁶ Yejua ika, Dios onechiknelij, nejua yejuan más niueyi tlajtlakolej, para JesuCristo ouel okiteititij nochi iijyouilis. Ijkon tej, nejua niejemplo para yejuamej on yejuan kineltokaskej JesuCristo niman kipiyaskej nemilistli para nochipa.

¹⁷ Yejua ika, ma tikmakakan nochi on tetlakaitalistli niman ueyilistli para nochipa on toueyiRey yejuan nemi nochipa, yejuan xkaman mikis, yejuan xueli tikitaj, yejuan san yejua Dios. Ma ijki nochiua.

¹⁸ Aman nokoneu Timoteo, nejua nimitsnauatia: Kuajli xmouika ipan on tlen on tiotlajtojkej achtoj okijtojkej moka tejua. Xchiua kanika para tiuelis tikchiuas itekiu toTEKO ken sen kuajli soldado.

¹⁹ Xkejeua motlaneltok niman no xkejeua mochipajkatlamachilis. Sekimej xokichiuilijkej cuenta inchipajkatlamachilis. Yejua ika okipolojkej intlaneltok.

²⁰ Ijkon ipan onochiu Himeneo niman Alejandro. Niman yejuamej onikintemakak itech Satanás para maka más ma kuijuikaltikan Dios ikan intlajtol.