1 Pedro 5 - El Nuevo Testamento

On ueuetkej tlayekankej niman on telpokamej

¹ Aman nikneki nikintlakanonotsas on ueuetkej tlayekankej yejuan nemij ipan nemotiopanuan. Nejua no niueuetsin tlayekanki itech tokniuan. Onikitak Cristo ijkuak otlajyouij niman no nikpiyas seki iueyilis yejuan uajnonextis.

² Xkincuidarokan ikoneuan Dios yejuan yejua omechmaktilij para nenkincuidaroskej. Xkimpiyakan ken sen tlajpixki kimpiya iborreguitos. Maka xchiuakan pampa tla yakaj mechchiualtia, yej ikan kuajli nemoyojlo ken Dios kineki. Maka xchiuakan pampa nenkinekij nenkitlaniskej tomin, yej san pampa nenkinekij nentekitiskej para Dios.

³ Maka xkimpiyakan ken nemoyaxkauan on yejuan Dios omechmaktilij para nenkincuidaroskej, yej xkinyekanakan ikan kuajli ejemplo.

⁴ Ijkuak uajnonextis Cristo, yejuan kinmandaroua on tlajpixkej, nenkiseliskej sen tetlayokolijli* sanoyej* kualtsin yejuan xkaman popoliui xken sen tetlayokolijli* yejuan tikseliaj ipan in tlaltikpaktli.

⁵ Telpokamej, no ijki xkintlakamatikan on yejuan más ueuentsitsimej. Xmouikakan iuan oksekimej ikan yolyemanilistli* pampa on Yektlajkuilojli kijtoua: Dios xkinselia on yejuan noueyimatkej, pero yejua kimpaleuiya ikan iteiknelilis* on yejuan yolyemankej.

⁶ Yejua ika, xmoyolyemanilikan ixpan Dios yejuan kipiya nochi poder, niman mechmakas tetlakaitalistli ipan on tonajli yejuan okitlapejpenij.

⁷ Xmaktilikan Dios nochi on tlajtlamach yejuan mechyolpajsolou pampa yejua kineki mechpaleuis.

⁸ Kuajli xmonemilikan niman xtlachixtiakan, pampa nemotlauelikniu on diablo* kineki mechxoxotonis. Yejua kistinemi ken itlaj león yejuan nanalkatinemi niman kitejtemojtinemi akinon kikuas.

⁹ Kixnamikikan on diablo*, niman xmelajkanemikan ipan nemotlaneltok. No ijki xmatstiakan ika nochiuiyan imanian in tlaltikpaktli on nemokniuan no ijki ken nemejuamej tlajyouiyaj.

¹⁰ Sakin ijkuak nemejuamej yonentlajyouijkej ipan achijtsin tiempo, sano yejua Dios mechkueltlalis, mechmelajkapiyas, mechkojtilis, niman mechyektlalis ipan nemotlaneltok. Sano yejua Dios techmaka nochi iteiknelilis*, niman otechnots para tikpiyaskej iueyilis yejuan para nochipa onyas itechkopa Cristo.

¹¹ Yejua ma kipiya ueyilistli niman poder para nochipa. Ma ijki nochiua.

Pedro sa ika nochi tetlajpaloua

¹² Yonemechtlajkuiluij ikan keski tlajtojli ipan yejua in tlajkuilolamatl yejuan tokniu Silvano okijkuiloj ken nejua nikijkuiloskia. Nejua kuajli nikmati ika yejua kuajli iyojlo. Onemechtlajkuiluij para onemechtlakanonots niman onemechmejlakaijlij ika iueyitetlajsojtlalis* Dios melauak. Xmelajkanemikan ipan on ueyitetlajsojtlalistli.

¹³ Ikoneuan Dios yejuan nemij nikan Babilonia, niman yejuan no okintlapejpenij ken nemejuamej, mechtlajpalouaj. Niman Marcos yejuan ken nokoneu yeskia, mechtlajpaloua.

¹⁴ Xmotlajpalokan nochimej iuan oksekimej ikan tetlajsojtlalistli*. Xpiyakan yolseuilistli nemejuamej yejuan nennemij san sekan iuan JesuCristo. Ma ijki nochiua.