1 Tesalonicenses 2 - El Nuevo Testamento

Itekiu Pablo ne Tesalónica

¹ Nokniuan, nemejuamej nenkimatstokej, ijkuak otemechtitatoj xsanenkaj otemechnojnotskej.

² Nemejuamej ye nenkimatstokej ika achtopa otechijixnamikej ikan tlauejli, niman otechuijuikaltijkej ne ipan on ueyikalpan Filipos. Maski yejuamej ijkon otechchiuilijkej, Dios otechpaleuij para otemechmakakej on kuajli tlajtojli ikan nochi toyojlo ompa ne Tesalónica. In otikchijkej maski kejekouayaj techteltiskej.

³ Otemechchikajkanojnotskej xikan on tlamachtijli yejuan xmelauak, nion xikan on tlen xchipauak, nion xitlaj* okse ika otemechkajkayajkej.

⁴ Yej, Dios achtopa otechitak ika tikuajkualtin, niman otechmaktilij on kuajli tlajtojli. Yejua ika, titemachtiaj xpara on tlakamej ma pakikan touan, yej para Dios ma paki touan yejuan techita kuajli ipan toyojlo.

⁵ Nemejuamej nenkimatstokej ika xkaman otemechyeknojnotskej ikan sanoyej* kualtsin tlajtojli nion xotitochijkej ken nenmotlajsojkaikniuan san para xtechmakakan tomin. Dios yejua ixpantitikaj.

⁶ Tejuamej xkaman tiknekij para on tlakamej ma techyekteneuakan, nemejuamej noso oksekimej.

⁷ Yej otitochijkej yolselikej, ken sen nantli kinmiskaltia ikoneuan ikan miyek tetlajsojtlalistli*.

⁸ Nemejuamej temechpiyaliaj miyek tetlajsojtlalistli* hasta tiknekiskiaj temechmakaskiaj xsan on kuajli tlajtojli, yej no hasta tonemilis pampa tejuamej sanoyej* temechtlajsojtlaj.

⁹ Nokniuan, nemejuamej nenkelnamikij kenijki otitekitkej niman otikchijkej kanika para otiktlankej totlakual. Titekitiyaj ikan tonajli niman yeuajli para nion akin de nemejuamej otemechtekimakakej chika tejuamej temechmachtiayaj on kuajli tlajtojli yejuan kiteijlia ken Dios temakixtia.

¹⁰ Nemejuamej nentestigos, niman Dios no, ika otitouikakej chipauak niman yolmelajkej nemotech yejuan nentlaneltokaj. Xakaj uelis techtlajtlakolmakas.

¹¹ No ijki nenkimatstokej ika otemechijlijkej cada se de nemejuamej ken kichiua sen tajtli iuan ikoneuan. Otemechyolejkej niman otemechyolpaktijkej.

¹² Niman no otemechtlaktitijkej para xmouikakan ken kitocaroua nemouikaskej, yejuan nenikoneuan Dios akin omechnots para nenkipiyaskej nemilistli ne kampa yejua tlamandaroua niman onkaj ueyilistli.

¹³ Niman no tikmakaj tlaxtlauijli Dios pampa ijkuak nemejuamej onenkiselijkej itlajtol yejuan tejuamej otemechmachtijkej, onenkiselijkej ken itlajtol yejua niman xken itlajtol yakaj tlakatl. Niman melauak yejua itlajtol Dios. Niman on itlajtol tekiti nemouan yejuan nentlaneltokaj.

¹⁴ Nokniuan, on tlen onochiu impan on tlaneltokakej itech Dios ne Judea yejuan tekoneuan itech Cristo Jesús, no ijki onochiu nemouan. Omechtlauelitakej niman omechtlajyouiltijkej yejuamej on nemochanejkauan sano ijki ken on ikoneuan Dios ne Judea otlajyouijkej intech on inchanejkauan hebreos*.

¹⁵ Yejuamej on hebreos* okimiktijkej toTEKO Jesús no ijki ken okinmiktijkaj on tiotlajtojkej. On hebreos* otechkixtijkej, xkipaktiaj Dios, niman nochi tlakatl kitlauelitaj.

¹⁶ Xtechkauiliaj tikinnojnotsaskej on yejuan xhebreos* para yejuamej no ma nomakixtikan. Ijkon ken nochipa kichiuaj, más kimiyekiliaj intlajtlakol hasta kampa xok ueli. Pero aman ye kuajli on itlauel Dios impan youajlaj.

Pablo oksejpa kineki kominnotsas on chanekej Tesalónica

¹⁷ Nokniuan, maski tla xtemechitayaj ijkuak temechtlalkauiyayaj ipan achijtsin tiempo, tejuamej nochipa temechpiyayaj ipan toyojlo, niman sanoyej tiknekiyaj tiaskej temechontaskej.

¹⁸ Tiknekiyaj tiaskej, hasta nejua Pablo miyekpa niknekiya nias. Pero nochipa ijkuak tiasnekiyaj, on diablo* xtechkauiliaya.

¹⁹ Tla ijkon tej, ¿akinomej yes on yejuan inka tikpiyaskej totlamachalis*, topakilis niman tocoronas yejuan techyolpaktis, tla xsano nemejuamej? Melauak nentopakilis yeskej ijkuak toTEKO uajnokuepas.

²⁰ On melauak ika nemejuamej nentoueyilis niman nentopakilis.