1 Pedro 3 - El Nuevo Testamento

On yejuan teuan nemij noneki notlakaitaskej

¹ Nemejuamej siuamej, xtlakaitakan nemoueuentsin. Ijkon tej, tla se de nemejuamej kipiya iueuentsin yejuan xkineltoka itemachtil Dios, uelis noyoleuas ika on ken tejua timouikas, niman xafuerza tiknojnotsas,

² pampa kitas ika timouika ikan chipaualistli, niman kenijki tiktlakaita Dios.

³ Nemokualtsinka* xkitocaroua kipiyas de on tlajmachyotl* yejuan tlachijchijtli ikan oro, noso ikan tlakentin yejuan pajtio, noso tla notsonmalinaj sanoyej* kualtsin.

⁴ Yej nemokualtsinka* noneki kisas ipan nemoyojlo. Sen siuatl ikualtsinyo kisa ipan iyojlo ijkuak yolyemanki* niman tenotski. In yejua ueyi kijtosneki ixpan Dios.

⁵ Ye uejkaui on siuamej yejuan chipajkej katkaj niman okineltokakej Dios, ijkon onokualtsintilijkej. Yejuamej kitlakamatiyaj inueuentsin

⁶ ijkon ken Sara, yejuan kitlakamatiya Abraham niman okitlakaitak ijkuak kijliaya “noteko.” Niman nemejuamej nenkoneuan yeskej itech Sara tla nenkitokaskej iejemplo niman nenkichiuaskej on tlen kuajli niman xitlaj* nenkimakajsiskej.

⁷ Tlakamej, xmotenkakikan kuajli inuan nemosiuauan. Niman xkintlakaitakan ken noneki pampa yejuamej más maluiltin xken nemejuamej, niman pampa yejuamej no nemouan kiseliskej sen nemilistli yejuan Dios omechmakak ikan iteiknelilis*. Ijkon kuajli xmouikakan inuan nemosiuauan para maka itlaj kitsakuilis nemooraciones.

Yejuan tlajyouiyaj ipampa on tlen kuajli kichiuaj kiseliskej itlatiochiualis Dios

⁸ Sa ika nochi nemechijlis, nenmochimej kuajli xnemikan iuan cada se ikan paktli. Xmajmanakan ijkuak se itlaj kajmana. Xmotlajsojtlakan* iuan cada se ken iknijtin. Xteiknelikan niman xnemikan yolyemankej.

⁹ Tla yakaj itlaj mechchiuilis tlen xkuajli, maka no ijki nenkuepiltiskej, noso tla yakaj mechteneuilia on tlen xkuajli, maka no nenkiteneuiliskej on tlen xkuajli. Yej xkuepiltikan ikan tlatiochiualistli, pampa Dios omechnots para ijki nemouikaskej, niman ijki nenkiseliskej sen tlatiochiualistli.

¹⁰ Nemechijlia ijkin pampa on Yektlajkuilojli kijtoua: On yejuan kineki pakis ipan inemilis niman kineki kuajli nemis ipan in tonaltin, ma kejeua inenepil para maka ma kijijto on tlen xkuajli, niman ma notenijmati para maka yakaj ma kajkayaua.

¹¹ Maka sa ma kichiua on tlen xkuajli, niman ma kichiua nochi tlen kuajli. Ma kitejtemo yolseuilistli inuan oksekimej, niman ikan nochi iyojlo ma kejeua.

¹² Ma kichiua nochi in tlajtlamach* pampa Dios kintlakaita on yejuan yolmelajkej*, niman kaki inoración. Pero yejua xkinkakis on yejuan kichiuaj tlen xkuajli.”

¹³ Tla ikan nemoyojlo nochipa nenkichiuaj on tlen kuajli, ¿akinon tej, mechpajsolos?

¹⁴ Pero tla nentlajyouiyaj pampa nenkichiuaj on tlen kuajli, nenkiseliskej itlatiochiualis Dios. Yejua ika maka xmomojtikan ika on tlen kijtouaj niman kichiuaj, nion maka xkomatstiakan.

¹⁵ Yej ipan nemoyojlo xtlakaitakan Cristo yejuan nemoTEKO. Nochipa xnemikan listos para nenkinnankiliskej nochimej on yejuan mechtlajtoltiskej de nemotlamachalis*.

¹⁶ Pero ijkuak nenkinnankiliskej, xchiuakan ikan yolyemanilistli niman tetlakaitalistli. Xpiyakan kuajli nemochipajkatlamachilis. Niman ijkon on yejuan mechteneuiliaj tlen xkuajli, kipinauismatiskej de on tlen kijtouaj, pampa kuajli nemouikaj itech Cristo.

¹⁷ Más kuajli nentlajyouiskej ipampa on tlen kuajli nenkichiuaj, tla Dios ijki kineki, xken tla nentlajyouiskej ipampa on tlen xkuajli nenkichiuaj.

¹⁸ Cristo otlajyouij niman omik ipampa tlajtlakojli. Yejua omik san sejpa para nochipa. Yejua yejuan xokipix tlajtlakojli, omik topampa yejuan xtiyolmelajkej para otechuikak itech Dios. Itlalnakayo omik pero iEspíritu oyoliu*.

¹⁹ Niman Cristo ikan iEspíritu oyaj para okinmachistito on almas yejuan tsakutokej, ika yotetlan.

²⁰ Yejuamej onenkaj ye uejkaui ipan on tiempo ijkuak nemiya Noé. Niman nochi on tiempo chika Noé kichijchiuaya on akajli*, yejuan Dios okinauatij para ma kichijchiua, Dios kinchaya xikan tlauejli para kitlakamatiskiaj, pero yejuamej ononenekkej. Xkelnamikikan ika ipan on akajli Dios okimakixtij, san chikueyi tlakatl. Yejua okinmakixtij ipan atl.

²¹ Niman on atl, aman yejua kixneskayotia* on tlakuatekilistli. Ijkuak titokuatekiyaj, nesi ika timakisaj itechkopa iyoliuilis Cristo ijkuak Dios oketsteu ipan itlalkon. On tlakuatekilistli xkichipaua tonakayo, yej tiktlajtlaniliaj Dios para techmakas sen chipajkatlamachilistli.

²² Aman Cristo nemi ne iluikak iyekmakopa Dios kampa kinmandaroua on ángeles niman on tekiuajkej niman on yejuan kipiyaj poder.