1 Pedro 2 - El Nuevo Testamento

¹ Pampa nenkipiyaj yenkuik nemilistli, maka kaman xchiuakan tlen xkuajli. Maka xtekajkayauakan, nion maka xomexayaknemikan, nion maka xtenexikolitakan, nion maka xijistlakatikan.

² Aman tej, sanoyej* xnekikan ichipajkatlajtol Dios ken on selikakokonej* yejuan sanoyej kinekij chichiskej. No ijki sanoyej xnekikan on chipajkatlajtojli para ika nemoskaltiskej niman nenkiseliskej temakixtilistli,

³ pampa kuajli yonenkimatkej ika toTEKO melauak kuajli.

Cristo ken sen tetl yejuan yoltikaj

⁴ Xnisiuikan Cristo yejuan ken tetl yejuan yoltikaj yejuan on tlakamej xokiselijkej, pero Dios okitlapejpenij ken más ueyi kitosneki para itiopan.

⁵ Nemejuamej no nenyoltokej niman ken nentemej. Yejua ika tej, xmotemakakan para Dios ma mechtekitilti ken nentemej yeskiaj para kichijchiuas itiopan. Ompa Dios mechtlalis ken tiopixkej yejuan chijchipajkej para nenkintlaliskej uentin yejuan Dios uelis kiselis ikan pakilistli, pampa nenkineltokaj JesuCristo.

⁶ Dios ipan in Yektlajkuilojli tlajtoua de Cristo: Xkakikan, niktlalia sen tetl yejuan yakatstikaj ne ipan on chanyotl* itoka Sión. Oniktlapejpenij in tetl, niman para nejua in tetl sanoyej ueyi kijtosneki. In tetl kijtosneki noKoneu. On yejuan kineltokas yejua, xkaman pinauas.

⁷ Aman yejua no sanoyej ueyi kijtosneki para nemejuamej yejuan nentlaneltokaj. Pero para on yejuan xtlaneltokaj, impan nochiua yejua in tlen kijtoua in Yektlajkuilojli: “On tetl yejuan on tepanchijchijkej xokiselijkej, aman yejua yonotlalij yakatstikaj.”

⁸ Niman no impan nochiua on tlen kijtoua in Yektlajkuilojli: “Onkaj se tetl yejuan ika nokxitechakuaniua, niman in tetl ueli tetlajkali.” Yejuamej nokxitechakuaniaj sano ijki ken Dios okintlalilij ika nochiuas impan pampa xkitlakamatij on itemachtil.

Nemejuamej omechtlapejpenij Dios

⁹ Pero nemejuamej Dios omechtlapejpenij, niman nentiopixkej para nenkipaleuiskej toRey. Niman nemejuamej no sen nación yektli, niman nemejuamej no nenteyaxkauan* itech Dios. Niman nochi in onochiu para nenkiteijliskej iueyilis Dios yejuan omechkixtij ipan on tlayauajlotl, niman omechuikak kampa sanoyej kuatsin tlauilpan.

¹⁰ Achtoj nemejuamej xnenteyaxkauan* katkaj itech Dios, pero aman neniyaxkauan. Achtoj xnenkimatiyaj iteiknelilis* Dios, pero aman yonenkiselijkej iteiknelilis*.

On tlaneltokakej xkitocaroua kichiuaskej on tlen xkuajli

¹¹ Notlajsojkaikniuan, nenkimatij ika aman nemejuamej ken nennejnenkej niman xnenchanejkej ipan in tlaltikpaktli. Yejua ika, sanoyej nemechtlajtlanilia maka xkauilikan ma mechyekana on xkuajli nemoeleuilis* yejuan noxixikoua iuan nemoalma.

¹² Xmouikakan kuajli imixpan on yejuan xhebreos*. Ijkon maski kiteneuaj ika yonenkichijkej tlen xkuajli, yejuamej kitaskej on tlen kuajli yejuan nenkichiuaj. Niman kemaj kiyekteneuaskej Dios ijkuak ajsis on tonajli para techyolkuitis.

On tlaneltokakej noneki kintlakamatiskej on tekiuajkej niman intekouan

¹³ Ipampa toTEKO, xkintlakamatikan nochimej on tekiuajkej yejuan on tlakamej kintlaliaj. Xtlakamatikan on más ueyi tekiuaj emperador yejuan kipiya más ueyi tekiuajyotl.

¹⁴ Niman no xkintlakamatikan on gobernadores yejuan kitemakaj on tlanauatijli para kincastigaroskej on xkuajkualtin tlakamej, niman kintlakaitaskej on yejuan kuajkualti tlakamej.

¹⁵ Ijkon xkintlakamatikan pampa Dios kineki xchiuakan on tlen kuajli para on yejuan tontos xuelis itlaj mechijtouiliskej.

¹⁶ Xmouikakan ken tlakamej yejuan xesclavos. Pero pampa xnenesclavos maka xnemilikan ika nenueliskej nenkichiuaskej tlen xkuajli. Yej más kuajli xmouikakan ken iesclavos Dios.

¹⁷ Kuajli xkintlakaitakan nochi tlakatl, xkintlajsojtlakan* nochimej on tokniuan, xtlakaitakan Dios, niman xtlakaitakan on rey.

¹⁸ Nemejuamej esclavos, xkintlakamatikan nemotekouan ikan nochi tetlakaitalistli. Maka san xkintlakamatikan yejuamej on yejuan kuajkualtin niman tenotskej, yej no yejuamej on yejuan xkuajkualtin.

¹⁹ Nenkipaktiaj Dios, tla nentlajyouiyaj ijkuak nenkichiuaj on tlen kuajli pampa nenkimatij ika ijkon kineki Dios.

²⁰ Pero tla nemejuamej nenkichiuaj itlaj tlen xkuajli, niman mechcastigarouaj, xakaj mechtlakaitas. Pero tla nentlajyouiyaj pampa onenkichijkej on tlen kuajli, niman kuajli nenkixikouaj ikan yolseuilistli, kemaj Dios nenkipaktiaj.

²¹ Dios omechnots para nenkichiuaskej on tlen kuajli maski nentlajyouiskej. Cristo otlajyouij nemopampa, niman ijkon omechititij kenijki no noneki nenkichiuaskej.

²² On Yektlajkuilojli kijtoua itech ika Cristo: “Yejua nion se tlajtlakojli xokichiu, nion okajkayau yakaj.”

²³ Ijkuak on tlakamej okuijuikaltijkej Cristo, yejua xotlanankilij ikan tlauijuikaltilistli. Ijkuak okitlajyouiltijkej, xokijtoj ika kintlayouiltis nion kinmiktis, yej okinmaktilij Dios yejuan nochipa tetlaxtlauilia ken noneki.

²⁴ Ne ipan kojnepanojli* Cristo okiselij castigo ipan itlalnakayo ipampa totlajtlakol, para tejuamej ma tikajkauakan on ika titlajtlakouaj niman para ma tiyolmelajkanemikan. Aman Dios yomechtlapojpoluij ipampa on tlen okijyouij Cristo.

²⁵ Ipan se tiempo nenchayajkakistinemiyaj ken borreguitos yejuan polijtinemij. Pero aman yonenualajkej itech Cristo yejuan mechcuidaroua ken sen tlajpixki niman yejuan kimejeua nemoalmas.