1 Pedro 4 - El Nuevo Testamento

Noneki tinemiskej ken Dios kineki

¹ Ijkon ken Cristo otlajyouij ipan itlalnakayo, nemejuamej no xnemikan listos para nenkiseliskej tlajyouilistli. Niman xkelnamikikan, ika on yejuan tlajyouiya ipan itlalnakayo kajkaua on tlajtlakojli.

² Ijkon tej, chika yejua nemis ipan in tlaltikpaktli, xok kitokas on xkuajli eleuilistli* yejuan itlalnakayo kineki, yej kitokas on tlen Dios kineki.

³ Ipan on tiempo yopanok, nemejuamej onenkichijkej miyek xkuajli no ijki ken on yejuan xhebreos*. Onenkichijkej nochi tlen sanoyej xkuajli, onenkipixkej xkuajli eleuilistli, onenkichijkej iluimej kampa sanoyej nentlauaniyaj, nochipa nentlauantinemiyaj niman nenkinmauistiliayaj on ídolos.

⁴ Aman yejuamej on yejuan xhebreos*, xkajsikamatij tline* xok nemonelouaj inuan ipan on miyek xkuajli tlajtlamach* yejuan kichiuaj. Yejua ika, yejuamej mechteneuiliaj tlen xkuajli.

⁵ Pero yejuamej ika onkaj kixpantiliskej Cristo nochi on tlen xkuajli kichiuaj. Niman Cristo nemi listo para kinyolkuitis niman kintlaxtlauilis on yejuan nemij niman no on yejuan yomikej.

⁶ Yejua ika, Cristo no oyaj niman okinmijlij on yejuan yomikkej on kuajli tlajtojli yejuan kiteijlia ken Dios temakixtia. Para ijkon Dios okinyolkuitij niman okintlajtlakolmakak ken nochi tlakatl kiyolkuitis. Pero Cristo okinmijlij on kuajli tlajtojli para inalmas ueliskej nemiskej ken Dios nemi.

Nochi on tlaneltokakej noneki nouikaskej kuajli ipan in sa ika nochi tiempo

⁷ Ye nisiu para tlamis nochi tlajtlamach*. Yejua ika, kuajli xmonemilikan niman kuajli xmoyekanakan para nenueliskej nenkichiuaskej oración.

⁸ In yejua más ueyi kijtosneki. Sanoyej xmotlajsojtlakan* iuan oksekimej pampa tla melauak nentetlajsojtlaj nenkitlapojpoluiskej yejuan mechchiuilia tlen xkuajli.

⁹ Xkinselikan ikan paktli nemochan on yejuan xkipiyaj tlen kikuaskej noso xkipiyaj kanon nosekuiskej.

¹⁰ Dios omechmakak nemejuamej on tetlayokoliltin yejuan mechueliltia on tlen aman ueli nenkichiuaj. Niman cada se de nemejuamej omechmakak tetlayokoliltin sesekneka. Yejua ika, nochipa ijkuak nenueliskej, kuajli xtekitiltikan on tlen Dios omechmakak para nenkimpaleuiskej oksekimej.

¹¹ Ijkuak yakaj temachtis, ma temachti ikan itlajtol Dios. Ijkuak yakaj kintekichiuilia oksekimej, ma kichiua ikan on chikaualistli yejuan Dios kimaka. Ijkon Dios kiselis yekteneualistli itechkopa JesuCristo. JesuCristo ma kiselia ueyilistli niman poder aman niman para nochipa. Ma ijki nochiua.

On tlaneltokakej noneki pakiskej ijkuak tlajyouiyaj ipampa Cristo

¹² Notlajsojkaikniuan, maka ma mechmojkatlachaltikan on temojtij yejuan nenkijyouiyaj. Maka xnemilikan itlaj yenkuik nemopan nochiua yejuan xkaman nochiua impan oksekimej.

¹³ Yej, xpakikan ika no nenkipiyaj seki itlajyouilis Cristo para no más sanoyej nempakiskej ijkuak yejua nopanextis iueyilis.

¹⁴ Tla on tlakamej mechteneuiliaj on tlen xkuajli pampa nenkineltokaj Cristo, nenkiseliskej itlatiochiualis Dios, pampa on Espíritu Santo yejuan kipiya ueyilistli nemi nemouan. On tlakamej kijtouaj on tlen xkuajli itech Cristo, pero nemejuamej nenkitlakaitaj.

¹⁵ Tla se de nemejuamej tlajyouiya, maka ma tlajyoui pampa otemiktij, noso otlachtek, noso xkitlakamati on tekiuaj, noso nokalaktia kampa xkitocaroua.

¹⁶ Yej, tla se de nemejuamej tlajyouiya pampa kineltoka Cristo, xkitocaroua pinauas, yej ma kueyili Dios pampa yejua tlaneltoka.

¹⁷ Yoyejkok on tiempo para Dios kinyolkuitis niman kintlaxtlauilis yejuan tiikoneuan. Tla yejua toka peuas ika techyolkuitis tejuamej yejuan tiikoneuan, ¿kenijki kisaskej on yejuan xkitlakamatij on kuajli tlajtojli yejuan kiteijlia ken Dios temakixtia?

¹⁸ On Yektlajkuilojli kijtoua: Tla on yejuan kuajkualtin sa axkan* uelij nomakixtiaj, ¿tlinon impan nochiuas on yejuan xkuajkualtin niman on tlajtlakolejkej?”

¹⁹ Ijkon tej, nemejuamej yejuan nentlajyouiyaj pampa Dios kineki, kuajli xchijtiakan ken mechtocaroua. No ijki, xmaktilikan nemoalma Dios yejuan omechchijchiu niman nochipa kichiua ken kitocaroua.