1 Tesalonicenses 4 - El Nuevo Testamento

Nemilistli yejuan kipaktia Dios

¹ Aman nokniuan, in yejua sanoyej temechtlajtlaniliaj niman temechnauatiaj ikan itokatsin toTEKO Jesús, para sano ijki ken tejuamej otemechititijkej nenkipaktiskej Dios. Nochipa más ijki xchiuakan.

² Nemejuamej nenkimatstokej on tlanauatiltin yejuan otemechmakakej ikan itlanauatil toTEKO Jesús.

³ Dios kineki xmochipauakan, niman maka xauilnemikan.

⁴ Yej cada se ma kimati kenijki kipiyas isiuau ikan chipaualistli niman ikan tetlakaitalistli.

⁵ Niman maka sanoyej xpiyakan on xkuajli eleuilistli* ijkon ken kichiuaj on tlakamej yejuan xhebreos*.

⁶ Maka yakaj ixkoyejyeuas niman kichiuas on tlen xkuajli itech ikniu tlaneltokaketl, pampa nochi ika on toTEKO mechcastigaros chikauak, ijkon ken tejuamej yotemechijlijkaj.

⁷ Dios xotechnots para tikchiuaskej on tlen xchipauak, yej para tikchiuaskej on tlen chipauak ixpan yejua.

⁸ Ijkon tej, yejuan xkiselia in kuajli temachtilistli xkiselia san yakaj tlakatl, yej xkiselia Dios yejuan techmaka Espíritu Santo.

⁹ Para temechtlajkuiluiskej más de on kenijki nemotlajsojtlaskej* ken iknijtin itech Cristo xok noneki, pampa Dios kuajli yomechmachtij.

¹⁰ Niman melauak nenkintlajsojtlaj nochimej on tokniuan yejuan chantij nochiuiyan de on ueyitlalpan Macedonia. Pero sanoyej* temechtlajtlaniliaj nokniuan, ika nemotetlajsojtlalis* más ma miyekiya.

¹¹ Xchiuakan kanika para nennemiskej ikan yolseuilistli. Maka nemokalaktiskej kampa nemejuamej xmechtocaroua, niman maka xtlatsijkej, yej xtekitikan ikan nemomauan ijkon ken tejuamej otemechmachtijkej.

¹² Ijkon xchiuakan para mechtlakaitaskej on yejuan xtlaneltokaj niman para maka yakaj nenkitlajtlaniliskej itlaj ika mechpaleuis.

Oksejpa uajlas toTEKO

¹³ Nokniuan, tiknekij xmatikan tlinon impan nochiua on mikatsitsimej para maka xmajmanakan ken oksekimej yejuan xkipiyaj tlamachalistli*.

¹⁴ Tikneltokaj ika Jesús omik niman onokuiteu ipan itlalkon. Yejua ika tej, tikneltokaj ika Dios kinuikas iuan Jesús on tlaneltokakej yejuan yomikkej ijkuak uajlas oksejpa.

¹⁵ Yejua ika, nemejuamej temechijliaj ikan itlajtol toTEKO ika tejuamej yejuan titokauaskej ikan tonemilis hasta ijkuak uajlas toTEKO, xachtoj techuikas de on yejuan yomikkej.

¹⁶ Sano toTEKO uajtemos de ne iluikak ikan tlajtojli de tekiuajketl, ikan itlajtol on ángel yejuan yakatstikaj, niman ikan ikakistilis itrompeta Dios. Ijkuakon, on tlaneltokakej yejuan yomikkej, Cristo achtopa yejuamej kinyoliuitis niman kinkuiteas.

¹⁷ Kemaj tejuamej yejuan xe timikij, tiaskej inuan yejuamej ne ipan moxtli para tikonnamikiskej toTEKO ne ipan ajakatl. Ijkon tinemiskej iuan toTEKO para nochipa.

¹⁸ Yejua ika tej, xmoyoltlalikan cada se inuan oksekimej ika in tlajtojli.