1 Tesalonicenses 3 - El Nuevo Testamento

¹ Kemaj pampa xok ouel otikxikojkej más, otiktlalijkej toyojlo para toseltimej titokauaskej nikan Atenas,

² niman kemaj otiktitlankej Timoteo. Yejua tokniu niman itekitkau Dios para temachtia on kuajli tlajtojli itech ika Cristo. Otiktitlankej para omechyolchikauato niman omechyoleuato ipan nemotlaneltok,

³ para maka yakaj notsinkixtis ipampa on tlajyouilistli. Sano nemejuamej nenkimatstokej ika onkaj tikijyouiskej in tlajtlamach*.

⁴ Ijkuak sanken* nemouan tinemiyaj, otemechijlijkej ika tikpiyaskej miyek tlayouilislti, niman ijki onochiu ken nenkimatstokej.

⁵ Yejua ika, ijkuak nejua xoniuel más onikxikoj, onitlatitlan para onikmat kenijki nennemij ipan nemotlaneltok. Ninomojtiaya nikmatis ika on diablo* yomechtlatlatak, niman totekiu sanenkaj otikchijkej.

⁶ Pero aman Timoteo youajnokuepato ne nemotech, niman techajkuilia kuajli tlajtojli ikan nemotlaneltok niman nemotetlajsojtlalis* yejuan nemejuamej nenkipiyaj. Otechijlij ika nochipa nentechelnamikij ikan paktli, niman ika sanoyej* nenkinekij para nentechitaskej sano ijki ken tejuamej.

⁷ Yejua ika, nokniuan, maski otikpixkej tlajyouilistli niman on pajsolouilistli tekokoj, otikpixkej miyek teyoltlalijli ijkuak otikmatkej ika nemejuamej kuajli nenyauij ikan nemotlaneltok.

⁸ Aman sanoyej techyoleua pampa tikmatij ika kuajli nennemij itech toTEKO.

⁹ Pampa onentechmakakej miyek pakilistli ixpan Dios, ¿hasta kenijki tej, tiueliskej tikmakaskej miyek tlaxtlauijli toDios nemopampa?

¹⁰ Ikan tonajli niman yeuajli tiktlajtlaniliaj Dios ma techkauili titosentlaliskej para titotaskej nemouan oksejpa, niman tikajxitiskej tlinon sanken* poliui ipan nemotlaneltok.

¹¹ Sano yejua Dios toTajtsin niman toTEKO JesuCristo ma techpaleui para tiueliskej tiaskej temechontaskej.

¹² Niman ma toTEKO mechyolchikaua para más nenkimiyekiliskej on tetlajsojtlalistli* inuan oksekimej niman para nochi tlakatl, ijkon ken tejuamej temechtlajsojtlaj.

¹³ Ma toTEKO Jesús mechyolmelajkapiya, niman ma mechchipaua para maka nenkipiyaskej ijtlakauilistli ixpan Dios toTajtsin, ijkuak uajlas toTEKO Jesús iuan iyolchipajkauan tlaneltokakej.